កីឡាករល្បីមួយរូបទៀតដែលត្រូវបានតុលាការអេស្ប៉ាញកាត់ទោសទាក់ទិនរឿងពន្ធ

2018-05-24 13:38:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Radamel Falcao កាលពីម្សិលមិញ បានក្លាយជាកីឡាករល្បីម្នាក់ទៀត ដែលត្រូវបានតុលាការអេស្ប៉ាញកាត់ទោសទាក់ទិននឹងរឿងពន្ធ។

កីឡាករត្រូវបានតុលាការរកឃើញថា បានក្លែងបន្លំក្នុងការធ្វើឯកសារបង់ពន្ធដោយបានធ្វើរបាយការណ៍មិនត្រឹមត្រូវស្ដីពីចំណូល និងឯកសារទាក់ទងនឹងកម្មសិទ្ធិនៃការប្រើប្រាស់រូបភាពរបស់ខ្សែប្រយុទ្ធរូបនេះ ក្នុងអំឡុងពេលគេលេងឲ្យ Atletico Madrid (២០១១-២០១៣)។

បើតាម El Confidential តាមរយៈការប្រព្រឹត្តិបទល្មើសខាងលើ កាលពីឆ្នាំ ២០១២ Falcao បានកិបកេងបានសម្រេចលុយប្រមាណ ៨២ ម៊ឺនអឺរ៉ូ (ជាង ៩៦ លានដុល្លារសហរដ្ឋអាមេរិក) និង ជិត ៥ លានអឺរ៉ូ (ប្រមាណ ៥,៨៧ លានដុល្លារសហរដ្ឋអាមេរិក) ក្នុងឆ្នាំ ២០១៣។

តុលាការបានកាត់ទោស Falcao ឲ្យជាប់ពន្ធនាគារចំនួន ១៦ ខែ និងពិន័យជាប្រាក់ ៩ លានអឺរ៉ូ (ប្រមាណ ១០ លានដុល្លារសហរដ្ឋអាមេរិក)។ យ៉ាងនេះក្ដី បើតាមច្បាប់អេស្ប៉ាញ ទោសពន្ធនាគារក្រោម ២ ឆ្នាំ អាចព្យួរបាន។

បើតាមសេចក្ដីសម្រេចរបស់តុលាការអេស្ប៉ាញ Falcao ត្រូវបានព្យួរទោស ដែលមានន័យថា កីឡាករនឹងមិនជាប់ពន្ធនាគារនោះឡើយ។

Falcao មិនមែនជាកីឡាករទីមួយទេ ដែលត្រូវបានកាត់ទោសដោយតុលាការអេស្ប៉ាញទាក់ទិននឹងរឿងពន្ធ។ ខ្សែប្រយុទ្ធ Lionel Messi, Alexis Sanchez និង ខ្សែការពារ Javier Mascherano សុទ្ធតែត្រូវបានតុលាការប្រទេសអឺរ៉ុបមួយនេះកាត់ទោសឲ្យជាប់ពន្ធនាគារ (ប៉ុន្តែត្រូវបានព្យួរ) និងពិន័យជាប្រាក់ជាច្រើន៕

ប្រភព៖ Marca អត្ថបទ៖ សេរី មង្គល