ទៅថៃ ជិះម៉ូតូអត់ពាក់មួកសុវត្ថិភាព ត្រៀមលុយ ៣០ដុល្លារឲ្យប៉ូលិសទៅ!

2017-12-18 10:00:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាកាដូសម្រាប់ពិធីបុណ្យណូអែល ពោលគឺចាប់ពីថ្ងៃច័ន្ទ ទី២៥ ខែធ្នូ ឆ្នាំ២០១៧ តទៅ អ្នកដែលជិះម៉ូតូនៅក្នុងទីក្រុងបាងកក ដោយមិនមានពាក់មួកសុវត្ថិភាព គួរតែត្រៀមលុយ ១ ០០០បាត ឬ ៣០ដុល្លារ សម្រាប់បង់ថ្លៃផាកពិន័យឲ្យហើយទៅ។

រឹតតែអាក្រក់ជាងនេះទៅទៀតគឺ ប៉ូលិសអាចនឹងរឹបអូសយកម៉ូតូ រហូតទាល់តែអ្នកបើកបរ អាចរកមួកសុវត្ថិភាពមកពាក់បាន។ ច្បាប់ដ៏តឹងតែងថ្មីនេះ ក៏ត្រូវបានអនុវត្តចំពោះអ្នកជិះពីក្រោយផងដែរ។

គំនិតផ្ដួចផ្ដើមនេះ គឺជាផែនការ ៣ផ្នែករបស់រដ្ឋាភិបាល ដើម្បីកាត់បន្ថយការស្លាប់ ដោយសារគ្រោះថ្នាក់ចរាចរ នៅក្នុងប្រទេសថៃ ដែលបានជាប់ឈ្មោះជា ប្រទេសមានគ្រោះថ្នាក់បំផុតលើពិភពលោកសម្រាប់អ្នកបើកបរម៉ូតូ។

ទោះជាយ៉ាងណាក៏ដោយ បច្ចុប្បន្ននេះអ្នកដែលបើកបរម៉ូតូ ដោយមិនពាក់មួកសុវត្ថិភាព ក៏ត្រូវប៉ូលិសចាប់ដែរ ប៉ុន្តែមិនផាកពិន័យឡើយ គ្រាន់តែរឹបអូសយកម៉ូតូទុក រហូតដល់អ្នកបើកបរទិញមួកសុវត្ថិភាព។

គួរបញ្ជាក់ថា គ្រប់ស្ថានីយប៉ូលិសទាំងអស់ ចំនួន ៨៨ នៅទីក្រុងបាងកក នឹងអនុវត្តច្បាប់នេះ៕

ចុចអាន៖

ប្រភព៖ Coconut ប្រែសម្រួល៖ សេង ឡុង