មកស្គាល់កូនខ្មែរ៣រូប មានសមត្ថភាពធ្វើការក្នុងស្ថាប័នលំដាប់កំពូលៗរបស់ពិភពលោក

2018-03-27 08:02:13
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនថាយុវជននៅកម្ពុជា ក៏ដូចជាយុវជននៅប្រទេសផ្សេងទៀត តែងប្រាថ្នាចង់ធ្វើការក្នុងស្ថាប័នល្បីៗក្នុងពិភពលោក ប៉ុន្តែវាមិនមែនជារឿងងាយស្រួលឡើយ។ ថ្ងៃនេះ Sabay សូមបង្ហាញកូនខ្មែរ៣រូបដែលមានសមត្ថភាពមិនធម្មតា អាចហក់ចូលក្នុងតំណែងកំពូលៗ នៅស្ថាប័នអន្តរជាតិដូចខាងក្រោមនេះ៖

១. លោកបណ្ឌិត ឆាយ ហុកផេង

លោកបានបញ្ចប់បរិញ្ញាបត្រច្បាប់ពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចក្នុងឆ្នាំ១៩៧៤។ ក្នុងសម័យកាលដែលប្រទេសកម្ពុជា កំពុងស្ថិតក្នុងរបបកម្ពុជាប្រជាធិបតេយ្យ លោកបណ្ឌិតបានបន្តការសិក្សានៅប្រទេសបារាំង ថ្នាក់អនុបណ្ឌិតច្បាប់អន្តរជាតិ ហើយក៏ទទួលបានជោគជ័យដ៏ត្រចះត្រចង់ក្នុងឆ្នាំ១៩៧៦។ នៅប្រទេសបារាំងដដែល លោកបណ្ឌិត ឆាយ ហុកផេង ក៏បានបញ្ចប់ការសិក្សាបណ្ឌិតច្បាប់ថ្នាក់រដ្ឋ ពីសាកលវិទ្យាល័យ ស៊របោន (SORBONNE) ក្រុងប៉ារីស ក្នុងឆ្នាំ១៩៨០។

កូនខ្មែរមានដើមកំណើតនៅខេត្តកណ្ដាលរូបនេះ ធ្លាប់បម្រើការងារក្នុងអគ្គនាយកដ្ឋានផ្នែកហិរញ្ញវត្ថុ និងសេដ្ឋកិច្ចសង្គម នៅប្រទេសបារាំងដោយគ្រប់គ្រងលើបុគ្គលិកចំនួន ៥២០ នាក់ ពីឆ្នាំ១៩៨១ ដល់ឆ្នាំ១៩៩០។ បន្ទាប់មកពីឆ្នាំ១៩៩០ ដល់ ឆ្នាំ១៩៩៣ លោកបានបម្រើការងារជាអធិការត្រួតពិនិត្យនៅក្រសួងហិរញ្ញវត្ថុបារាំង។

ក្រោយមកទៀត លោកបានចូលសិក្សានៅសាលាជាតិចៅក្រមបារាំង។ ជាឱកាសដ៏ល្អ លោកបានវិវត្តន៍ខ្លួន ជាចៅក្រមស៊ើបអង្កេត ពីឆ្នាំ១៩៩៦ ដល់ ឆ្នាំ១៩៩៨។ ពីឆ្នាំ១៩៩៨ រហូតដល់ឆ្នាំ២០០៥ លោកបណ្ឌិតក៏ក្លាយជាប្រធានតុលាការព្រហ្មទណ្ឌ(៥០%) និងជាចៅក្រមផ្នែករដ្ឋប្បវេណីផ្សេងៗផង ដូចជាក្នុងវិស័យ៖ សំណងជំងឺចិត្តដល់ជនរងគ្រោះ - សហគ្រាស និងក្រុមហ៊ុនក្ស័យធន - ធានារ៉ាប់រង- សាងសង់អាគារ - កិច្ចសន្យាខ្ចីប្រាក់ - សិទ្ធិជនបរទេស។ ពីឆ្នាំ២០០៥ ដល់បច្ចុប្បន្ន ជាប្រធានតុលាការព្រហ្មទណ្ឌបារាំង (១០០%)។

ចាប់ពីឆ្នាំ១៩៩៦ ដល់បច្ចុប្បន្ន សកម្មភាពក្រៅពីការកាត់ក្ដី គឺនៅពេលបោះឆ្នោតជ្រើសរើសប្រធានាធិបតី និងតំណាងរាស្ត្រ តំណាងស្រុក ជាអាទិ៍ លោកបណ្ឌិតគឺជាប្រធានគណៈកម្មការត្រួតពិនិត្យ និងជាតំណាងក្រុមប្រឹក្សាធម្មនុញ្ញ ចុះសង្កេតការណ៍តាមការិយាល័យបោះឆ្នោត ឃុំ-ស្រុក។

២. យុវជនមកពីខេត្តបាត់ដំបង គិត ពិនវិជ័យវិសេស ក្លាយជា Director of IT នៅឌូបៃ

ការខិតខំប្រឹងប្រែងពីជំនួយការ IT កាន់ Internet Cafe ផ្នែក Network ពីខ្មែរ រហូតក្លាយជាបុគ្គលិកឆ្នើម ទទួលបានការកោតសរសើរ ដំឡើងតួនាទីច្រើនដង រហូតដល់កៅអី "អគ្គនាយកព័ត៌មានវិទ្យា" នៅបរទេស ពិតជារឿងមិនងាយស្រួលប៉ុន្មានទេ។

ឱកាស សមត្ថភាព បូកផ្សំការសម្រប និងការវិវឌ្ឍន៍ខ្លួន បានរុញច្រានឲ្យយុវជនមកពីខេត្តបាត់ដំបង គិត ពិនវិជ័យវិសេស ក្លាយជាបុគ្គលគំរូ និងជោគជ័យម្នាក់ពីកម្ពុជានៅដែនដីសេដ្ឋប្រេង។ តួនាទីជា Director of IT របស់ វិសេស បច្ចុប្បន្ននេះ ស្ថិតនៅក្រុមហ៊ុនដ៏ធំមួយ ដែលបម្រើសេវាកម្មខាងសណ្ឋាគារ មានរាប់ពាន់បន្ទប់ មានឈ្មោះថា Madinat Jumeirah Resort ស្ថិតនៅក្រុង ឌូបៃ ប្រទេសអារ៉ាប់រួម។ សូមចុចអានលម្អិតត្រង់នេះ៖ អ្នកបាត់ដំបងមួយរូប ចំណាយពេលជាង ១០ឆ្នាំ ក្លាយជាជើងខ្លាំង IT នៅឌូបៃ

៣. លោក យី សុជាតិ កំពុងធ្វើការនៅក្រុមហ៊ុនធំលើលោក

គ្រាន់តែលឺឈ្មោះ Microsoft,Startup,Facebook,Google ដែលសុទ្ធតែជាក្រុមហ៊ុនធំៗ របស់សហរដ្ឋអាមេរិក ហើយអ្នកណាៗក៏ចង់ទៅធ្វើការនៅក្រុមហ៊ុនទាំងនោះដែរ។ បុគ្គលិកដែលធ្វើការនៅទីនោះ គឺមានចំណូលខ្ទង់ម៉ឺនសែនដុល្លារក្នុង១ឆ្នាំៗ ទៅតាមតួនាទី។ អ្នកខ្លះគិតថាបែបមានតែបុគ្គលិកបរទេសខ្លាំងៗមកពីប្រទេសរីកចម្រើនខ្លាំងទេ ទើបអាចទៅធ្វើការទីនោះកើត។ មិនដូច្នេះទេតាមការពិតទៅ គឺមានខ្មែរយើង១រូបដែរ ដែលអាចឈានជើងចូលក្រុមហ៊ុនលំដាប់ពិភពលោក។

លោក យី សុជាតិ ពាក់អាវក្រឡា

មានបទពិសោធន៍ការងារ និងសមត្ថភាពមិនធម្មតារយៈពេល៩ឆ្នាំ គឺធ្វើការនៅតាមបណ្ដាក្រុមហ៊ុនយក្សធំៗ របស់សហរដ្ឋអាមេរិកនោះ គឺលោក យី សុជាតិ វិស្វករខ្មែរដំបូងគេដែលបានធ្វើការនៅក្នុងក្រុមហ៊ុនMicrosoft កាន់តួនាទីជាទីប្រឹក្សាជាន់ខ្ពស់មួយរូប។

លោកបានបញ្ចប់ការសិក្សាពីសកលវិទ្យាល័យ Maharashi University of Managemnet របស់អាមេរិក។វិស្វករខ្មែររូបនេះមានជំនាញពិសេសផ្នែក Softwear ដូច្នេះបច្ចុប្បន្ននេះលោកក៏បន្តធ្វើការជាអ្នកទទួលបន្ទុកWeb Application នៃក្រុមហ៊ុនធំ១ទៀតគឺ Startupនៅសហរដ្ឋអាមេរិច។ លោកមានការចែករំលែកបទពិសោធ៥ចំណុច ទៅកាន់អ្នកទាំងអស់គ្នា ដែលចង់មានទទួលឱកាសការងារល្អនៅបរទេសពិសេសសហរដ្ឋអាមេរិក។

១.មូលដ្ឋានគ្រឹះកុំព្យូទ័រច្បាស់លាស់

២.ភាពឆ្លាតវៃនិងឆ្នៃប្រឌិតក្នុងការដោះស្រាយបញ្ហា

៣.ការសរសេរកូដកុំព្យូទ័រគឺថ្មីជានិច្ច

៤.ទំនាក់ទំនងល្អនិងមានប្រសិទ្ធភាពបំផុត

៥.អត្តចរិតផ្ទាល់ខ្លួនពិសេសបំផុត។

អត្ថបទ៖ វឌ្ឍនៈ