SECOS ក្រោយកាត់ភ្លៀងកាត់ព្យុះ ៣ ឆ្នាំ ទើបបានចេញរូបរាងជាផ្លូវការ

2017-12-19 07:40:00
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជន ៣ នាក់ ដែលមានប្រវត្តិសិក្សាផ្សេងៗគ្នាបានរួមគ្នាបង្កើតប្រព័ន្ធគ្រប់គ្រងទិន្នន័យ សម្រាប់ប្រើប្រាស់នៅក្នុងសហគ្រាសអាជីវកម្មខ្នាតតូចនិងមធ្យម និងបានដាក់ឲ្យប្រើប្រាស់ជាផ្លូវការនៅចុងឆ្នាំ ២០១៧ នេះ។

កញ្ញាតូច ច័ន្ទណារី ជាសមាជិកដ៏សកម្មមួយរូបក្នុងក្រុម Vteam ដែលបានចូលរួមបង្កើតប្រព័ន្ធគ្រប់គ្រងទិន្នន័យ SECOS បានឲ្យដឹងថា SECOS អាចជួយកាត់បន្ថយការចំណាយ និងបង្កើនប្រសិទ្ធភាពក្នុងគ្រប់គ្រងក្នុងអាជីវកម្ម។

យុវតីដែលបានបញ្ចប់ថ្នាក់អនុបណ្ឌិតមកពីអង់គ្លេសនេះបានលើកឡើងពីបញ្ហាប្រឈម ដែលម្ចាស់អាជីវកម្មភាគច្រើនជួបការពិបាក ក្នុងការគ្រប់គ្រងដំណេីរការអាជីវកម្ម។ តាមរយៈប្រព័ន្ធ SECOS នឹងជួយដល់ម្ចាស់អាជីវកម្មអាចតាមដានរបាយការណ៍លក់ដូរប្រចាំថ្ងៃ បង្កើនប្រសិទ្ធភាពការគ្រប់គ្រងបុគ្គលិក ជាពិសេសវាជួយដល់ម្ចាស់អាជីវកម្មដែលមានមុខរបរច្រើនកន្លែង អាចតាមដានវាយតម្លៃការលក់ដូរបានពីគ្រប់ទីកន្លែង។

បើតាមស្ថាបនិកវ័យក្មេងរូបនេះបានឲ្យដឹងថា ប្រព័ន្ធ SECOS ក្រៅពីឲ្យម្ចាស់អាជីវកម្មអាចគ្រប់គ្រងដឹងពីលំហូរការលក់ដូរប្រចាំថ្ងៃយ៉ាងមានប្រសិទ្ធភាព វាក៏អាចជួយម្ចាស់អាជីវកម្មអាចស្វែងយល់ពីតម្រូវការរបស់អតិថិជន ដើម្បីអាចឆ្លើយតបបានទាន់ពេលវេលា។

មុនពេលប្រព័ន្ធ SECOS បង្កេីតលេចរូបរាងក៏ជួបបញ្ហាច្រើនដែរ និងមានការធ្វើតេស្តជាបន្តបន្ទាប់។ នេះបើតាមការលើកឡើងរបស់ស្ថាបនិករូបនេះ។

ណារីបានឲ្យដឹងថា មុនសម្រេចបង្កើតប្រព័ន្ធ SECOS ដំបូងក្រុមកញ្ញាចង់ធ្វើកម្មវិធីសម្រាប់បំពេញចំណូលចិត្តអ្នកចូលចិត្តដើរញាំ ដែលអាចធ្វើការណែនាំម្ហូបប្លែកៗ ប៉ុន្តែដោយសារមានភាពស្មុគស្មាញច្រើន ណាមួយត្រូវការការសហការពីហាងនានា ទើបសម្រេចប្តូរអភិវឌ្ឍប្រព័ន្ធ SECOS នេះវិញ។

ទោះបីប្រព័ន្ធ SECOS គ្រោងធ្វើតាំងពីឆ្នាំ ២០១៤ ប៉ុន្តែទើបតែចាប់ផ្ដើមធ្វើពេញដៃពេញជើងនៅឆ្នាំ ២០១៥។ ក្រោយមានការតេស្តនិងកែសម្រួលមួយចំនួន ទើបបានដាក់ឲ្យប្រើប្រាស់ជាផ្លូវការអំឡុងខែ តុលា ឆ្នាំ២០១៧ ។

បើតាមយុវតីរូបនេះ SECOS ផ្ដោតតែលើអាជីវកម្មខ្នាតតូច និងខ្នាតមធ្យមដែលមិនសូវមានថវិកាចំណាយច្រេីន។ គោលដៅថ្ងៃខាងមុខ កញ្ញាចង់អភិវឌ្ឍប្រព័ន្ធ SECOS ដែលធ្វើឲ្យម្ចាស់អាជីវកម្មនិងអតិថិជនអាចបង្កើតភាពដៃគូលេីការអភិវឌ្ឍជាមួយគ្នា៕