បញ្ជាក់លក្ខខណ្ឌទិញខុនដូតម្លៃទាប សម្រាប់អ្នកមានចំណូលក្រោម៥០០ដុល្លារ

2017-12-25 00:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

គម្រោងអភិវឌ្ឍលំនៅឋានបែបខុនដូតម្លៃមធ្យមជាង ២ម៉ឺន ទៅ ៣ម៉ឺនដុល្លារ ដែលវាពិសេសសម្រាប់ប្រជាជនមានចំណូលទាប ៥០០ដុល្លារ អាចរស់នៅទីក្រុង។ សហស្ថាបនិកនៃគម្រោងក្រុមហ៊ុន Arakawa បានបញ្ជាក់ប្រាប់ថា លក្ខខណ្ឌនៃការទិញខុនដូតម្លៃទាប គឺមិនចាំបាច់បង់ប្រាក់កក់មុនទេ ប៉ុន្តែត្រូវបើកគណនីធនគារ រួចដាក់ប្រាក់សន្សំនៅក្នុងធនាគារនោះរយៈពេល៣ឆ្នាំ។ ក្រោយទទួលបានប្រាក់សន្សំប្រមាណ ៣០ ទៅ ៤០ភាគរយ នៃតម្លៃបន្ទប់ហើយ អតិថិជនត្រូវខ្ចីពីធនាគារបន្ថែម ដើម្បីបង្គ្រប់សម្រាប់ការទិញលំនៅឋាននេះ។

(រូបគម្រោងទាំងស្រុង)

លោក អៀង សុធារ៉ា សហស្ថាបនិកនៃលំនៅឋាន Arakawa ថ្លែងក្នុងសិក្ខាសាលាស្តីអំពីដំណើរការសាងសង់ និងនីតិវិធី ក្នុងការសន្សំប្រាក់ ដើម្បីទិញលំនៅឋាន Arakawa កាលពីថ្ងៃទី២៣ ខែធ្នូថា គោលបំណងនៃកម្មវិធីគឺ ដើម្បីពន្យល់ទូទៅពាក់ព័ន្ធនឹងលំនៅឋាន Arakawa ដូចជាឥទ្ធិពលផ្លូវច្បាប់នៃដីកម្មសិទ្ធិ ដែលពាក់ព័ន្ធដល់ម្ចាស់កម្មសិទ្ធិជំនាន់ក្រោយ រួមនឹងការពន្យល់ ពីការងារពាក់ព័ន្ធនឹងធនាគារ ដូចជានីតិវិធី នៃការបង់ប្រាក់ជាដើម។

លំនៅដ្ឋានខាងលើចែកជា ២ប្រភេទ ដោយទី១ មានផ្ទៃក្រឡា ២២.៦៧ម៉ែត្រការ៉េ មានបន្ទប់គេងមួយ និងទី២ មានផ្ទៃក្រឡា ៤៦.៤៧ម៉ែត្រការ៉េ មានបន្ទប់គេងពីរ។ លំនៅដ្ឋាននីមួយៗ មានចង្រ្កានបាយ បន្ទប់ទឹក ទីធ្លាខាងមុខ ដោយឡែកសម្ភារៈប្រើប្រាស់ក្នុងផ្ទះ ក្រុមហ៊ុននឹងផ្ដល់ជូនដូចជា បង្គន់អនាម័យ ចានឡាបូ(ចានលាងដៃ) និងជើងចង្ក្រាននៅផ្ទះបាយ ។ នៅពេលឆាប់ៗខាងមុខ ក្រុមហ៊ុននឹងបញ្ចប់ការសាងសង់លំនៅឋានគំរូ ដើម្បីឲ្យសាធារណៈជនចូលទស្សនា។ នេះបើយោងតាមការអះអាងរបស់ម្ចាស់គម្រោងខាងលើ។

(លោក អៀង សុធារ៉ា សហស្ថាបនិកនៃលំនៅឋាន Arakawa)

គួររំលឹកថាលំនៅឋាននេះ ជាប្រភេទអគារសហកម្មសិទ្ធិ សាងសង់លើផ្ទៃដីទំហំ ១៣ ៦៨០ម៉ែត្រក្រឡា ក្រោមទុនវិនិយោគប្រមាណ ៧០លានដុល្លារ។ លំនៅឋានបែបខុនដូនេះ ស្ថិតនៅភូមិផ្សារទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ (ក្រោយមន្ទីរពេទ្យ Royal Phnom Penh)៕

ចុចអានបន្ថែម

អត្ថបទ៖ ស៊ិន សាវ៉េត