គ្រូភ្នំពេញក្រោន ពេញចិត្តទម្រង់លេងកូនក្រុម ទោះចាញ់ណាហ្គា

2018-04-09 03:23:23
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Sainsbury គ្រូបង្វឹកក្រុមបាល់ទាត់ភ្នំពេញក្រោន ពេញចិត្តចំពោះចង្វាក់លេងរបស់កូនក្រុមខ្លួន បើទោះជាមិនអាចយកជ័យជម្នះលើក្រុមណាហ្គាវើលក៏ដោយ។

លីគកំពូលកម្ពុជាសប្ដាហ៍ទី៤នេះ ក្រុមភ្នំពេញក្រោនបរាជ័យក្រោមថ្វីជើងរបស់ណាហ្គា ក្នុងលទ្ធផល ០-១ កាលពីល្ងាចថ្ងៃសៅរ៍កន្លងទៅ។ ក្នុងការប្រកួតដែលក្រោនមានភាគរយគ្រប់គ្រងបាល់បានច្រើនជាងនោះ ត្រូវបានលោក Sainsbury ពេញចិត្តចំពោះការលេងរបស់កូនក្រុមទាំងអស់ បើទោះបីជាគ្រប់គ្រងបាល់ច្រើន តែមិនអាចរកគ្រាប់បាល់បានក៏ដោយ។

គ្រូបង្វឹកខាងលើបន្ដទៀតថា ណាហ្គាវើល ជាក្រុមដែលបានរៀបចំល្អសម្រាប់ការប្រកួតនេះ ពួកគេអាចរារាំងឱកាសរបស់ក្រុមដៃគូ និងវាយបកបានយ៉ាងល្អ។ ខណៈដែលក្រោន គ្រប់គ្រងបាល់បាន បង្កើតបាន ប៉ុន្តែមិនមានសំណាងក្នុងការរកគ្រាប់បាល់ជ័យជម្នះក្នុងការប្រកួតសប្ដាហ៍ទី៤នេះ។

ណាហ្គាវើល ក្រោយពីឈ្នះក្រោនសប្ដាហ៍ទី៤នេះ ពួកគេបានឈរនៅកំពូលតារាងលីគកំពូលកម្ពុជា មាន១០ពិន្ទុស្មើជាមួយក្រុមបឹងកេតដែរ ប៉ុន្តែលើសគ្រាប់បាល់ចំណេញ១គ្រាប់។ ខណៈដែលភ្នំពេញក្រោនវិញមាន៧ពិន្ទុឈរនៅចំណាត់ថ្នាក់លេខ៦ក្នុងតារាង៕

អត្ថបទ៖ មុន្នីរម្យ