ដៃគូរបស់ ពេជ្រ ម្ទេសខ្មាំង ជាជើងខ្លាំងលំដាប់លេខ១នៅមីយ៉ាន់ម៉ា

2018-09-20 06:42:01
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូប្រដាល់ល្បីឈ្មោះខាង MMA ហ៊ុន ច័ន្ទរាជ្យ ថាកីឡាករមីយ៉ាន់ម៉ា ជាដៃគូរបស់ ពេជ្រ ម្ទេសខ្មាំង ដែលនឹងត្រូវប្រកួតថ្ងៃទី២៩ ខែកញ្ញា ឆ្នាំ២០១៨ ខាងមុខនេះ ជាលំដាប់លេខ១របស់គេ លើប្រភេទទម្ងន់ ៥៧-៦០គីឡូក្រាម។

កីឡាករ ពេជ្រ ម្ទេសខ្មាំង

លោក ហ៊ុន ច័ន្ទរាជ្យ បានឲ្យដឹងថា កីឡាករមីយ៉ាន់ម៉ា ដែលនឹងត្រូវប៉ះ ពេជ្រ ម្ទេសខ្មាំង នោះគឺជាជើងខ្លាំងប្រទេសតែម្ដង។ គេធ្លាប់ឆ្លងកាត់ការប្រកួតធំៗជាច្រើន និងឈ្នះមេដាយ ក៏ដូចជាបានរង្វាន់មិនតិចនោះទេក្នុងប្រទេសរបស់គេ។ មិនត្រឹមតែប៉ុណ្ណេះទេ ជើងខ្លាំងទម្ងន់ស្រាលម្នាក់នោះ ក៏ធ្លាប់បង្ហាញខ្លួនក្នុងការក្បាច់ចម្រុះ One Championship ទៀតផង។

ពេជ្រ ម្ទេសខ្មាំង(ក្រហម)

គ្រូប្រដាល់វ័យ៣០ឆ្នាំជាងខាងលើបន្ថែមទៀតថា បើទោះជាកីឡាករមីយ៉ាន់ម៉ាមានសមត្ថភាពខ្លាំងបែបនេះក្ដី ប៉ុន្តែក៏មិនងាយយកឈ្នះ ពេជ្រ ម្ទេសខ្មាំង នោះដែរ ព្រោះកីឡាករកម្ពុជាគឺល្អកណ្ដាប់ដៃ វ៉ៃចេញលឿន កែងក៏ល្អ វ៉ៃឆ្លាត រួមទាំងមិននៅស្ងៀមឲ្យដៃគូចេះតែវ៉ៃនោះទេ។ លោកសង្ឃឹមថាកីឡាករកម្ពុជាខាងលើនឹងធ្វើបានល្អនាជំនួបមិត្តភាពអន្តរជាតិមួយនេះ។

កម្មវិធីនៅមីយ៉ាន់ម៉ា

រំលឹកដែរថា កីឡាករ ពេជ្រ ម្ទេសខ្មាំង នឹងត្រូវទៅចូលរួមប្រកួតក្នុងកម្មវិធី World Lethwei Championship(WLC) របស់ប្រទេសមីយ៉ាន់ម៉ា នាថ្ងៃទី២៩ ខែកញ្ញា ឆ្នាំ២០១៨ ដែលដឹកនាំដោយលោកគ្រូ ហ៊ុន ច័ន្ទរាជ្យ ក្លឹប Cambodian Tom Team៕

អត្ថបទ៖ នួន ស៊ីណា