iPhone X អាចត្រូវបិទមិនឲ្យចូលទឹកដីកូរ៉េខាងត្បូង ប៉ុន្តែប្រហែល Samsung ជួយបាន
- 2018-09-12 06:48:16
- ចំនួនមតិ 0 | ចំនួនចែករំលែក 0
iPhone X អាចត្រូវបិទមិនឲ្យចូលទឹកដីកូរ៉េខាងត្បូង ប៉ុន្តែប្រហែល Samsung ជួយបាន
ចន្លោះមិនឃើញ
iPhone X, 8, 8 Plus រួមទាំង iPad បួនម៉ូដែលទៀត កំពុងប្រឈមនឹងការហាមឃាត់មិនឲ្យនាំចូលទឹកដីប្រទេសកូរ៉េខាងត្បូង ដោយសារករណីល្មើសសិទ្ធប៉ាតង់មួយ។ សមត្ថកិច្ចកូរ៉េខាងត្បូងបាននិយាយថាមិនទាន់មានសេចក្ដីសម្រេចនៅឡើយទេ ប៉ុន្តែ Apple ទំនងជានឹងទទួលរងការពិន័យបែបនេះ។
យ៉ាងណាក្ដី Apple ប្រហែលជាអាចត្រូវ Samsung ដែលជាគូប្រជែង និងជាដៃគូពាណិជ្ជកម្ម ជួយសង្គ្រោះបានពីករណីមួយនេះ។
វិទ្យាស្ថានវិទ្យាសាស្ត្រនិងបច្ចេកវិទ្យារបស់កូរ៉េខាងត្បូង ហៅកាត់ថា KAIST បានអះអាងថាខ្លួនមានកាន់កាប់នូវប៉ាតង់ទាក់ទងនឹងទម្រង់បច្ចេកវិទ្យា Transistor ដែលប្រើប្រាស់លើបន្ទះឈីបស៊េរី A របស់ Apple។ ដូចនេះហើយ KAIST ក៏បានដាក់ពាក្យបណ្ដឹងចោទប្រកាន់ Apple ថាបានល្មើសប៉ាតង់របស់ខ្លួន។
ដោយឡែក Apple បានអះអាងដែរថាប៉ាតង់ដែល KAIST កំពុងកាន់កាប់គឺមិនត្រឹមត្រូវតាមច្បាប់នោះទេ ហើយនេះជាការអះអាងមួយដែល Samsung ឯកភាព។ គួរដឹងថា Samsung ក៏កំពុងតែមានរឿងក្ដីក្ដាំជាមួយនឹង KAIST លើបញ្ហាដូចគ្នានេះដែរ។
ក្រសួងពាណិជ្ជកម្ម ឧស្សាហកម្ម និងថាមពលរបស់កូរ៉េខាងត្បូង បាននិយាយថា ៖ "កំពុងធ្វើការស៊ើបអង្កេតពីការចោទប្រកាន់របស់ KAIST ដែលថា Apple រំលោភប៉ាតង់របស់ខ្លួន។ រយៈពេលនៃការស៊ើបអង្កេតបានអូសបន្លាយពីរលើកមកហើយ ហើយការកំណត់ចុងក្រោយទំនងជានឹងបានផលប្រយោជន៍ដល់ KAIST។ នេះមានន័យថាការនាំចូល iPhone X, 8, 8 Plus និង iPad បួនទៀតអាចនឹងត្រូវហាមឃាត់"។
ក្រសួងក៏បានបញ្ជាក់ដែរថាកំពុងយកចិត្តទុកដាក់លើវិវាទនៅក្នុងសហរដ្ឋអាមេរិក និងកូរ៉េខាងត្បូងដែលជាប់ទាក់ទងនឹងក្រុមហ៊ុន Samsung ទោះបីជាការស៊ើបអង្កេតនៅពេលនេះផ្ដោតសំខាន់លើ Apple ក្ដី។ "នេះក៏ព្រោះតែ Samsung បានបញ្ជូនភស្តុតាងដើម្បីបដិសេធពីវត្តមាននៃប៉ាតង់ (របស់ KAIST) ដែលអាចធ្វើឲ្យប៉ាតង់ក្លាយជាមោឃៈ”។ នេះជាការបកស្រាយបន្ថែមរបស់ក្រសួងខាងលើ។
ដូចនេះមានន័យថា ប្រសិនបើ Samsung ទទួលបានជ័យជម្នះលើការប្ដឹងផ្ដល់នេះ Apple ក៏អាចនឹងឈ្នះដូចគ្នា៕