ព្រាបអាចនាំសារដោយរបៀបណា?

2017-12-16 03:46:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រាបត្រូវបានប្រើសម្រាប់ផ្ញើសារមិនត្រឹមតែនៅសម័យបុរាណទេ ប៉ុន្តែសូម្បីនៅដើមសតវត្សទី២០ ក្នុងកំឡុងសង្គ្រាមលោកលើកទី១ ក៏ត្រូវបានគេប្រើដែរ។ ព្រាបអាចនាំសារពីកន្លែងមួយទៅកន្លែងមួយបានដោយសារ ពួកវាមានសមត្ថភាពពិសេសនៃការហោះហើរត្រលប់ទៅរក ផ្ទះវាវិញសម្រាប់រយៈចម្ងាយឆ្ងាយ ហើរបានខ្ពស់ និងលឿន។

យោងតាមការចុះផ្សាយរបស់ The Times of India ព្រាបអាចត្រឡប់មកផ្ទះវិញ បន្ទាប់ពីហើរបានជាង១៦០០ គីឡូម៉ែត្រក្នុងល្បឿន៦០គីឡូម៉ែត្រក្នុងមួយម៉ោង។ អ្នកវិទ្យាសាស្រ្តបានសន្និដ្ឋានថា សត្វព្រាបប្រើប្រភពជាច្រើនដូចជាទិសដៅព្រះអាទិត្យ ម៉ាញ៉ទិករបស់ផែនដី និង ក្លិនដែលត្រូវបានផ្សារភ្ជាប់ទៅនឹងកន្លែងផ្សេងៗគ្នាសម្រាប់ស្វែងរកទិសដៅរបស់វា ដែលជាអំណោយទានពីធម្មជាតិនូវសមត្ថភាពនេះ ដែលមនុស្សមិនមាន។

តាំងពីជាង ៣ ពាន់ឆ្នាំមុនម្ល៉េះដែលមនុស្សបានរកឃើញសមត្ថភាពពិសេសនេះរបស់ព្រាប ព្រោះបើទោះជាគេយកវាទៅទីកន្លែងខុសៗគ្នា ឆ្ងាយរាប់គីឡូម៉ែត្រ ក៏ព្រាបអាចរកផ្លូវទៅផ្ទះឃើញដែរ។ ជារួម ក្នុងសម័យបុរាណព្រាបត្រូវបានគេប្រើមិនថាក្នុងគោលបំណងបញ្ជូនដំណឹង ឬ ប្រើក្នុងសមរភូមិ គឺព្រាបដែលព្រលែងទៅក្នុងលំហអាកាស វានឹងហោះពីទីតាំងផ្សេងៗទៅផ្ទះវិញ។ នេះបើតាមវេបសាយ ScienceABC។

ក្នុងប្រវត្តិសាស្រ្តអធិរាជ ហ្សង់ហ្ស៊ីខាន់ បានប្រើព្រាប ដើម្បីរក្សាទំនាក់ទំនងនៃចក្រភពដ៏ធំរបស់លោក។ នៅសតវត្សទី ១២ ប្រទេសស៊ីរី និង ទីក្រុងបាកដាដភ្ជាប់ទំនាក់ទំនងគ្នាតាមរយៈព្រាប។ និយាយបែបផ្សេង បើចង់ឲ្យព្រាបបញ្ជូនសារពីស៊ីរីទៅបាកដាដ ផ្ទះរបស់ព្រាបនោះត្រូវតែនៅក្នុងទីក្រុងបាកដាដ។ ផ្ទុយមកវិញ បើចង់ឲ្យព្រាបបញ្ជូនសារពីបាកដាដទៅស៊ីរី ផ្ទះរបស់ព្រាបនោះត្រូវតែនៅក្នុងប្រទេសស៊ីរី៕

ប្រភព៖ Times of India ប្រែសម្រួល៖ សុខ លាងហ៊ត