៥យ៉ាង បញ្ជាក់ថាប្ដីជាអ្នកធ្វើការ ប្រពន្ធរកស៊ីនៅផ្ទះ ល្អជាងធ្វើការទាំងពីរនាក់

2018-02-02 02:45:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយរៀបការហើយ រឿងសំខាន់បំផុតសម្រាប់ជីវិតប្ដីប្រពន្ធ គឺខិតខំធ្វើការ រកស៊ីយ៉ាងម៉េចទើបគ្រួសារឆាប់រីកចម្រើន។ ខាងក្រោមនេះជាហេតុផលមួយចំនួនបញ្ជាក់ថា បើស្វាមីជាអ្នកធ្វើការ ចំណែកប្រពន្ធជាអ្នកគ្រប់គ្រងអាជីវកម្មខ្នាតតូចមួយ គឺជារឿងដ៏ល្អបំផុត អាចនាំឲ្យគ្រួសាររីកចម្រើនឆាប់រហ័ស។

១. ចំណូលគ្រួសារច្រើនជាងធ្វើការទាំងពីរនាក់ប្ដីប្រពន្ធ

លោក សេរី សុភា ជាអ្នកគ្រប់គ្រងជាន់ខ្ពស់ក្នុងក្រុមហ៊ុនឯកជនមួយលើកឡើងថា ជារឿងដ៏ល្អបំផុត ប្រសិនបើស្វាមីជាអ្នកធ្វើការ ចំណែកភរិយាមានអាជីវកម្មខ្នាតតូចមួយ នឹងធ្វើឲ្យគ្រួសាររីកចម្រើនឆាប់រហ័ស។ លោកនិយាយថា ប្ដីប្រពន្ធអាចបង្កើនប្រាក់សន្សំកាន់តែច្រើន ទាំងប្រាក់ខែ និងប្រាក់ចំណេញពីការរកស៊ី។ ប្រសិនបើធ្វើការទាំងពីរនាក់តែម្ដង អាចត្រឹមម៉ាគ្រប់គ្រាន់ តែមិនងាយសល់ឡើយ។

២. អាចជំនួសគ្នាបានមិនព្រួយរឿងលុយកាក់

មកដល់ចំណុចនេះ លោក សេរី សុភា ដដែលបន្តថា ប្រសិនបើថ្ងៃណាមួយភាគីណាម្នាក់មានបញ្ហា មិនថារឿងសុខភាពមិនអាចធ្វើការបាន ឬរកស៊ីមិនសូវកាក់កប ក៏មិនសូវព្រួយបារម្ភរឿងលុយកាក់ដែរ ព្រោះអាចជំនួសគ្នាបាន។ បើសិនខាងស្វាមី ចង់ឈប់សម្រាកពីការងារអាចមកជួយរកស៊ីភរិយាបាន ហើយបើថ្ងៃណាមួយអាជីវកម្មត្រូវការដើមទុនបន្ថែម អាចយកប្រាក់ខែទៅជួយទប់ទល់គ្នា។

៣. អាចគ្រប់គ្រងទ្រព្យសម្បត្តិលុយកាក់បានល្អ

ស្វាមីចេញទៅធ្វើការ ចំណែកភរិយានៅផ្ទះ អាចមើលការខុសត្រូវលើរបររកស៊ី និងគ្រប់គ្រងទ្រព្យសម្បត្តិលុយកាក់បាន។ បើធ្វើការទាំងពីរនាក់តែម្ដង ម្នាក់ៗរវល់ការងាររៀងខ្លួន មិនសូវបាននៅផ្ទះ ដឹងតែព្រលឹមចេញព្រលប់ចូល គ្មានពេលមើលការខុសត្រូវផ្ទះសម្បែងឡើយ ជួនកាលមួយខែមួយខួបមិនដែលបានប៉ះចង្ក្រានចានឆ្នាំងផង។ នេះបើតាមការលើកឡើងបន្ថែមទៀត ពីលោក សេរី សុភា។

៤. មានពេលវេលាមើលខុសត្រូវកូនៗបានច្រើន

បើធ្វើការទាំងពីរនាក់ប្ដីប្រពន្ធ ច្បាស់ណាស់ប្រាកដជាយកកូនផ្ញើឪពុកម្ដាយ។ ដូច្នេះគ្មានពេលវេលាឲ្យកូន មើលការខុសត្រូវឡើយ។ បើមានភរិយានៅផ្ទះ បើទោះជារវល់ការរកស៊ីយ៉ាងណាក៏ដោយ តែក៏អាចឆ្លៀតពេលខ្លះមើលខុសត្រូវកូនបានដែរ។

៥. អាចសម្រេចផែនការតាមលំដាប់លំដោយយ៉ាងរលូន

កាលណាប្រភពចំណូលកាន់តែច្រើន ប្ដីប្រពន្ធអាចសម្រេចផែនការដែលគ្រោងទុកតាមដំណាក់កាលបានយ៉ាងរលូនដូចជា៖ ផែនការទិញរថយន្តថ្មី សាងសង់ផ្ទះដ៏សមរម្យមួយ ឬគម្រោងដើរលេងក្រៅប្រទេសជាដើម៕

ចុចអាន៖

អត្ថបទ៖ វឌ្ឍនៈ