ពិសេសមែន! ម្នាក់ចប់ IT ម្នាក់ចប់ច្បាប់ ចុងក្រោយក្លាយជាថៅកែហាងកាហ្វេកំពុងល្បីមួយ
- 2017-12-06 00:30:00
- ចំនួនមតិ 0 | ចំនួនចែករំលែក 0
ពិសេសមែន! ម្នាក់ចប់ IT ម្នាក់ចប់ច្បាប់ ចុងក្រោយក្លាយជាថៅកែហាងកាហ្វេកំពុងល្បីមួយ
ចន្លោះមិនឃើញ
ផ្ដើមពីការចូលចិត្តផឹកកាហ្វេ និងមានចំណង់ចំណូលចិត្តរឿងរកស៊ីផងនោះ យុវជនវ័យក្មេង២រូប បានចូលហ៊ុនគ្នាម្នាក់ជាង ៥ ០០០ដុល្លារ បង្កើតហាងកាហ្វេមួយឈ្មោះថា កាហ្វេភូមិ កំពុងទទួលបានការចាប់យ៉ាងខ្លាំងពីយុវវ័យចូលផឹកឥតដាច់។
និយាយទាំងទឹកមុខស្រស់ស្រាយ លោកសោម ចំណានសង្ហា វ័យ២៧ឆ្នាំ និស្សិតបញ្ចប់ការសិក្សាផ្នែកព័ត៌មានវិទ្យា(IT) មកពីសាកលវិទ្យាល័យភូមិន្ទភ្នំពេញ ចែករំលែកបទពិសោធន៍ថា ក្រោយបញ្ចប់ការសិក្សាលោកបានទៅធ្វើការក្នុងមន្ទីរពេទ្យឯកជនមួយរយៈពេល៤ឆ្នាំ។ បន្ទាប់មកដោយសារចង់សម្រេចក្ដីប្រាថ្នារបស់ខ្លួន លោកក៏សម្រេចចិត្តបើកអាជីវកម្មតូចមួយ ជាមួយមិត្តភក្ដិជិតស្និទ្ធរបស់លោក គឺលោក សេង សុងគីមស៊័ង វ័យ២៥ឆ្នាំ បញ្ចប់ការសិក្សាផ្នែកច្បាប់ពីសាកលវិទ្យាល័យជាតិគ្រប់គ្រង។
មុននឹងឈានដល់ការបើកហាងកាហ្វេតូចមួយនេះឡើង យុវជនសម្បុរស្រអែមស្រស់ខាងលើ ប្រាប់ថា ក្នុងមួយថ្ងៃត្រូវចំណាយ ៧ដុល្លារទៅលើថ្លៃកាហ្វេទាំងព្រឹកទាំងល្ងាច។ ដូច្នេះក្នុងមួយខែត្រូវចំណាយអស់ ២១០ ទៅ ២៣០ដុល្លារ ហើយក្នុងមួយឆ្នាំត្រូវអស់ ២ ០០០ទៅ ៣ ០០០ដុល្លារទៅហើយគ្រាន់តែថ្លៃកាហ្វេ។ ចុះហេតុអ្វីក៏មិនយកលុយពីការចំណាយដ៏ច្រើននោះ យកមកសន្សំដើម្បីបើកហាងកាហ្វេតែម្ដងទៅ? ដោយសារមានគំនិតបែបនេះ ទើបលោកបបួលមិត្តភក្ដិបង្កើតហាងកាហ្វេមួយឈ្មោះ «កាហ្វេភូមិ» តែម្ដង ហើយម្យ៉ាងវិញទៀតក៏បានផ្ដល់ការងារដល់មនុស្សពីរបីនាក់ទៀតផង។
យុវជនមកពីក្រុងតាខ្មៅ ខេត្តកណ្ដាលរូបនេះ បន្តមួយចំនុចទៀតមុនឈានដល់ការប្រថុយរកស៊ីទាំងវ័យក្មេងទៀតថា លោក និងមិត្តភក្ដិធ្លាប់លក់កាហ្វេក្នុងកម្មវិធីបុណ្យភូមិកាលពីចូលឆ្នាំខ្មែរ ដាក់ឈ្មោះថា «កាហ្វេភូមិ» មានការតុបតែងជាលក្ខណៈបែបខ្មែរទទួលជោគជ័យយ៉ាងខ្លាំងនិងចង់ឲ្យមានបែបនោះនៅកណ្ដាលក្រុងភ្នំពេញមួយ។ម្យ៉ាងវិញទៀតដោយសម្លឹងឃើញថា ហាងកាហ្វេធំៗនៅភ្នំពេញមានតម្លៃខ្ពស់ ទើបលោកចង់ធ្វើគឺជាកូនហាងមួយតម្លៃសមរម្យ រសជាតិឆ្ងាញ់ និងងាយស្រួលមិនសាំញ៉ាំច្រើន។
ចំណែកឯដើមទុន ដើម្បីបង្កើតកូនហាងដ៏ទាក់ទាញនេះ គឺអស់ប្រមាណជាង១ម៉ឺនដុល្លារ ក្នុងនោះត្រូវចូលហ៊ុនគ្នាម្នាក់ជាង ៥ ០០០ដុល្លារ ហើយដើមទុនទាំងនោះគឺបានមកពីការសន្សំក្នុងអំឡុងពេលធ្វើការឲ្យគេជាង៤ឆ្នាំនោះហើយ។ រីឯការចំណាយទៅលើដំណើរការបើកហាងកាហ្វេនេះមានដូចជា៖ ម៉ាស៊ីនកាហ្វេ ការសាងសង់ហាង សម្ភារៈនានារួមមាន តុ កៅអី កែវ និងប្រាក់ខែបុគ្គលិកចំនួន ៤នាក់។ល។
បន្ទាប់ពីដំណើរការបាន ៤ខែ «ហាងកាហ្វេភូមិ» ទទួលការគាំទ្រយ៉ាងខ្លាំងពីសំណាក់អ្នកនិយមទទួលទានកាហ្វេ ដោយក្នុងមួយថ្ងៃអាចលក់អស់ចន្លោះពី ១២០ ទៅ ១៥០កែវ ក្នុងមួយកែវតម្លៃត្រឹមតែ ៦ ០០០ រៀលប៉ុណ្ណោះ។
ចុងក្រោយយុវជនវ័យក្មេងខាងលើ បំផុសគំនិតដល់យុវវ័យដែលចង់រកស៊ីថា ពេលដែលរៀនចប់ហើយ បើមិនមែនជាកូនអ្នករកស៊ីទេ គួរទៅធ្វើការការឲ្យគេសិនដើម្បីប្រមូលផ្ដុំបទពិសោធន៍ និងរៀនសូត្រពីរបៀបធ្វើអាជីវកម្មរបស់គេ។ ជាគំនិតរបស់លោកផ្ទាល់ មិនគួរចេញរកស៊ីភ្លាមៗទាំងមិនមានបទពិសោធន៍នោះទេ៕
ទស្សនាកិច្ចសម្ភាសន៍ពិសេសខាងក្រោមនេះ៖