ទម្រង់ភូមិខ្លះនៅខេត្តភាគឦសានប្រទេសកម្ពុជា មានប្រវត្តិតាំងពីរាប់ពាន់ឆ្នាំមុនគ្រិស្តសករាជ

2018-04-03 06:14:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ជនជាតិដើមភាគតិចរស់នៅភាគឦសានប្រទេសកម្ពុជារហូតមកដល់បច្ចុប្បន្ននេះនៅមានបន្តអនុវត្តសង់លំនៅដ្ឋានជាល្ខណៈភូមិមូលនៅឡើយ។ នេះបើតាមការចុះផ្សាយរបស់មន្ទីរសាធារណការខេត្តរតនគិរី។

(រូបភាព៖ មន្ទីរសាធារណការខេត្តរតនគិរី)

ប្រភពខាងលើបានចុះផ្សាយនៅទំព័រហ្វេសសប៊ុករបស់ខ្លួននៅព្រឹកនេះថានៅខេត្តរតនគិរី មណ្ឌលគិរី និងស្ទឹងត្រែងជាដើមនោះ ជនជាតិដើមភាគតិចនៅមានបង្កើតភូមិរាងមូលនៅឡើយ។

ដោយភ្ជាប់ជាមួយនឹងរូបភាពផងប្រភពដដែលសរសេរថា៖ «នេះជាគំរូបង្ហាញអំពីភូមិបងប្អូនជនជាតិដើមភាគតិចពីបុរាណ ហើយបច្ចុប្បន្ននៅមានភូមិមួយចំនួននៅខេត្តប៉ែកឦសានភាគច្រើននៅខេត្តរតនគិរី មណ្ឌលគិរី និងស្ទឹងត្រែង ដែលរក្សាបាននូវសណ្ឋានប្រហាក់ប្រហែលនេះ ច្រើនផងដែរ»។

(រូបភាព៖ មន្ទីរសាធារណការខេត្តរតនគិរី)

សាស្ត្រាចារ្យផ្នែកបុរាណវិទ្យា និងជាអគ្គនាយករងវិទ្យាស្ថានវប្បធម៌ និងវិចិត្រសិល្បៈ នៃរាជបណ្ឌិត្យសភាកម្ពុជា លោក បណ្ឌិត ធុយ ចាន់ធួន ឲ្យដឹងដែរថាភូមិមូលនេះអ្នកស្រាវជ្រាវកម្ពុជារកឃើញថាមាននៅលើទឹកដីកម្ពុជាតាំងពី២ ៥០០ឆ្នាំមុនគ.ស ហើយអ្នកស្រុកខ្មែរយើងហៅថា «បន្ទាយគូ»។

(រូបភាព៖ មន្ទីរសាធារណការខេត្តរតនគិរី)

លោកសាស្រ្តាចារ្យឲ្យដឹងថាភស្តុតាងដែលអ្នកស្រាវជ្រាវបានរកឃើញមាននៅស្រុកមេមត់ ខេត្តត្បូងឃ្មុំ និង ស្រុកស្នូល ខេត្តក្រចេះជាដើម។ លោកពន្យល់ថាអ្នកភូមិបានសង់ភូមិជារាងមូលដោយមានធ្វើកំពែងព័ន្ធជុំវិញ ហើយទុកច្រកចេញចំនួនពីរ គឺមួយសម្រាប់ទៅប្រភពទឹក និងមួយទៀតសម្រាប់ទៅកាន់ចម្ការ។

លោកសាស្រ្តាចារ្យបន្តថា៖ «មនុស្សរស់នៅក្នុងបន្ទាយគូ ក្នុងភូមិមានរាងមូលហ្នឹង នៅលើទឹកដីខ្មែរយើងហ្នឹង...ភូមិហ្នឹងសព្វថ្ងៃគាត់លែងលើកកំពែងពីដីទៀតហើយ គាត់លើករបងពីឫស្សី ពីឈើព័ទ្ធជុំវិញតែម្តង គាត់រស់នៅក្នុងភូមិហ្នឹងជាមួយគ្នា អ៊ីចឹងមានន័យថាអរិយធម៌ ហ្នឹងគំនិតហ្នឹងបន្តរស់នៅជាមួយគ្នារហូតមកដល់សព្វថ្ងៃ ប៉ុន្តែឲ្យដូចទៅនឹងសម័យដើមអត់ទេ តែមានគំនិត និងមូលដ្ឋានដូចសព្វថ្ងៃ»៕