Xiaomi ប្រុងជះលុយទិញ GoPro ឆាប់ៗ
- 2018-04-13 08:00:18
- ចំនួនមតិ 0 | ចំនួនចែករំលែក 0
Xiaomi ប្រុងជះលុយទិញ GoPro ឆាប់ៗ
ចន្លោះមិនឃើញ
Xiaomi ជាក្រុមហ៊ុនផលិតស្មាតហ្វូនធំជាងគេក្នុងលោកលំដាប់ទី ៥។ ក្រៅពីស្មាតហ្វូន ក្រុមហ៊ុននេះក៏ផលិតកុំព្យូទ័រយួរដៃ, ឧបករណ៍តាមដានសុខភាព, នាឡិកាវៃឆ្លាត, សម្ភារៈគេហដ្ឋានវៃឆ្លាត, Drone និងផលិតផលដទៃទៀតជាច្រើន។ ការចេញផ្សាយថ្មីមួយពីសារព័ត៌មាន Bloomberg ឲ្យដឹងថាក្រុមហ៊ុនចិនមួយនេះកំពុងពិចារណាលើការទិញក្រុមហ៊ុន GoPro ទៀតផង។
GoPro បង្កើតឡើងដោយលោក Nick Woodman នៅក្នុងឆ្នាំ ២០០២ ដោយត្រូវបានគេស្គាល់ថាជាក្រុមហ៊ុនជំនាញលើការផលិតកាមេរ៉ាប្រភេទ Action។ យ៉ាងណាក្ដីក្រុមហ៊ុននេះបានជួបប្រទះនឹងបញ្ហាសេដ្ឋកិច្ចក្នុងរយៈពេលប៉ុន្មានឆ្នាំកន្លងមកនេះ។ នៅឆ្នាំ ២០១៦ ក្រុមហ៊ុននេះបានជម្រុះបុគ្គលិកអស់ជិត ៦០០ នាក់។ នៅខែកុម្ភៈឆ្នាំនេះ ក្រុមហ៊ុនក៏បានបោះបង់ចោលជំនួញផលិត Drone ផងដែរ។ លោក Woodman ក៏ធ្លាប់បានលើកឡើងពីបំណងលក់ក្រុមហ៊ុនកាលពីថ្មីៗនេះដែរ។
លោក Woodman បានលើកឡើងដូចនេះថា ៖ "ប្រសិនបើមានឱកាសបញ្ចូល GoPro ជាមួយក្រុមហ៊ុនធំដែលជួយដល់ជំនួញរបស់យើង និងផ្ដល់ការបណ្ដាក់ទុនដែលប្រសើរ...យើងនឹងស្វាគមន៍ឱកាសនេះ”។
ពេល GoPro ដាក់លក់ហ៊ុនជាសាធារណនៅឆ្នាំ ២០១៤ ក្រុមហ៊ុននេះមានតម្លៃជាង ១០ ពាន់លានដុល្លារ។ យ៉ាងណាក្ដីតម្លៃហ៊ុនរបស់ក្រុមហ៊ុននេះបានធ្លាក់ចុះអស់ប្រមាណ ៣៨% នៅឆ្នាំ ២០១៨ ហើយតម្លៃលើទីផ្សារនាពេលនេះមានត្រឹមប្រមាណ ៧០០ លានដុល្លារប៉ុណ្ណោះ។
មិនទាន់មានព័ត៌មានលម្អិតទាក់ទងនឹងការជួញដូររវាង GoPro និង Xiaomi នៅឡើយទេ។ ប៉ុន្តែគេជឿថា GoPro អាចនឹងលក់បានក្នុងតម្លៃខ្ទង់ ១ ពាន់លានដុល្លារ៕