រុស្សីជូនកាដូទូរសព្ទអេក្រង់ភ្លោះដំបូងក្នុងលោកដល់មហាអំណាចចិន

2014-11-11 21:21:35
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកប្រធានាធិបតីចិន Xi Jinping បានទទួលអំណោយជាទូរសព្ទអេក្រង់ភ្លោះពីរគ្រឿងពីប្រធានាធិបតីរុស្សី Vladimir Putin ក្នុងកិច្ចប្រជុំសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) កាលពីម្សិលមិញ។

ក្នុងកិច្ចប្រជុំ APEC នៅទីក្រុងប៉េកាំងកាលពីម្សិលមិញ លោកប្រធានាធិបតី Vladimir Putin បានជូនទូរសព្ទអេក្រង់ភ្លោះដំបូងគេបង្អស់ក្នុងលោកពីរគ្រឿងទៅដល់លោក Xi Jinping ដែលជាប្រធានាធិបតីចិននិងជាម្ចាស់ផ្ទះនៃកិច្ចប្រជុំ APEC ដើម្បីទុកជាកាដូខួប១០ឆ្នាំ នៃជំនួបប្រជុំរវាងមេដឹកនាំកំពូលទាំងពីរ។ Smartpone ទាំងពីរ ដែលជាកាដូជូនលោកប្រធានាធិបតីចិននោះឈ្មោះ YotaPhone 2 បំពាក់ប្រព័ន្ធការពារទិន្នន័យមិនឲ្យមានការ Hack ណាមួយ ដែលបច្ចេកវិទ្យានេះត្រូវបានផលិតដោយវិស្វករជំនាញៗបំផុតរបស់រុស្សី។

ប្រធានាធិបតីចិន Xi Jinping (កណ្តាល) និង ប្រធានាធិបតីរុស្ស៊ី Vladimir Putin (ឆ្វេង)

តាមពិតទៅ YotaPhone 2 ត្រូវបានដាក់បង្ហាញឲ្យពិភពលោកបានឃើញកាលពីពេលថ្មីៗកន្លងទៅក្នុងសន្និសីទ Mobile World Congress នៅទីក្រុង Barcelona ប្រទេសអេស្ប៉ាញ។ វាមានអេក្រង់ពីរគឺមុខនិងក្រោយ ខណៈអេក្រង់ក្រោយប្រើបច្ចេកវិទ្យាក្រដាសប្លាស្ទិកអេឡិចត្រូនិកដោយអាចបង្ហាញទិន្នន័យមួយចំនួនបានគ្រប់ពេល ទោះបីជាថ្មអស់ថាមពលក៏ដោយ។

ទូរសព្ទ YotaPhone 2 អេក្រង់ភ្លោះមុខនិងក្រោយ

នៅក្នុងកិច្ចប្រជុំ APEC ម្សិលមិញលោកប្រធានាធិបតី Vladimir Putin តំណាងឲ្យរុស្សីក៏បានចុះកិច្ចព្រមព្រាងមួយចំនួនជាមួយនឹងប្រទេសចិនទាក់ទងនឹងជំនួញឧស្ម័នធម្មជាតិនិងប្រេងឥន្ធនៈ ហើយធ្វើការផ្លាស់ប្តូរកាដូគ្នាទៅវិញទៅមកដោយប្រធានាធិបតី Putin បានជូន YotaPhone 2 ពីរគ្រឿងដល់ប្រធានាធិបតី Xi Jinping៕

អានព័ត៌មានបច្ចេកវិទ្យាប្លែកៗចុចត្រង់នេះ

ប្រែសម្រួល៖ ប៉ែត ផាន់និត

ប្រភព៖ shanghaiist