ឆ្នាំ២០១៧ អ្នកដំណើរឆ្លងកាត់ច្រកប៉ោយប៉ែតបានកើនឡើងរង្វង់ ២០%
- 2018-01-15 07:00:57
- ចំនួនមតិ 0 | ចំនួនចែករំលែក 0
ឆ្នាំ២០១៧ អ្នកដំណើរឆ្លងកាត់ច្រកប៉ោយប៉ែតបានកើនឡើងរង្វង់ ២០%
ចន្លោះមិនឃើញ
អ្នកដំណើរឆ្លងកាត់ច្រកព្រំដែនអន្តរជាតិប៉ោយប៉ែត ក្នុងនោះរាប់បញ្ចូលទាំងភ្ញៀវទេសចរជាតិ និងអន្តរជាតិនៅឆ្នាំ២០១៧ បានកើនឡើងរង្វង់២០% បើធៀបនឹងរយៈពេលដូចគ្នាកាលពីឆ្នាំ២០១៦ កន្លងមក។នេះបើយោងតាមរបាយការណ៍ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ។
ចុចអាន៖ ចំណូលពន្ធពីច្រកអន្តរជាតិប៉ោយប៉ែតឆ្នាំ ២០១៧ បានជាង ២២៦ លានដុល្លារ
របាយការណ៍បានឱ្យដឹងថា អ្នកដំណើរចូលមកកម្ពុជាតាមច្រកប៉ោយប៉ែត មានជាង ៣ លាន ៣ ម៉ឺននាក់ ដែលចំនួននេះមានការកើនឡើងជាង ៥៤ម៉ឺននាក់ ស្មើនឹង ២២,០៤% ដោយឡែកភ្ញៀវបរទេសមានជាង ៥១ម៉ឺននាក់ កើនឡើងជាងឆ្នាំមុនចំនួន ៨៩ ៧៦៤នាក់ ស្មើនឹង ២០,៩០%។
ចុចអាន៖ ប្រវត្តិចម្លាក់ប្រាសាទបន្ទាយឆ្មារ ជាប់ដានប្រវត្តិសាស្ត្រ តែគេមើលរំលង
ចំណែកចំនួនអ្នកដំណើរចាកចេញពីកម្ពុជាមានជាង ៣លាន២ សែននាក់ ចំនួននេះមានការកើនឡើងជាងឆ្នាំមុន ៥៩ ៣៤៤០ នាក់ ស្មើ ២២,៦៩% ដោយឡែកភ្ញៀវបរទេសមានចំនួន ៥៣ ១៤០១ នាក់ កើនឡើងជាងឆ្នាំមុន ៨៨ ៤៤០នាក់ ស្មើនឹង ១៩,៩៧% និងមាន ១៥៣ សញ្ជាតិ។
ពាក់ព័ន្ធទៅនឹងការកើនឡើងនេះ លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាចាត់ទុកថា នេះគឺជាសញ្ញាល្អមួយសម្រាប់វិស័យទេសចរកម្ពុជា ខណៈមួយឆ្នាំៗមានភ្ញៀវទេសចររង្វង់ ពី ៤៧% ទៅ ៤៨ % បានជ្រើសរើសការធ្វើដំណើរតាមដីគោក។
លោកថា បើគ្មានវិបត្តិកើតឡើងទេ លោកជឿថា ចំនួនភ្ញៀវឆ្លងកាត់ច្រកអន្តរជាតិប៉ោយប៉ែតក្នុងឆ្នាំ ២០១៨នេះ នឹងអាចមានការកើនឡើង។ វិបត្តិដែលអាចនឹងប្រឈមខ្លាំងចំពោះវិស័យទេសចរ រួមមាន វិបត្តិនយោបាយ វិបត្តិសេដ្ឋកិច្ចនៅក្នុងតំបន់ជាមួយនឹងពិភពលោក គ្រោះទុរភិក្ស ការបង្កបញ្ហាដោយក្រុមភេរវកម្ម និងប្រភេទជំងឺរាតត្បាតលើពិភពលោក។
«អញ្ចឹងបើគ្មានការគំរាមកំហែងទាំង ៥ហ្នឹងទេ គឺជាចំណុចល្អសម្រាប់វិស័យទេសចរណ៍ទាំងក្នុងតំបន់ និងលើពិភពលោក។ ជាទូទៅវិស័យទេសចរណ៍ត្រូវបានចាត់ទុកជាវិស័យនាំមុខមួយ បើវិស័យទេសចរដើរ វិស័យផ្សេងៗទៀតក៏ទៅជាមួយគ្នាដែរ»។ បន្ថែមលោក ហូ វណ្ឌី។
ចុចអាន៖ សេវាវេរលុយពេញនិយមសម្រាប់អ្នកនៅជាយដែន
លោក ហូ វណ្ឌី ឱ្យដឹងទៀតថា អាជ្ញាធរពាក់ព័ន្ធគួរយកចិត្តទុកចំពោះបញ្ហាបរិស្ថាន និងសណ្ដាប់ធ្នាប់នៅច្រកអន្តរជាតិ ប៉ោយប៉ែតឱ្យបានល្អប្រសើរ ដើម្បីបង្កលក្ខណៈ ងាយស្រួលដល់អ្នកដំណើរ។ “ខ្ញុំឃើញថា អាជ្ញាធរក្រុងចាប់ផ្តើមធ្វើហើយអ្នកដែលគ្មានសណ្ដាប់ធ្នាប់ល្អ អ្នកហ្នឹងហើយជាអ្នកធ្វើឱ្យមានរបាំងទេសចរណ៍មកកាន់កម្ពុជា ចំណុចបន្ទាប់គឺសំរាមពាសវាលពាសកាលត្រូវមានការចូលរួមអប់រំ និងបំផុសចលនាបរិស្ថានពីអាជ្ញាធរភូមិឃុំឱ្យបានសកម្មបន្ថែម”។
ចុចអាន៖ ដឹងទេថា អ្នកអូសរទេះនៅប៉ោយប៉ែតអាចអូសទម្ងន់ខ្ទង់តោនដោយកម្លាំងសុទ្ធសាធ?
ទោះយ៉ាងណាលោក សាន ស៊ានហូ អភិបាលក្រុងប៉ោយប៉ែត ដែលទើបឡើងកាន់តំណែងថ្មីៗនេះឱ្យដឹងថា ក្រុងកំពុងរៀបចំនូវហេដ្ឋារចនាសម្ព័ន្ធ ជាច្រើន ដើម្បីទាក់ទាញការធ្វើដំណើររបស់ភ្ញៀវទេសចរជាតិ និងអន្តរជាតិ ក្នុងនោះរាប់បញ្ចូលទាំងការកសាងអគារទីស្នាក់ការច្រកទ្វារព្រំដែនអន្តរជាតិប៉ោយប៉ែត ដែលគ្រោងនឹងបញ្ចប់ការសាងសង់នៅឆ្នាំ២០១៩ ខាងមុខ។
បន្ថែមលើនេះ ចាប់ពីថ្ងៃទី ១៥ ខែមករា ឆ្នាំ២០១៨ តទៅសាលាក្រុងនឹងលុបបំបាត់ឱ្យខានតែបានចំពោះរថយន្តចតនៅរង្វង់មូល និងការប្រើប្រាស់ចិញ្ចើមផ្លូវដើម្បីឈប់សំចតដាក់ភ្ញៀវ ដែលនាំឱ្យមានការកកស្ទះ និងការរអ៊ូរទាំពីសំណាក់ភ្ញៀវនាពេលកន្លងមក។ ម្យ៉ាងបញ្ហាសណ្ដាប់ធ្នាក់ការលក់ដូរនៅត្រង់ចំណុចក្បាលស្ពានក៏ត្រូវធ្វើការកែសម្រួលផងដែរ។
សាលាក្រុងប៉ោយប៉ែតកំពុងរៀបចំសាងសង់ស្ពានមួយបន្ថែមនៅច្រកអន្តរជាតិប៉ោយប៉ែត ដើម្បីអាចឱ្យកម្មករអូសរទេះជញ្ជូនទំនិញបានស្រួល និងមិនរាំងស្ទះដល់អ្នកដំណើរផ្សេងទៀត។ “អញ្ចឹងអ្វីៗយើងមានគម្រោងអស់ហើយ… យើងនិយាយយើងធ្វើ ហើយខ្ញុំសង្ឃឹមថា មុនបុណ្យចូលឆ្នាំខ្មែរក្រុងប៉ោយប៉ែតនឹងផ្លាស់ប្តូរមុខមាត់មួយកម្រិត”។ លោក សាន ស៊ានហូ បន្ថែម។
ចុចអាន៖ ភ្នំជញ្ជាំង រមណីយដ្ឋានធម្មជាតិ អាចមើលទេសភាពពេញមួយខេត្តបន្ទាយមានជ័យ
កម្ពុជាមានច្រកដីគោកចំនួនពីរដែលភ្ញៀវទេសចឆ្លងកាត់កើនឡើងជារៀងរាល់ឆ្នាំនោះ គឺច្រកអន្តរជាតិប៉ោយប៉ែតខេត្តបន្ទាយមានជ័យ និងច្រកបាវិតខេត្តស្វាយរៀង។ យោងតាមរបាយការណ៍ក្រសួងទេសចរណ៍ ក្នុងឆ្នាំ២០១៧ កម្ពុជាទទួលបានភ្ញៀវទេសចរសរុបជាង ៥ លាន ៦ សែននាក់៕