មិនធម្មតាពេលដឹងប្រវត្តិ និងឈ្មោះដំរីចុងក្រោយ ៤ក្បាលនៅរតនគិរី

2018-04-19 08:48:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយការខូចខាតជម្រកធម្មជាតិ និងការបរបាញ់ខុសច្បាប់ សត្វដំរីនៅក្នុងខេត្តរតនគិរី បានបាត់បង់ស្ទើរទាំងស្រុង។ បច្ចុប្បន្ននេះ មានតែសត្វដំរីចំនួន ៤ក្បាលចុងក្រោយប៉ុណ្ណោះ ដែលបានជួយសង្គ្រោះដោយសមាគមអភិរក្សមួយ ក្រោមការសព្វព្រះទ័យ និងគាំទ្រ ដ៏ខ្ពង់ខ្ពស់របស់ព្រះបាទសម្ដេចព្រះបរមនាថ នរោត្តមសីហ មុនី ព្រះមហាក្សត្រ នៃព្រះរាជាណាចក្រកម្ពុជា។

លោកស្រី ខៃ ចិន្ដា ប្រធានសមាគមអភិរក្សដំរីខ្មែរអៃរាវត្តា ពេលចូលគាល់ព្រះមហាក្សត្រកន្លងមក

លោកស្រី ខៃ ចិន្ដា ប្រធានសមាគមអភិរក្សដំរីខ្មែរអៃរាវត្តា ប្រាប់ឲ្យដឹងថា៖ សត្វដំរីទាំង៤ក្បាលនោះត្រូវបានសមាគមលោកស្រីជួយសង្គ្រោះទាន់ពេល និងបានយកមកអភិរក្សដោយការ យកចិត្តទុកដាក់ខ្ពស់ រហូតរស់ដល់សព្វថ្ងៃនេះ។ ដំរីទាំង៤ មានឈ្មោះ និងប្រវត្តិសង្ខេបដូចខាងក្រោមនេះ៖

១.ដំរីឈ្មោល Bokvaមហិមា

Bokva គឺជាដំរីឈ្មោលក្នុងស្រុកដ៏ ធំបំផុត នៅប្រទេសកម្ពុជា ដែលបានចាប់កើតនៅ ឆ្នាំ១៩៨០ ។ ម្ដាយរបស់Bokvaត្រូវ បានគេចាប់ខ្លួននៅចំណុចទន្លេ សាដាអេ ក្នុងអំឡុងពេល Bokva អាយុបាន ៣ឆ្នាំ។ បន្ទាប់មក Bokva ត្រូវបានលាក់ខ្លួន ដោយម្ចាស់វា ដើម្បីធ្វើយ៉ាងណាឲ្យចាកឆ្ងាយពី ក្រុមអ្នកប្រមាញ់ខុសច្បាប់ចំពោះសត្វដំរី។ Bokva ត្រូវបានគេលក់ចេញពីគ្រួសារ១ ដែលមិនចង់ថែរក្សាវា នៅក្រោយមរណភាពរបស់ម្ចាស់ដើម។

ដំរីឈ្មោល Bokva មហិមា

២. ដំរីញី Ikeo ដ៏ស្រស់ស្អាត

Ikeo មានអាយុ ៣៤ឆ្នាំ បានកើតនៅក្នុង ឆ្នាំ ១៩៨២។ នៅអាយុពីរឆ្នាំ Ikeo ត្រូវបានលាក់ខ្លួននៅក្នុងព្រៃ ដោយម្ចាស់របស់វា។ នៅពេលIkeo មានអាយុ ៧ មេរបស់វា ត្រូវបានគេបាញ់សម្លាប់ ដោយក្រុមទាហានវៀតណាម ដើម្បីការពារខ្លួន។ បន្ទាប់មក ម្ចាស់របស់Ikeo បានសម្រេចចិត្តប្រគល់វាទៅឱ្យក្រុមអភិរក្ស ដើម្បីការពារជីវិត ខណៈមានការប្រមាញ់ខុសច្បាប់ និង ការរុករានព្រៃជម្រកសត្វ ចេះតែបន្ត កើតមាន។

ដំរីញី Ikeo

៣.ដំរីឈ្មោលKamsen

មានអាយុ ៤០ឆ្នាំ។ Kamsen ត្រូវបានគេទិញ ពីបុរសម្នាក់ ដែលជាម្ចាស់របស់វា ដើម្បីបញ្ចៀសពីគ្រោះថ្នាក់ដល់ជីវិត។ ក្រុមអភិរក្សបានចិញ្ចឹម និងថែរក្សា Kamsenរហូតមាន វ័យចំណាស់ដូចសព្វថ្ងៃ។

ដំរីឈ្មោលKamsen

៤.ដំរី បាកម៉ៃ អព្ភូតហេតុ

មានអាយុ ៣២ឆ្នាំ ដែលអាចចាត់ ចូលជាក្រុមពូជសត្វដំរីដ៏ ល្បីល្បាញបំផុត នៅក្នុងប្រទេសកម្ពុជា។

តាមឯកសារ ពីសមាគមអភិរក្សដំរីខ្មែរ ខាងលើបង្ហាញថា៖ បច្ចុប្បន្ននេះ ប្រទេសកម្ពុជា នៅសេសសល់សត្វដំរីស្រុក ៧០ក្បាល និងដំរីព្រៃប្រមាណ ២០០ក្បាល តែប៉ុណ្ណោះ។ ប៉ុន្តែបើធៀបតួលេខនេះ គឺមានចំនួនតិចជាងឆ្ងាយ ពីនៅសម័យអាណាចក្រអង្គរ គឺមានសត្វដំរី ចំនួនដល់ទៅ ជាង ២សែនក្បាល។

ដើម្បីចូលរួមអភិរក្សសត្វដំរី វប្បធម៌ និងបរិស្ថាននៅកម្ពុជា សមាគមអភិរក្សដំរីខ្មែរអៃរាវត្តានឹង មានរៀបចំកម្មវិធី រាត្រីស្រមោល ស សប្បុរសធម៌មួយ ដែល នឹងប្រព្រឹត្តទៅ នៅថ្ងៃទី២៧ ខែ មេសា ឆ្នាំ២០១៨ ខាងមុខនេះ នៅក្នុងបរិវេណស្ថានទូតបារាំង ប្រចាំប្រទេសកម្ពុជា៕

ចុចអាន៖

អត្ថបទ៖ ពៅ រក្សា

រូបថត៖ ផ្ដល់ឲ្យ