គ្រូស្វាយរៀង មោទនភាពជាមួយកូនក្រុមដែលមិនចាញ់សោះជើងទី១

2019-07-01 02:39:17
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Conor Nestor គ្រូបង្វឹកក្រុមព្រះខ័នរាជស្វាយរៀង មានមោទនភាពចំពោះកូនក្រុមដែលលេងបានយ៉ាងល្អ និងអាចរក្សាកំណត់ត្រាមិនចាញ់សោះសម្រាប់ជើងទី១នៃលីគកំពូលកម្ពុជានេះ។

កាលពីយប់មិញ ក្រុមស្វាយរៀងលេងបានស្មើជាមួយក្រុមណាហ្គាវើល ក្នុងលទ្ធផល ០-០។ បើតាមលទ្ធផលនៃការប្រកួតនេះ គឺបញ្ជាក់ថាក្រុមស្វាយរៀងលេង១៣ប្រកួតជើងទី១នៃលីគកម្ពុជា មិនទាន់ចាញ់ទាល់តែសោះ ហើយក៏បានឈរនៅកំពូលតារាងដាច់ក្រុមលេខ២ ចំនួន៥ពិន្ទុផងដែរ។

ការធ្វើបានល្អជើងទី១នេះដែរ លោក Conor ដែលជាគ្រូបង្វឹកបានបង្ហាញអារម្មណ៍រីករាយជាមួយកូនក្រុម ក៏ដូចជាមានមោទនភាពសម្រាប់ពួកគេដែលខិតខំលេងផងដែរ។ ផ្ទុយទៅវិញ លោកក៏ចង់ឱ្យកីឡាករទាំងអស់ខំប្រឹងបន្ថែមទៀតសម្រាប់ជើងទី២ ព្រោះថាការលេងល្អជើងទី១ គឺមិនមែនមានន័យថាពួកគេទទួលបានជ័យជម្នះពានរង្វាន់នៅឡើយទេ។

ស្វាយរៀងឈរលេខ១កំពូលតារាង ដោយមាន៣៣ពិន្ទុ ឆ្លងកាត់១៣ប្រកួត ឈ្នះ១០ប្រកួត ស្មើ៣ប្រកួត។ ក្រុមលេខ២គឺណាហ្គាវើល មាន២៨ពិន្ទុ ឆ្លងកាត់១៣ប្រកួត ឈ្នះ៩ ស្មើ១ ចាញ់៣ប្រកួត៕