កំណើនចំនួនអ្នកម្តាយវ័យជំទង់ បង្កក្តីបារម្ភដល់អនាគតកុមារតូចនៅកម្ពុជា
- 2018-05-31 09:32:23
- ចំនួនមតិ 0 | ចំនួនចែករំលែក 0
កំណើនចំនួនអ្នកម្តាយវ័យជំទង់ បង្កក្តីបារម្ភដល់អនាគតកុមារតូចនៅកម្ពុជា
ចន្លោះមិនឃើញ
អង្គការមនុស្សធម៌មួយបានលើកឡើងថាការកើនឡើងចំនួនអ្នកម្តាយវ័យជំទង់ក្នុងប្រទេសកម្ពុជាកំពុងក្លាយជាក្តីបារម្ភមួយសម្រាប់កូនតូចរបស់អ្នកទាំងនោះដែលអាចប្រឈមនឹងហានិភ័យផ្សេងៗដោយសារតែម្តាយវ័យក្មេងមិនមានបទពិសោធន៍ ជំនាញ និងសន្តិសុខហិរញ្ញវត្ថុដើម្បីចិញ្ចឹមបីបាច់កូនឲ្យបានល្អ។
ក្នុងសេចក្តីប្រកាសព័ត៌មានមួយចេញផ្សាយនៅរសៀលនេះ របស់អង្គការ Save the Children ស្តីពីរបាការណ៍"ការបញ្ចប់នូវកុមារភាព៖ កុមារជាច្រើនមិនត្រូវបានរាប់បញ្ចូល"លើកឡើងថាក្នុងរយៈពេលបួនឆ្នាំចំនួនអ្នកម្តាយវ័យជំទង់នៅកម្ពុជាបានកើនឡើងពី៨ភាគរយទៅ១២ភាគរយនៃកុមារីវ័យជំទង់ទាំងអស់។
ក្នុងសេចក្តីប្រកាសព័ត៌មានសរសេរបន្តថា៖ «អង្គការ Save the Children កំពុង[ជំរុញ]ឲ្យរាជរដ្ឋាភិបាលកម្ពុជាផ្តល់ការគាំទ្រនិងការអប់រំដែលកុមារវ័យជំទង់ត្រូវការដើម្បីធ្វើការសម្រេចចិត្តដោយមានព័ត៌មានគ្រប់គ្រាន់ពាក់ព័ន្ធនឹងសុខភាពផ្លូវភេទនិងសុខភាពបន្តពូជរបស់ពួកគេ និងឲ្យរាជរដ្ឋាភិបាលធានានូវការវិនិយោគកាន់តែច្រើនឡើងលើកម្មវិធីថែទាំ អប់រំនិងអភិវឌ្ឍន៍កុមារតូច ដើម្បីធានាថាកុមារទាំងអស់អាចទទួលបានសេវាដែល គាំទ្រការរៀនសូត្រនិងការអភិវឌ្ឍដំបូងរបស់ពួកគេ»។
ចំនួនអ្នកម្តាយវ័យជំទង់កើនឡើងកំពុងធ្វើឲ្យមានគ្រោះថ្នាក់ដល់សុខុមាលភាពរបស់កុមារតូចក្នុងប្រទេសកម្ពុជា។ នេះបើតាមសេចក្តីប្រកាសព័ត៌មានដដែល។ ប្រភពដដែលឲ្យដឹងថាកុមារនៅកម្ពុជាច្រើនជាង៣០ភាគរយមានភាពក្រិសក្រិន កុមារម្នាក់ក្នុងចំណោមប្រាំនាក់បាត់បង់ឱកាសសិក្សា និងមាន២០ភាគរយបានប្រឡូកក្នុងពលកម្មកុមារ។
លោកស្រី អេលីហ្សាបេត ភៀស នាយិកាអង្គការ Save the Children ប្រចាំប្រទេសកម្ពុជាទំនងជាចង់សំដៅថាអ្នកម្តាយវ័យជំទង់មិនទាន់មានសមត្ថភាពគ្រប់គ្រាន់ក្នុងការថែទាំងកូនតូចរបស់ខ្លួនឲ្យមានសុខភាពល្អ និងជំរុញកូនឲ្យបានទទួលការអប់រំ។ នេះបើតាមសេចក្តីប្រកាសព័ត៌មាន។
ក្នុងសេចក្តីប្រកាសព័ត៌មានបានដកស្រង់សម្តីរបស់លោកស្រីយ៉ាងដូចនេះថា៖«ភាពជាក់ស្តែងបែបនេះមិនត្រឹមតែធ្វើ[ឲ្យ]ម្តាយវ័យក្មេងទាំងនោះបាត់បង់នូវកុមារភាពរបស់ពួកគេនោះទេ តែថែមទាំងធ្វើឲ្យអនាគតកូនរបស់ពួកគេស្ថិតក្នុងហានិភ័យផងដែរ។ ដោយសារតែភាពវ័យក្មេងនិងការរើសអើងពីសង្គមដែលពួកគេតែងតែជួបប្រទះញឹកញាប់ អ្នកម្តាយវ័យជំទង់ មិនមានបទពិសោធន៍ ជំនាញ ការទទួលបានសេវា ឬសន្តិសុខហិរញ្ញវត្ថុដែលត្រូវការដើម្បីផ្តល់ការថែទាំល្អបំផុតដល់កូនៗរបស់ពួកគេ។ នេះមានន័យថាប្រទេសកម្ពុជាត្រូវការការវិនិយោគបន្ថែមទៀតមិនត្រឹមតែក្នុងការកាត់បន្ថយការមានផ្ទៃពោះរបស់កុមារីវ័យជំទង់ប៉ុណ្ណោះទេ តែថែមទាំងនៅក្នុងកម្មវិធីអប់រំនិងអភិវឌ្ឍន៍កុមារតូចដែលមានលក្ខណៈពេញលេញ ដើម្បីធានាថាទារកទើបនឹងកើតទាំងនេះមិនជួបការលំបាកតាំងពីកើតនោះទេ»។
លោកស្រីបន្តថាអ្នកម្តាយវ័យក្មេងទាំងនេះភាគច្រើនស្ថិតក្នុងសហគមន៍ងាយរងគ្រោះ និងស្ថិតនៅក្នុងសហគមន៍ក្រីក្រ ជនបទដែលថាមិនសូវបានទទួលអត្ថប្រយោជន៍ពីការរីកចម្រើនរបស់សង្គមដូចកុមារីវ័យជំទង់ស្រករៗគ្នាផ្សេងទៀត។ លោកស្រីបន្ថែមថា៖ « ដោយសារគុណវិបត្តិនៃការត្រៀមលក្ខណៈមិនបានត្រឹមត្រូវសម្រាប់ភាពជាឪពុកម្តាយនេះហើយ ដែលធ្វើឲ្យគុណវិបត្តិនោះត្រូវបានធ្លាក់បន្តទៅឲ្យទារកទើបនឹងកើតរបស់ពួកគេទៀត»។
ទាក់ទងនឹងការលើកឡើងនេះ Sabay មិនទាន់អាចទាក់ទងអ្នកនាំពាក្យក្រសួងអប់រំ ឯកឧត្តម រស់ សាលីន បានភ្លាមៗ ដើម្បីពន្យល់ពីការអប់រំបញ្ហាសុខភាពផ្លូវភេទ និងសុខភាពបន្តពូជរបស់កុមារវ័យជំទង់នៅតាមសាលារៀនបាននៅឡើយទេនៅរសៀលនេះ ដោយទូរសព្ទចូលតែពុំមានអ្នកទទួល។
នៅក្នុងតារាងចំណាត់ថ្នាក់របស់របាយការណ៍នេះដែលបានចាត់ថ្នាក់ប្រទេសទៅតាមកម្រិតធ្ងន់ឬស្រាលនៃបញ្ហាប្រឈមរបស់កុមារភាព ប្រទេសកម្ពុជាបានធ្លាក់ចុះ ២លំដាប់ថ្នាក់មកនៅលេខរៀងទី១១៩ ក្នុងចំណោមប្រទេសចំនួន១៧៥ ដែលបានយកមកធ្វើការវិភាគ។ ចំណែកឯប្រទេសថៃ នៅលេខរៀង៨៥ វៀតណាម៩៦ ហ្វីលីពីន ១០៤ និងប្រទេសឥណ្ឌូណេស៊ី១០៥ ខណៈដែលប្រទេសចិនបានកើនឡើងមួយលំដាប់ថ្នាក់មកនៅលេខរៀងទី៤០វិញ។
បើតាមប្រភពដដែលកុមារជាង១ពាន់លាននាក់កំពុងរស់នៅក្នុងប្រទេសដែលញាំញីដោយភាពក្រីក្រ ២៤០ លាននាក់នៅក្នុងប្រទេសដែលរងផលប៉ះពាល់ដោយជម្លោះនិងភាពងាយរងគ្រោះ និងកុមារីចំនួនជាង ៥៧៥ លាននាក់រស់នៅក្នុងប្រទេសដែលមានបញ្ហាធ្ងន់ធ្ងរលើភាពលម្អៀងផ្នែកយេនឌ័រ៕
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
