ពពោះបាន៨សប្ដាហ៍ សាន់ឆាយ សម្រេចរំលូតកូនចោល ព្រោះហេតុផលនេះ
- 2018-05-08 02:36:13
- ចំនួនមតិ 0 | ចំនួនចែករំលែក 0
ពពោះបាន៨សប្ដាហ៍ សាន់ឆាយ សម្រេចរំលូតកូនចោល ព្រោះហេតុផលនេះ
ចន្លោះមិនឃើញ
បន្ទាប់ពីពពោះបានរយៈពេលជាង ៨សប្ដាហ៍ តារាសម្ដែងតៃវ៉ាន់ Barbie Hsu ស្រាប់តែ ទទួលដំណឹងពីគ្រូពេទ្យទាក់ទងនឹងកូនក្នុងផ្ទៃរបស់នាង។
បើតាមការត្រួតពិនិត្យរបស់វេជ្ជបណ្ឌិតបានឲ្យដឹងថា ពួកគេមិនអាចរកឃើញចង្វាក់បេះដូងកូនក្នុងផ្ទៃរបស់ Barbie ឃើញទេ។ តារាស្រីរូបនេះ ក៏បានបន្ថែមដែរថា ទារកក្នុងស្បូនរបស់ខ្លួនខ្សោយណាស់។
ជាក់ស្ដែង អំឡុងពេលនៃ ៧សប្ដាហ៍ដំបូង នាងបានមកពិនិត្យ ឃើញថាចង្វាក់បេះដូងកូនមានសភាពខ្សោយ។ ប៉ុន្តែជាអកុសល ឈានដល់សប្ដាហ៍ទី ៨ ក្រុមវេជ្ជបណ្ឌិត រកលែងឃើញដំណើរការបេះដូងរបស់ទារកតែម្ដង។ ប្រការនេះ បានធ្វើឲ្យ Barbie និងក្រុមគ្រួសារមានការសោកស្ដាយជាខ្លាំង។ ជម្រើសចុងក្រោយរបស់ពួកគេ គឺរំលូតកូនចេញ ទាំងស្រណោះបំផុត។
មួយវិញទៀត ការយកកូនចេញនេះ គ្រូពេទ្យក៏ស្នើឲ្យនាង យកចេញតាមធម្មជាតិ ចៀសវាងការប្រើថ្នាំ ព្រោះវាអាចប៉ះពាល់ដល់សុខភាពនាង។ ទោះជាមានក្ដុកក្ដួលយ៉ាងណាក្ដី ប៉ុន្តែ Barbie អាចសម្រួលអារម្មណ៍បានខ្លះហើយនាពេលនេះ ព្រមទាំងបានបញ្ជាក់ប្រាប់អ្នកគាំទ្រខ្លួនថា៖ "ទេវតាបានប្រទានកូន២នាក់ឲ្យខ្ញុំហើយ។ នេះជាអំណោយដ៏មានតម្លៃវិសេសវិសាលបំផុត។ អរគុណអ្នកគ្រប់គ្នាដែលយកចិត្តទុកដាក់ និងបារម្ភពីខ្ញុំុ។ ពេលនេះខ្ញុំលែងអីហើយ ខ្ញុំអាចធ្វើចិត្តបាន"។
យ៉ាងណាមិញ បើរម្លឹកកាលពីខែមុន តារាស្រីវ័យ ៤១ឆ្នាំរូបនេះបានឲ្យដឹងថាខ្លួនមានទម្ងន់កូនទី៣។ ប៉ុន្តែការពពោះលើកនេះ ហាក់ដូចជាជួបឧបសគ្គច្រើន ស្របពេលដែលនាងមានវ័យកាន់តែច្រើន សុខភាពតែងតែខ្សោយ ជាហេតុធ្វើឲ្យអ្នកម្ដាយរូបនេះឧស្សាហ៍សន្លប់។ មួយវិញទៀត ដើម្បីចង់ថែគភ៌ Barbie ក៏បានលុបចោលការងារជាច្រើន ព្រោះចង់ទុកពេលថែខ្លួន និងទារក។ ប៉ុន្តែពេលនេះអ្វីៗបានកើតឡើងខុសពីការរំពឹងទុក។
ដោយសាររឿងរ៉ាវទាំងនេះ បានធ្វើឲ្យនាងមានការយល់ដឹងច្រើន និងធ្វើឲ្យនាងផ្ដោតការស្រឡាញ់ចំពោះគ្រួសារកន់តែខ្លាំង៕