ផលិតកម្មក្នុងស្រុកមួយទទួលបានទំនុកចិត្តខ្ពស់ ចុះ MOU ជាមួយផលិតកម្ម CBSi របស់កូរ៉េ

2017-12-04 08:02:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្មរាហ៊ូ ទើបតែធ្វើឱ្យមានការភ្ញាក់ផ្អើលពីគម្រោងផលិតរឿងភាគ «ផ្កាស្រពោន ២០១៨» ថ្មីៗ ទទួលបានទំនុកចិត្តពីសំណាក់ផលិតកម្ម CBSi ដែលជាប្រព័ន្ធផ្សព្វផ្សាយដ៏ធំមួយរបស់កូរ៉េខាងត្បូង ដើម្បីចុះអនុសារណៈយោគយល់ ឬ MOU ជាមួយគ្នានៅព្រឹកនេះ។

MOU រវាង CEO ជុំ សុភា និង លោក Ha Geun Chan (រូបខាងស្តាំ) CEO របស់ CBSi

នៅក្នុងកិច្ចព្រមព្រាង MOU ដែលធ្វើឡើងរវាងផលិតកម្មរាហ៊ូ និង CBSi នឹងជួយធ្វើឱ្យផលិតករខ្មែរ ទទួលបានឱកាសបណ្តុះបណ្តាលពីការផលិតពីអ្នកជំនាញកូរ៉េ និងមានទីផ្សារផលិតភាពយន្តពីកូរ៉េ ជាមួយកម្ពុជាក្នុងពេលខាងមុខ។

បើតាមការបញ្ជាក់របស់ CEO ផលិតកម្ម រាហ៊ូ លោក ជុំ សុភា ថា៖ «យើងនឹងមានគម្រោងផលិតភាពយន្តដែលចូលរួមដោយតារាកូរ៉េ និងតារាខ្មែរ ដែលមានការចូលរួមផលិតដោយក្រុមផលិតរបស់ខ្មែរជាពិសេស»។ លោក សុភា បន្តថា វាជាឱកាសរបស់ខ្មែរយើងដើម្បីរៀនសូត្រជាមួយអ្នកជំនាញ និងឱកាសពង្រីកទីផ្សារភាពយន្តខ្មែរយើងដល់ប្រទេសកូរ៉េទៀតផង។

លោក ជុំ សុភា និង លោក Ha Geun Chan CEO របស់ CBSi

ខណៈគម្រោងនៃការបង់ពន្ធរបស់ក្រសួងវប្បធម៌ និងវិចិត្រសិល្បៈលើការផលិតភាពយន្តទំនងនឹងត្រូវអនុវត្តចាប់ឆ្នាំ២០១៨នេះ លោក ជុំ សុភា ហាក់មិនមានការភ្ញាក់ផ្អើរ ដោយលោក ឡើងថានេះជាចំណាត់ការស្របច្បាប់របស់រដ្ឋ ដោយផលិតកម្មរបស់លោកក៏តែងតែអនុវត្តស្រាប់ ទើបវាជាផ្លូវមួយទាក់ទាញទំនុកចិត្ត និងឱកាសផលិតពីបរទេសបាន តែផលិតកររូបនេះ នៅតែគាំទ្រចំណាត់ការសូមឱ្យពន្យារពេលបង់ពន្ធរហូតដល់១០ឆ្នាំក្រោយដូចផលិតករនានាដែរដើម្បីជួយឱ្យផលិតកម្មខ្មែរទាំងអស់មានលទ្ធភាពគ្រប់គ្រាន់ដើម្បីពង្រីកគុណភាព និងទីផ្សារឱ្យបានធំជាងមុន។