កីឡាករសិង្ហបុរីសរសើរ វឌ្ឍនាកា ជាកីឡាករសម្បូរបច្ចេកទេស

2018-10-15 05:36:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករ S. Baharudin របស់សិង្ហបុរីបាននិយាយក្នុងសន្និសីទកាសែតមុននេះថា ចាន់ វឌ្ឍនាកា ជាកីឡាករល្អកម្រិតខ្ពស់របស់កម្ពុជា ហើយសម្បូរទៅដោយបច្ចេកទេស និងជាកីឡាករម្នាក់អាចបង្កគ្រោះថ្នាក់ដល់ក្រុមខ្លួនក្នុងការប្រកួតថ្ងៃស្អែកនេះ។

S. Baharudin

កីឡាករដែលធ្លាប់លេងនៅក្លឹប PAHANG ជាមួយ ចាន់ វឌ្ឍនាកា រូបនេះបានឲ្យដឹងថា កីឡាកររបស់កម្ពុជារូបនេះអាចយកឈ្នះទៅលើកីឡាករពីររូប ជាងនេះទៅទៀតគេអាចកែប្រែស្ថានភាពក្នុងក្រុមពីគ្មានអ្វីសោះមកក្លាយជាមានឱកាសល្អវិញបាន។ មែនទែនទៅកីឡាកររូបនេះក៏ជាមុខសញ្ញាគ្រោះថ្នាក់មួយសម្រាប់សិង្ហបុរីផងដែរ។

S. Baharudin បន្ថែមថា ទោះជា វឌ្ឍនាកា ល្អយ៉ាងណា ក៏ក្រុមរបស់គេមិនផ្ដោតសំខាន់ទៅលើកីឡាកររូបនេះពេកដែរ។ ពួកគេនឹងលេងទៅតាមផែនការ និងប្រឹងប្រែងលេងក្នុងការប្រកួតឲ្យបានល្អ។

ការប្រកួតស្អែកនឹងធ្វើឡើងវេលាម៉ោង ៦:៣០ នាទីនៅពហុកីឡដ្ឋានជាតិ ដែលជាការប្រកួតមិត្តភាពចុងក្រោយរបស់កម្ពុជា ក្នុងត្រៀមខ្លួនលេងពានរង្វាន់ AFF Suzuki Cup 2018 ដែលនឹងមកដល់នៅខែក្រោយនេះ៕