បត់មិនមើលផ្លូវ គ្រាន់តែគេស៊ីផ្លេដាក់ខឹង ចុះវាយបែកកញ្ចក់ឡាន (វីដេអូ)

2017-12-04 07:30:05
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមវីដេអូកាមេរ៉ាក្នុងឡាន បានបង្ហាញពីសកម្មភាពបុរសវ័យកណ្ដាលជាជនជាតិថៃម្នាក់ ចុះពីលើឡានដោយកាន់ដងវាយកូនហ្គោលមកវៃកញ្ចក់រថយន្តរបស់ជនរងគ្រោះ។

បុរសជនរងគ្រោះមានឈ្មោះ Santiphap Viriyothai អាយុ ៣១ឆ្នាំ ជាសាស្ត្រាចារ្យនៃសកលវិទ្យាល័យ Payap បាននិយាយថា ខណៈពេលដែលលោកកំពុងបើកបរនៅលើផ្លូវ Donchan-Sankampaeng កាលពីម្សិលមិញ ស្រាប់តែមានរថយន្តម៉ាក Toyata Fortuner ពណ៌ទឹកប្រាក់មួយគ្រឿងបម្រុងនឹងបត់ចូលផ្លូវធំកាត់មុខរថយន្តរបស់លោក ធ្វើឲ្យលោកស្ទើរតែចាប់ហ្វ្រាំងមិនទាន់។

លោក Santiphap ក៏បានស៊ីផ្លេដាក់រថយន្ត Fortuner នោះ ធ្វើឲ្យម្ចាស់រថយន្តខឹងសម្បារយ៉ាងខ្លាំងនិងបានចុះពីរថយន្តដោយកាន់ដងវាយកូនហ្គោលមកវៃកញ្ចក់ឡានរបស់លោក។ ទោះបីជាសកម្មភាពវាយកម្ទេចកញ្ចក់រថយន្តមិនបានថតជាប់ក្នុងកាមេរ៉ាយ៉ាងណាក៏ដោយ គេអាចលឺសំលេងវាយកញ្ចក់រថយន្ត ២ដងនៅផ្នែកខាងស្ដាំ។ បន្ទាប់ពីបុរសនោះចេញទៅបាត់ លោក Santiphap បានទូរសព្ទទៅប្ដឹងប៉ូលិស។

តាមរបាយការណ៍របស់ Daily News ឲ្យដឹងថាប៉ូលិសកំណត់អត្តសញ្ញាណរបស់ជនល្មើសបានហើយ គឹមានឈ្មោះ Pornprom Tonawanik អាយុ ៦៦ឆ្នាំរស់នៅខេត្ត ឈៀងម៉ៃ។ ប៉ូលិសបន្តថា លោក Santiphap បានរងរបួសដៃនិងភ្នែកហើយកញ្ចក់ឡានផ្នែកខាងស្ដាំត្រូវបានកម្ទេច។

មកទល់ពេលនេះ ប៉ូលិសបានធ្វើកំណត់ត្រាចំពោះរឿងក្តីនេះ ហើយលោក Pornprom នឹងត្រូវបានកោះហៅមកកាន់ប៉ុស្តិ៍ប៉ូលិសដើម្បីធ្វើការសាកសួរនៅថ្ងៃនេះ។ ការស៊ើបអង្កេតកំពុងបន្តដើម្បីចាត់ការទៅតាមផ្លូវច្បាប់៕

វីដេអូ៖

ចុចអាន៖

ប្រភព៖ Coconut ប្រែសម្រួល៖ រ័ត្ន