IU និយាយពីមិត្តល្អ Jonghyun ពេលទទួលពានធំយប់មិញ ស្ដាប់ហើយអួលដើមក (វីដេអូ)

2018-01-11 02:11:16
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងរាងតូចច្រឡឹង IU បានឈ្នះពានរង្វាន់ដ៏ធំពីកម្មវិធី Golden Disk Awards ហើយឆ្លៀតក្នុងឱកាសនោះ នាងបានបង្ហាញចំណាប់អារម្មណ៍ទាក់ទងនឹងជ័យជម្នះនេះ ក៏ដូចជាការបាត់បង់មិត្តល្អម្នាក់ដែលទើបលាចាកលោកទៅកាលពីពេលថ្មីៗនេះគឺ Jonghyun។

ក្រោយពីបានពានធំ "Song Of The Year” យកឈ្នះតារាល្បីជាង ៣០រូបមាន Taeyang, Taeyeon, EXO, BTS, TWICE និងតារាជាច្រើនទៀតរួចមក IU បានឡើងថ្លែងអំណរគុណដល់អ្នកគាំទ្ររបស់ខ្លួនទាំងឡាយ។ ពេលនោះ នាងក៏បានបញ្ចេញពាក្យពេចន៍ខ្លះទាក់ទងនឹងការបាត់បង់មិត្តដ៏ល្អ Jonghyun ដែរ។ ខាងក្រោមនេះសម្ដីទាំងស្រុងរបស់ IU៖

“និយាយតាមត្រង់ ខ្ញុំពិតជាខ្លោចផ្សារណាស់ ខ្ញុំបានជូនដំណើរមិត្តដ៏ល្អម្នាក់របស់ខ្ញុំទៅទីដ៏សែនឆ្ងាយ។ ខ្ញុំគិតថា ខ្ញុំយល់បាន ថាហេតុអ្វីគាត់មានការឈឺចាប់ និងជួបឧបសគ្គច្រើនបែបនេះ។ វាមិនមែនជាអារម្មណ៍ដែលខ្ញុំមិនធ្លាប់ជួបនោះទេ។ ខ្ញុំនៅតែពិបាកចិត្ត ហើយក៏មានអារម្មណ៍ថាសោកស្ដាយ សុំទោសចំពោះគាត់ច្រើនដែរ។ ច្បាស់ណាស់ មិនមែនមានតែខ្ញុំទេដែល មានអារម្មណ៍មិនល្អ។ ប៉ុន្តែយើងជាមនុស្សដែលសុទ្ធតែមានការងាររវល់ ហើយតែងមានគម្រោងសម្រាប់ខែក្រោយ ឫឆ្នាំក្រោយៗទៀត។ ខ្ញុំមិនសប្បាយចិត្ត ហើយក៏អន់ចិត្តដែរ ដែលធាតុពិតនៅពីក្រោយយើង មិនអនុញ្ញាតឲ្យយើងរស់នៅជាមួយរឿងសោកសៅឲ្យបានយូរទៅតាមចិត្តចង់។ ការអបអរ ពេលយើងសប្បាយចិត្ត យំពេលពិបាកចិត្ត និងទន់ខ្សោយពេលឈឺ ខ្ញុំសង្ឃឹមថារឿងរ៉ាវធម្មជាតិទាំងនេះ អាចនឹងមានអ្នកយល់ច្បាស់ ដោយមិនចាំបាច់ប្រាប់ ជាពិសេសនឹងមានអ្នកឃើញពីការឈឺចាប់ទាំងនោះ ដូចនេះសូមកុំគិតច្រើន។ តារា គឺជាអ្នកដែលលួងលោម និងផ្ដល់កម្លាំងចិត្តដល់មនុស្សទាំងឡាយ ហើយខ្ញុំដឹងថា ពួកគេសុទ្ធតែជាអ្នកអាជីព ប៉ុន្តែខ្ញុំក៏សង្ឃឹមថា ពួកគេនឹងមើលថែខ្លួនឯងមុនសិនឲ្យបានល្អ ដូចអ្នកដទៃ ដូចនេះពួកគេមិនអាចចុះចាញ់ ឫឈឺចាប់អំឡុងពេលដែលពួកគេព្យាយាមលាក់រឿងពិបាកចិត្តបានទេ។ ខ្ញុំពិតជាជឿជាក់ថា រឿងមិនល្អនេះមិនកើតឡើងទៀត។ ខ្ញុំដឹងថា គ្រប់គ្នាមានការងាររវល់ខ្លាំងនាពេលនេះ ហើយពួកគេក៏មានរឿងជាច្រើនដែលត្រូវធ្វើនៅថ្ងៃស្អែក ប៉ុន្តែខ្ញុំសង្ឃឹមថាអ្នកដែលឈ្នះថ្ងៃនេះអាចរីករាយនៅថ្ងៃនេះ មុនចូលគេ ហើយវាក៏ជាអ្វីដែលខ្ញុំនឹងធ្វើដែរ។ អរគុណ!”

ទស្សនាវីដេអូខាងក្រោម៖

នេះជាពាក្យពេចន៍ដ៏មានន័យបំផុតរបស់ IU ទៅកាន់តារាៗទាំងអស់ មិនថាអ្នកជំនាន់មុន និងក្រោយនោះទេ។ ពិតណាស់ ក្នុងនាមជាតារា មិនមែនចេះតែសើចសប្បាយលើឆាក ឫមុខកាមេរ៉ានោះ ទេ ផ្ទុយមកវិញ ពួកគេតែងជួបប្រទះរឿងរ៉ាវឈឺចាប់ជាច្រើន ក្នុងជីវិត ដែលមិនអាចប្រាប់ពិភពលោកបាន៕

ប្រភព៖ Koreaboo ប្រែសម្រួល៖ យី សុធារី