ក្រុងប៉ោយប៉ែតចំណាយជាង៥០ ម៉ឺនដុល្លារសាងសង់រង្វង់មូលថ្មី បង្អួតភ្ញៀវទេសចរ

2018-02-26 03:38:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីលើកកម្ពស់សោភណ្ឌភាព និង បង្អួតអត្តសញ្ញាណជាតិខ្មែរជូនភ្ញៀវអន្តរជាតិ រង្វង់មូលថ្មីមូលថ្មីដ៏ស្រស់ស្អាតនៅក្រុងប៉ោយប៉ែត ខេត្តបន្ទាយមានជ័យ បានបើកការដ្ឋានសាងសង់ហើយកាលពីថ្ងៃទី២៣ ខែកុម្ភៈ ឆ្នាំ២០១៨ នេះ។ រង្វង់ថ្មីនេះរំលេចដោយប្រាង្គប្រាសាទអង្គរវត្ត ប្រាសាទព្រះវិហារ បន្ទាយស្រី ដើមត្នោត ព្រមទាំងឈ្មោះរាជធានី នៃខេត្តទាំង២៥ របស់កម្ពុជា។

លោក សាន ស៊ានហូ អភិបាលក្រុងប៉ោយប៉ែត បានមានប្រសាសន៍ថា ការសាងសង់រង្វង់មូលធ្វើឡើង ដោយរំកិលប្រាសាទកំពូលបីពីក្លោងទ្វារមុខទីស្នាក់ការត្រួតពិនិត្យច្រកទ្វារព្រំដែនអន្តរជាតិចាស់ យកមកតម្កល់ ដោយរៀបចំគម្រោងប្លង់ទម្រប្រាសាទខាងលើបន្ថែមរចនាបទជាប្រាង្គប្រាសាទចំនួន ៥ថ្នាក់ ដោយថ្នាក់នីមួយៗតម្កល់រូបបដិមាផ្សេងៗ ទុកជាទីសក្ការតាមទំនៀមទម្លាប់ សាសនា និងរចនាបថស្ថាបត្យកម្មតាមប្រពៃណីខ្មែរយើង។

ការស្ថាបនាត្រូវចំណាយរយៈពេល៦ខែ ដោយធ្វើទាំងថ្ងៃទាំងយប់ និងប៉ាន់ប្រមាណក្នុងការចំណាយអស់ថវិកាប្រមាណ ៥០ម៉ឺនដុល្លារអាមេរិក។ «រង្វង់មូលនេះមានជើងក្រោមទំហំរហូតដល់ទៅ ៤០ម៉ែត្រ និងមានកម្ពស់ប្រមាណជា ២៣ម៉ែត្រ ហើយអ្វីដែលធ្វើឲ្យគេចាប់អារម្មណ៍នោះរង្វង់មូល ត្រូវបានយកកំពូលប្រាសាទនិមិត្តរូបនៃខ្លោងទ្វារចាស់មកដាក់ ហើយមានសាងសង់ប្រាសាទព្រះវិហារ និងប្រាសាទបន្ទាយស្រីធ្វើអំពីថ្មថែមទៀតផងដែរ»។

ច្រកទ្វារអន្តរជាតិក្រុងប៉ោយប៉ែត ដែលមានទីតាំងជាប់នឹងស្រុកអារញ្ញប្រាថេតរបស់ប្រទេសថៃ គឺជាច្រកដ៏សំខាន់មួយរបស់កម្ពុជា។ បច្ចុប្បន្នភាព ក្រៅពីការដោះដូរទំនិញ ច្រកមួយនេះបានដើរតួនាទីដ៏សំខាន់សម្រាប់ការចេញចូលរបស់អ្នកទេសចរអន្តរជាតិផងដែរ។

របាយការណ៍បានឱ្យដឹងថា អ្នកដំណើរចូលមកកម្ពុជាតាមច្រកប៉ោយប៉ែត មានជាង ៣ លាន ៣ ម៉ឺននាក់ ដែលចំនួននេះ មានការកើនឡើងជាង ៥៤ម៉ឺននាក់ ស្មើនឹង ២២,០៤% ដោយឡែកភ្ញៀវបរទេសមានជាង ៥១ម៉ឺននាក់ កើនឡើងជាងឆ្នាំមុនចំនួន ៨៩ ៧៦៤នាក់ ស្មើនឹង ២០,៩០%។ ចំណែកចំនួនអ្នកដំណើរចាកចេញពីកម្ពុជាតាមច្រកអន្តរជាតិប៉ោយប៉ែតមានជាង ៣លាន២ សែននាក់ ចំនួននេះមានការកើនឡើងជាងឆ្នាំមុន ៥៩ ៣៤៤០ នាក់ ស្មើ ២២,៦៩% ដោយឡែកភ្ញៀវបរទេសមានចំនួន ៥៣ ១៤០១ នាក់ កើនឡើងជាងឆ្នាំមុន ៨៨ ៤៤០នាក់ ស្មើនឹង ១៩,៩៧% និងមាន ១៥៣ សញ្ជាតិ៕

ចុចអាន៖

អត្ថបទ៖ សុផល

រូបថត៖ ផ្ដល់ឲ្យ