អ៊ីស្រាអែល និងប្រទេសផ្សេងទៀតប្រើបច្ចេកវិទ្យាបែបណា ដើម្បីប្រយុទ្ធនឹង COVID-19?
- 2020-03-24 06:55:33
- ចំនួនមតិ 0 | ចំនួនចែករំលែក 0
អ៊ីស្រាអែល និងប្រទេសផ្សេងទៀតប្រើបច្ចេកវិទ្យាបែបណា ដើម្បីប្រយុទ្ធនឹង COVID-19?
ចន្លោះមិនឃើញ
តាមការចុះផ្សាយរបស់វិបសាយ Top10VPN បានបង្ហាញអំពីតំបន់ចំនួន ១០ ដែលប្រើប្រាស់វិធីសាស្ត្រតាមដានទូរសព្ទរបស់ពលរដ្ឋ ដើម្បីជាការប្រយុទ្ធប្រឆាំងនឹងកូវីដ១៩។
១. ប្រទេសកូរ៉េខាងត្បូង
កូរ៉េខាងត្បូងជាអ្នកចាប់ផ្ដើមមុនគេក្នុងការប្រើប្រាស់វិធីសាស្ត្រចាប់ទីតាំងរបស់ពលរដ្ឋតាមរយៈទូរសព្ទរបស់ពួកគេ ដើម្បីបង្កើតជាកម្មវិធីផែនទីមួយសម្រាប់កូវីដ១៩។ ពលរដ្ឋនឹងទទួលបានសារជាដំណឹង នៅពេលឆ្ពោះទៅដល់ទីតាំងណាមួយដែលមានអ្នកឆ្លងកូវីដ១៩បានទៅដល់។ រដ្ឋាភិបាលកូរ៉េក៏នឹងផ្ញើសារជាបន្តបន្ទាប់ដល់ពលរដ្ឋ នៅពេលមានករណីឆ្លងថ្មី ដោយមានប្រាប់អំពីទីកន្លែងដែលអ្នកឆ្លងថ្មីបានទៅដល់ និងអ្នកដែលគេធ្លាប់មានទំនាក់ទំនងជាមួយទៀតផង។
កម្មវិធីផែនទីរបស់កូរ៉េគឺមានផ្ដល់ព័ត៌មានជាក់លាក់តែម្ដង ដូចជាការផ្ញើសារប្រាប់ថា "អ្នកផ្ទុកកូវីដ១៩ម្នាក់ បានមានវត្តមាននៅហាងខារ៉ាអូខេ Magic Coin នៅ Jayang-dong នៅពាក់កណ្ដាលយប់នាថ្ងៃទី ២០ ខែកុម្ភៈ" និង "មានស្ត្រីវ័យខ្ទង់ ៦០ ឆ្នាំម្នាក់បានតេស្តវិជ្ជមានកូវដី១៩។ ចុចលើតំណភ្ជាប់នេះដើម្បីមើលនូវទីតាំងដែលស្ត្រីរូបនេះធ្លាប់ទៅដល់ មុនត្រូវបញ្ជូនទៅមន្ទីរពេទ្យ” ជាដើម។
២. អ៊ីរ៉ង់
រដ្ឋាភិបាលអ៊ីរ៉ង់បានប្រើប្រាស់កម្មវិធីប្រមូលទិន្នន័យអំពីទីតាំងរបស់អ្នកប្រើប្រាស់ ដើម្បីទប់ស្កាត់ការផ្ទុះកូវីដ១៩។
នៅថ្ងៃទី ៣ ខែមីនា មានសារមួយត្រូវបានផ្ញើទៅពលរដ្ឋអ៊ីរ៉ង់រាប់លាននាក់ សុំឲ្យពួកគេដំឡើងកម្មវិធីឈ្មោះថា AC19 មុនទៅកាន់មន្ទីរពេទ្យ ឬមណ្ឌលសុខភាព។ កម្មវិធីនេះអាចឲ្យពួកគេដឹងថាខ្លួនទំនងជាមានឆ្លងកូវីដ១៩ឬអត់ តាមរយៈការសួរចំនួនមួយចំនួន ជាមួយចម្លើយ "មានឬគ្មាន"។ យ៉ាងណាក្ដីកម្មវិធីបានលុបចេញពី Google Play Store ដោយ Google លើកហេតុផលថាកម្មវិធីមានការអះអាងលើសពីការពិត។
៣. អ៊ីស្រាអែល
នៅថ្ងៃទី ១៧ ខែមីនា នាយករដ្ឋមន្ត្រីអ៊ីស្រាអែលលោក Benjamin Netanyahu បានអនុញ្ញាតឲ្យមានច្បាប់ដែលអាចឲ្យមន្ត្រីសុវត្ថិភាពអ៊ីស្រាអែលមានសិទ្ធត្រួតពិនិត្យទូរសព្ទរបស់ពលរដ្ឋ ដោយមិនបាច់មានដីកាតុលាការ។ ច្បាប់ថ្មីនេះក៏តម្រូវឲ្យទិន្នន័យទាំងអស់ដែលប្រមូលបាន ត្រូវលុបចេញក្រោយពេល ៣០ ថ្ងៃ។
មុនការអនុញ្ញាតនេះ លោកនាយករដ្ឋមន្រ្តីបានលើកឡើងពីផែនការក្នុងការប្រើប្រាស់បច្ចេកវិទ្យាតាមដានភេរវជនដែលអ៊ីស្រាអែលបានប្រើកន្លងមក មកធ្វើជាវិធីសាស្ត្រស្វែងរកទីតាំងមនុស្សដែលមានទំនាក់ទំនងជាមួយអ្នកដែលផ្ទុកកូវីដ១៩ ដើម្បីទប់ស្កាត់ការរាតត្បាត។
៤. សិង្ហបុរី
នៅថ្ងៃទី ២០ ខែមីនា ភ្នាក់ងារបច្ចេកវិទ្យានៃរដ្ឋាភិបាលសិង្ហបុរី និងក្រសួងសុខាភិបាល បានដំណើរការកម្មវិធីតាមដានមួយឈ្មោះ Trace Together។ ការចុះផ្សាយរបស់ Straits Times បានឲ្យដឹងថា កម្មវិធីនេះអាចឲ្យមន្ត្រីបានដឹងថានរណាខ្លះបានមានទំនាក់ទំនងស្និទ្ធស្នាលជាមួយអ្នកមានផ្ទុកកូវីដ១៩។
៥. តៃវ៉ាន់
តៃវ៉ាន់បានដំណើរការនូវរបងអេឡិចត្រូនិកបានលឿនបំផុត។ តាមរយៈការប្រើប្រាស់សេវាទូរសព្ទ អាចឲ្យសមត្ថកិច្ចបានដឹងនៅពេលមាននរណាម្នាក់ចេញពីផ្ទះ អំឡុងពេលដែលត្រូវស្ថិតនៅដាច់ដោយឡែក។
៦. អូទ្រីស
នាថ្ងៃទី ១៧ ខែមីនា អ្នកតំណាងក្រុមហ៊ុនផ្ដល់សេវាទូរសព្ទធំនៅអូទ្រីសគឺ Telekom Austria AG និយាយថាខ្លួននឹងចែករំលែកទីតាំងរបស់អ្នកប្រើប្រាស់ជាមួយរដ្ឋាភិបាល ដើម្បីប្រយុទ្ធប្រឆាំងការឆ្លងកូវដី១៩។
៧. បែលហ្សិក
រដ្ឋាភិបាលបែលហ្សិក បានប្រើប្រាស់ទិន្នន័យដែលបានពីក្រុមហ៊ុនទូរសព្ទក្នុងស្រុកតាំងពីថ្ងៃទី ១១ ខែមីនា ដើម្បីតាមដានពលរដ្ឋ ក្នុងការកាត់បន្ថយការឆ្លង និងគ្រប់គ្រងកូវីដ១៩។
៨. អាល្លឺម៉ង់
នៅថ្ងៃទី ១៨ ខែមីនា ក្រុមហ៊ុនផ្ដល់សេវាទូរគមនាគមន៍អាល្លឺម៉ង់ឈ្មោះ Deutsche Telekom និយាយថានឹងចែករំលែកទីតាំងអ្នកប្រើប្រាស់ជាមួយរដ្ឋាភិបាល។ អ្នកតំណាងក្រុមហ៊ុននិយាយថា ៖ "ជាមួយទិន្នន័យដែលមាន យើងអាចមើលអំពីដំណើររបស់ពលរដ្ឋទូទាំងប្រទេសបាន។”
៩. អ៊ីតាលី
អ៊ីតាលីរងការវាយប្រហារខ្លាំងជាងគេនៅពេលដែលកូវដី១៩ចាប់ផ្ដើមផ្ទុះ។ រដ្ឋាភិបាលក៏បានធ្វើការជាមួយភ្នាក់ងារផ្ដល់សេវាទូរគមនាគមន៍ដើម្បីតាមដានទីតាំងពលរដ្ឋផងដែរ។
១០. អង់គ្លេស
ត្បិតថាមិនមានការបញ្ជាក់ផ្លូវការនៅឡើយ ប៉ុន្តែរដ្ឋាភិបាលអង់គ្លេសកំពុងតែចរចាជាមួយក្រុមហ៊ុនផ្ដល់សេវាទូរគមនាគមន៍ធំៗដូចជា O2 និង EE ដើម្បីអាចប្រើប្រាស់ទិន្នន័យសម្រាប់តាមដានទីតាំងពលរដ្ឋ៕