Smalling ដើរលេងទាត់សីធ្វើមិនដឹងនៅវៀតណាម ក្រោយមិនជាប់ក្នុងក្រុមជម្រើសជាតិទៅលេង World Cup

2018-06-07 12:08:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយមិនមានឈ្មោះក្នុងបញ្ជីកីឡាករដែលនឹងត្រូវលេងក្នុង World Cup នៅរុស្ស៊ីនាពេលដ៏ខ្លីខាងមុខ ខ្សែការពារ Chris Smalling បានមកដើរលេងកម្សាន្តលំហែនៅប្រទេសថៃ និងវៀតណាម។ ក្រៅពីភ្លក់ម្ហូប កីឡាករក៏បានចូលរួមកម្សាន្តសកម្មភាពមួយចំនួន ក្នុងនោះរួមមានការទាត់សីជាមួយពលរដ្ឋនៅទីក្រុងហាណូយ វៀតណាម។

ប្រភព៖ Instagram @smalling

ក្នុងរយៈពេលជាងមួយសប្ដាហ៍ចុងក្រោយ ខ្សែការពារបិសាចក្រហមបានបង្ហោះរូបថតចំនួនច្រើនសន្លឹកគួរសមក្នុងបណ្ដាញសង្គម ដើម្បីបង្ហាញពីដំណើរកម្សាន្តខ្លួននៅបណ្ដាប្រទេសអាស៊ានទាំងពីរ។

ប្រភព៖ Instagram @smalling

នៅថៃ កីឡាករបានទៅលេងភាគខាងកើតប្រទេសថៃ នៅកោះ Kood ហើយក៏បានសាកម្ហូបនៅទីនោះ។ នៅទីនោះ Smalling ក៏បានទៅលេង Pai Canyon។ បន្ថែមពីលើនេះ ខ្សែការពារក៏បានសាកល្បងជិះរ៉ឺម៉កកង់បី។ ក្នុងការប្រើប្រាស់មធ្យោបាយធ្វើដំណើរនេះ Smalling បាននិយាយត្អូញត្អែរក្នុងន័យកំប្លែង ថារ៉ឺម៉កប្រភេទនេះមានទំហំតូច បើធៀបនឹងមាឌខ្លួន។

ចេញពីថៃ កីឡាករបានធ្វើដំណើរបន្តទៅរដ្ឋធានីហាណូយ វៀតណាម។ នៅទីនោះ Smalling ក៏បានបង្ហោះវីដេអូខ្លីមួយអំពី ខ្លួនទាត់សីជាមួយពលរដ្ឋវៀតណាមនៅតាមដងផ្លូវ។ បើយោងតាមវីដេអូដដែល ខ្សែការពាររូបនេះបានធ្វើបានល្អក្នុងការទាត់សីទៅវិញទៅមក។

សូមបញ្ជាក់ផងដែរ កាលពីខែមុន Smalling មិនមានឈ្មោះក្នុងបញ្ជីកីឡាករក្រុមជម្រើសជាតិអង់គ្លេសដែលនឹងត្រូវទៅរុស្ស៊ីឡើយ។ អវត្តមាននេះត្រូវបានសារព័ត៌មានជាច្រើនចុះផ្សាយថា អាចបណ្ដាលមកពីលោកគ្រូបង្វឹក Gareth Southgate ចង់បានកីឡាករការពារមួយចំនួនដូចជា John Stones, Harry Maguire និង Eric Dier ដោយពួកគេ"ពូកែបង្កើតចង្វាក់លេងជាង"។

Smalling លេងបានសរុប ៤៦ ប្រកួតឲ្យបិសាចក្រហមក្នុងរដូវកាលនេះ ហើយស៊ុតចូលបាន ៤ គ្រាប់។

សូមទស្សនាវីដេអូ Smalling ទាត់សីនៅវៀតណាម៖៕