អ្នកថតរូបសត្វល្អិត ប្ដឹងក្រុមហ៊ុនសម្លាប់សត្វល្អិតទារសំណង ២,៧ លានដុល្លារ

2018-03-24 04:16:39
ចំនួនមតិ 0 | ចំនួនចែករំលែក 0

ចន្លោះមិនឃើញ

Alex Wild អ្នកថតរូបសត្វល្អិតល្បីឈ្មោះមួយរូប បានដាក់ពាក្យប្ដឹងក្រុមហ៊ុនសម្លាប់សត្វល្អិត Innova Supply ដែលបានយករូបភាពរបស់លោកប្រើប្រាស់ដោយគ្មានការអនុញ្ញាត ដោយទាមទារសំណងជំងឺចិត្ត ២,៧ លានដុល្លារ។

ថ្វីដៃរបស់អ្នកថតរូបខាងលើធ្លាប់បានបង្ហាញមុខលើទូរទស្សន៍ល្បីដូចជា National Geographic ជាដើម។ លោកអនុញ្ញាតឲ្យសាលារៀន ឬ អង្គការមិនរកប្រាក់ចំណេញ ប្រើប្រាស់រូបភាពរបស់ខ្លួនដោយឥតគិតថ្លៃ ឬ បញ្ចុះតម្លៃពិសេសជូន ប៉ុន្តែចំពោះក្រុមហ៊ុនរកប្រាក់កម្រៃគឺលោកតឹងតែងបន្តិចហើយ។

Alex បាននិយាយថា គេប្រទះឃើញក្រុមហ៊ុនសម្លាប់សត្វល្អិតប្រើប្រាស់រូបភាពរបស់គេចំនួន ១០ សន្លឹកដោយគ្មានការអនុញ្ញាត និងបានឲ្យមេធាវីផ្ញើលិខិតព្រមានទៅក្រុមហ៊ុននៅខែកុម្ភៈ ឆ្នាំ ២០១៧។ លិខិតទីមួយមិនមានការអើពើពីសំណាក់ក្រុមហ៊ុន Alex ក៏បានឲ្យមេធាវីផ្ញើលិខិតទីពីរនៅខែបន្ទាប់។

រូបភាពរបស់ Alex ដែលគេយកទៅប្រើ

លោក Zach Colander នាយកប្រតិបត្តិក្រុមហ៊ុនសម្លាប់សត្វល្អិត Innova Supply បានឆ្លើយតបនឹងលិខិតទីពីរ ដោយសន្យាថានឹងលុបរូបភាពទាំង ១០ សន្លឹករបស់ Alex ចេញពីវិបសាយរបស់ខ្លួន។ ប៉ុន្តែពេល Alex ចូលមើលវិបសាយរបស់ក្រុមហ៊ុននេះ នៅខែមករា ឆ្នាំ ២០១៨ គេសង្កេតឃើញថារូបភាពរបស់ខ្លួននៅមានលើវិបសាយដដែល។ បន្ថែមពីនេះ មានរូបភាពថ្មី ៨ សន្លឹកថែមទៀត ត្រូវបានក្រុមហ៊ុនយកប្រើដោយគ្មានការសុំសិទ្ធ។