បើអ្នកទម្លាប់បើកឡានទៅធ្វើការរាល់ថ្ងៃ អានអត្ថបទនេះហើយ គួរគិតគូរឡើងវិញ

2018-04-06 02:26:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ឥរិយាបថថ្មីមួយសម្រាប់អ្នកធ្វើការនៅទីក្រុងបច្ចុប្បន្ន គឺងាកមកប្រើប្រាស់រថយន្ត។ ក្រៅពីប្រើប្រាស់សម្រាប់ការរស់នៅប្រចាំថ្ងៃ ជារឿយៗក៏ឃើញមានការប្រើប្រាស់ជាប្រចាំសម្រាប់ធ្វើដំណើរមកកន្លែងធ្វើការ។ ក្រៅពីគុណសម្បត្តិរាប់មិនអស់តាំងពីអាចការពារពន្លឺថ្ងៃ ភ្លៀង និងផ្តល់ផាសុកភាពក្នុងការធ្វើដំណើរ តែក៏មានចំណុចអវិជ្ជមានដែលគួរសិក្សាឡើងវិញ។

១) ពិបាករកកន្លែងចត

លើកលែងតែក្រុមហ៊ុនអ្នកមានកន្លែងសម្រាប់ដាក់រថយន្ត បើមិនដូច្នេះអ្នកត្រូវរកកន្លែងចត អាចឆ្ងាយពីក្រុមហ៊ុនអ្នកធ្វើការ ហើយពេលខ្លះត្រូវបង់ប្រាក់ថែមទៀតផង។

២) ការកកស្ទះចរាចរណ៍

ពេលថ្ងៃធ្វើការ (ជាធម្មតា ច័ន្ទ ដល់ សុក្រ) ទាំងពេលព្រឹក និងពេលល្ងាច ជាពេលស្ទះចរាចរណ៍បំផុតដោយសារមានរថយន្តធ្វើដំណើរច្រើន ដែលអាចឲ្យអ្នកខកខានពេលវេលាសំខាន់។

៣) ប៉ះពាល់ដល់សុខភាព

ការស្ទះចរាចរណ៍ ពិតណាស់ចង់មិនចង់នឹងធ្វើឲ្យអ្នកមានអារម្មណ៍ធុញទ្រាន់ ហើយបើពេលកៀកម៉ោងធ្វើការទៀត កាន់តែតឹងតែងអារម្មណ៍ ស្រួលមិនស្រួលជាន់យកៗទៀត ដែលអាចបង្កគ្រោះថ្នាក់ដល់ខ្លួនឯង និងអ្នកដទៃ សម្រាប់អ្នកមិនសូវមានភាពអត់ធ្មត់។ ការបើកបរដោយមានអារម្មណ៍តឹងតែង អាចបណ្ដាលឲ្យសម្ពាធឈាមឡើងខ្ពស់ និងបង្កើនល្បឿនចង្វាក់បេះដូង ព្រមទាំងមានកម្រិត ៦% ចូលរួមចំណែកធ្វើឲ្យអ្នកធាត់។ ម្យ៉ាងវិញទៀត ក៏ប៉ះពាល់ដល់ប្រសិទ្ធភាពការងារ និងទំនាក់ទំនងផងដែរ។

៤) ចំណាយថវិកាច្រើន

អ្នកត្រូវចំណាយច្រើនលើសាំង (តាមកម្រិតម៉ាស៊ីន និងបច្ចេកវិទ្យារបស់រថយន្ត), កន្លែងចត (បើក្រុមហ៊ុនមិនមានកន្លែងទំនេរ) ព្រមទាំងការថែទាំ។ ធម្មតាអ្នកប្រហែលជាដឹង ត្បិតមើលទៅអ្នកចំណាយតែលើសាំង និងកន្លែងចត តែរថយន្តបើកបរលើផ្លូវ គ្រឿងសមាសធាតុខាងក្នុងក៏ត្រូវបានប្រើប្រាស់ ដែលអាចឈានដល់ការផ្លាស់ប្ដូរ ឬជួសជុល៕

--> Sabay ត្រូវការរើស Accounting Manager ។ បើមានចំណាប់អារម្មណ៍ដាក់ CV មក hr@sabay.com ឬចូលទៅកាន់ https://goo.gl/AsCd4N