សឿយ វិសាល ៖ ខ្ញុំមានតែម្រាមដៃដប់ សូមបងប្អូនកុំទាន់អស់សង្ឃឹម

2018-10-17 02:22:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានក្រុមរបស់ជម្រើសជាតិកម្ពុជា សឿយ វិសាល កាលពីយប់មិញបានសម្ដែងការខកចិត្តយ៉ាងខ្លាំង ក្រោយកម្ពុជាចាញ់សិង្ហបុរី ២-១ ក្នុងការប្រកួតមិត្តភាពអន្តរជាតិនៅពហុកីឡដ្ឋានជាតិ។

សឿយ វិសាល លេខ៥

ក្រោយប្រកួតចប់ភ្លាម ខ្សែការពារកណ្ដាលមានបទពិសោធក្រាស់ក្រែលរូបនេះបាននិយាយថា ៖ «ខ្ញុំគ្មានអីនិយាយច្រើនទេបង។ ខ្ញុំមានតែម្រាមដៃដប់ សូមឲ្យបងប្អូនកុំទាន់អស់សង្ឃឹម។ យើងចាញ់ថ្ងៃនេះ តែយើងនៅមានឱកាសដើម្បីយកឈ្នះគេវិញនៅថ្ងៃក្រោយ»។

វិសាល បន្ថែមថា សម្រាប់ការប្រកួតដែលចាញ់ សិង្ហបុរី នេះគេមើលឃើញថា កីឡាករទាំងអស់បានប្រឹងប្រែងអស់សមត្ថភាពហើយ។ ចំណែកគ្រាប់បាល់ទី១ ដែលកើតឡើងនោះគឺដោយសារកីឡាករទាំងអស់ភ្លេចខ្លួនមួយពេល។ ខណៈគ្រាប់ទី២ ដែលនាំឲ្យកម្ពុជាចាញ់ មកពីកីឡាករប្រឹងប្រែងខ្លាំងពេកនៅវគ្គទី១ ទើបមានការហត់ខ្លាំងនៅវគ្គទី២។

ការប្រកួតមិត្តភាពបីប្រកួតកន្លងមកកម្ពុជាមិនទាន់ស្គាល់ជ័យជម្នះនៅឡើយ ពោលគឺចាញ់ម៉ាឡេស៊ី ៣-១ ស្មើ ទីម័រខាងកើត ២-២ និង ចាញ់សិង្ហបុរី ២-១។ ស្របពេលការប្រកួតផ្លូវការរបស់កម្ពុជាពានរង្វាន់ AFF Suzuki Cup 2018 នឹងមកដល់នៅថ្ងៃទី៨ ខែវិច្ឆិកា ឆ្នាំ២០១៨៕