ដួង ម៉ានិច ប្រែជាញាប់ញ័រដល់ថ្នាក់យំ ពេលគ្រងឈុតនាងនាគ (វីដេអូ)

2017-12-15 08:33:47
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងរាងស្រឡូន ដួង ម៉ានិច រំភើបខ្លាំង រហូតហូរទឹកភ្នែក ឈរមិនជាប់ ដល់ថ្នាក់ទន់ខ្លួន នៅពេលគ្រងសម្លៀកពាក់ជានាងនាគ ពេលសម្ដែងក្នុងកម្មវិធី ព្រះគុណគ្រូល្ខោនខោលលើកទី២ នៅសាកលវិទ្យាល័យ ភូមិន្ទចិត្រសិល្បៈកាលពីល្ងាចមិញ។

ក្នុងកម្មវិធីខាងលើ កញ្ញា ដួង ម៉ានិច តម្រូវឲ្យគ្រងឈុតនាងនាគបង្ហាញម៉ូដ ដែលតួអង្គតំណាងឲ្យ ព្រះនាងនាគក្សត្រិយ៍ គ្រប់គ្រងផែនដីខ្មែរនាសម័យបុរេប្រវត្តិ គឺឈុតកន្ទុយត្រី និងពាក់មកុដក្បាលនាគ។

ក្នុងអំឡុងពេលដើរបង្ហាញម៉ូដ ម៉ានិចក៏ចាប់ផ្ដើមមានទឹកមុខប្រែប្រួល តែនាងនៅតែញញឹមរហូតដល់បញ្ចប់ ។ ក្រោយពីដើរបានមួយជុំកញ្ញាក៏ចាប់ផ្តើមញាក់ញ័រពេញទាំងខ្លួនហើយយំតែម្តង។ ក្រោយពីចប់កម្មវិធី ម៉ានិច និយាយទាំងសម្ដីញ័រប្រាប់ Sabay ថា នេះមកពីកញ្ញាមានអារម្មណ៍រំភើបខ្លាំងពេក ពេលគ្រងសម្លៀកនេះសម្ដែងក្នុងកម្មវិធី ។ «ពេលខ្ញុំដើរ ខ្ញុំមានអារម្មណ៍ ខ្ញុំមិនមែនជាខ្ញុំទេ អារម្មណ៍ខ្ញុំដូចហើរចេញខ្លួនបាត់ទៅហើយ ខ្ញុំពិតជារំភើបខ្លាំងណាស់» ម៉ានិច បញ្ជាក់។

គ្រូសិល្បៈនៅទីនោះអះអាងថា មូលហេតុដែល ម៉ានិច រំភើបដល់ថ្នាក់យំ គឺអាចគ្រូធំ ឬបារមីនៅទីនោះធ្វើឲ្យនាងរំភើបហើយ។ តាមគ្រូសិល្បៈបុរាណកន្លងមក តែងសំណាលថា គ្រឿងសម្លៀកបំពាក់បុរាណនេះមានការត្រណមខ្លាំង ដែលត្រូវសំពះសុំមុននឹងគ្រង។ នៅពេលដែលបានស្លៀកពាក់ហើយអ្នកខ្លះមានអារម្មណ៍ខ្លាច និងខ្លះទៀតមានអារម្មណ៍រំភើបខ្លាំង ចង់សម្ដែងជាដើម៕

អត្ថបទៈ ស្រីអូន