ដៃវែង ជើងវែង ជាហេតុធ្វើឲ្យ លន បញ្ញា មានប្រៀបជាងដៃគូប្រកួតស្ទើរគ្រប់ពេល

2018-09-04 06:51:05
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ស្រករក្រោយ និងមានកាយសម្បទាវែងៗ លន បញ្ញា នៅពេលប្រកួតម្ដងៗហាក់មានប្រៀបខ្លាំងលើដៃគូប្រកួត ខណៈរាង្គកាយអំណោយផលនេះហើយ ធ្វើឲ្យជើងខ្លាំងរូបនេះបានឡើងពីមួយវគ្គទៅមួយវគ្គទៀតនៃពានរង្វាន់ TV5។

កីឡាករ លន បញ្ញា

កូនសិស្សលោកគ្រូ ធន់ សុភា ខាងលើបង្ហាញទម្រង់ប្រកួតនៅតែល្អ មិនថាការប្រកួតមិត្តភាព ឬប្រកួតជម្រុះដណ្ដើមពានរង្វាន់នាកន្លងមកក៏ដោយ។ ជាក់ស្ដែងការប្រកួតជាមួយអ្នកប្រដាល់ សេន កុសល កាលពីថ្ងៃសៅរ៍ប៉ុន្មានថ្ងៃមុននេះ គឺ បញ្ញា មិនសូវជាពិបាក រួមទាំងគ្រប់គ្រងការប្រកួតបានល្អទៀតផង។ ពោលឈរវ៉ៃឆ្ងាយបានល្អ ខណៈការដៃគូចង់តបតវិញក៏មិនសូវដល់នោះទេ។ ចំណែកស្នៀតបោះជង្គង់ បត់កែងស្ដាំ និងចាប់វ៉ៃជង្គង់ គឺល្អ និងបានពេញៗរហូតអាជ្ញាកណ្ដាលរាប់ សេន កុសល ម្ដងផងដែរនៅក្នុងដើមទឹកទី២។

លន បញ្ញា(ក្រហម)

បើតាមការឲ្យដឹងពីខ្លីពី លន បញ្ញា ប្រាប់ថា សេន កុសល ដែលជាដៃគូរូបនេះ ចំណុចខ្សោយនាការប្រកួតជាមួយខ្លួននោះ គឺមិនសូវចេះបិទ ប្រហែសឲ្យវ៉ៃចូលច្រើនពេករហូតដល់អស់ស៊ុហ្វមុនចប់ការប្រកួត៣ទឹកនេះទៅទៀត។

កីឡាករ លន បញ្ញា

រំលឹកដែរថា កីឡាករ លន បញ្ញា ជាកូនសិស្សលោកគ្រូ ធន់ សុភា មកពីសមាគមប្រដាល់ក្រសួងការពារជាតិ។ ជើងខ្លាំងរូបនេះបច្ចុប្បន្នមានកម្ពស់រហូតដល់ទៅ ១ម៉ែត្រ៧៨ ខណៈអាយុប្រហែល២០ឆ្នាំប៉ុណ្ណោះ។ ប្រកួតចុងក្រោយឈ្នះពិន្ទុ សេន កុសល នៅសង្វៀនប៉ុស្តិ៍លេខ៥ បានឡើងទៅជុំទី៣បន្តទៀតនៃពានរង្វាន់ទម្ងន់ ៦០គីឡូក្រាមផងដែរ៕

វីដេអូប្រកួត៖