តើ«កាស និងកាក់» ខុសគ្នាយ៉ាងម៉េច?

2018-06-22 02:49:51
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីនេះធនាគារជាតិបានចេញសេចក្តីជូនដំណឹងទាក់ទងនឹងការផ្សព្វផ្សាយ ការចរាចរទិញលក់ ទូទាត់ ជួញដូរ កាសអេឡិចត្រូនិចដូចជា KH Coin Suncoin K Coin និង One-Coin ជាដើម ដែលថាការផ្សព្វផ្សាយគ្មានអាជ្ញាបណ្ណពីអាជ្ញាធរជាសកម្មភាពខុសច្បាប់។

(រូបតំណាង)

ការប្រកាសនេះធ្វើឡើងបន្ទាប់ពីអាជ្ញាធរសង្កេតឃើញថាពេលថ្មីៗនេះមានការផ្សព្វផ្សាយពីការចរាចរាចរទិញ លក់ ជួញដូរ ទូទាត់កាសអេឡិចត្រូនិចប្រភេទនេះ។

ទោះយ៉ាងណាពេលចេញសេចក្តីប្រកាសនេះនៅលើទំព័រហ្វេសប៊ុកធនគាជាតិ ក៏មានដែរអ្នកប្រើប្រាស់បណ្តាញសង្គមខ្លះដាក់ជាសំណួរ និងចម្ងល់លើពាក្យ «កាស» ថាតើជា «កាស ឬកាក់» ដោយបានឃើញមានពាក្យ «Coin» នៅជាមួយដែរ។

បើពិនិត្យក្នុងច្បាប់ស្តីពីការរៀបចំនិងការប្រព្រឹត្តទៅនៃធនាគារជាតិនៃកម្ពុជា មាត្រាទី៤៣ មានប្រើពាក្យ «កាស»នេះដែរ ដោយថា«ក្រដាសប្រាក់ និងកាស ដែលបោះផ្សាយដោយធនាគារកណ្តាល គឺជារូបិយវត្ថុមានតម្លៃនីត្យានុកូលក្នុងព្រះរាជាណាចក្រកម្ពុជា និងមានតេជានុភាពធ្វើសេរីកាគ្មានព្រំដែនចំពោះក្រដាសប្រាក់ និងមានព្រំដែនចំពោះកាសក្នុងលក្ខខណ្ឌកំណត់ដោយធនាគារកណ្តាល»។

បើតាមវចនានុក្រមសម្តេច ជូន ណាត «កាស» មានន័យថា « រូបិយវត្ថុសម្រាប់ចាយ មានសណ្ឋានមូល ប្រហោងកណ្ដាល ៤ ជ្រុង ធ្វើដោយស្ពាន់ ទង់ដែង សាំង្កសី មកអំពីស្រុកចិន ឬស្រុកអណ្ណាម សព្វថ្ងៃក្នុងដែនកម្ពុជា លែងប្រើរូបិយវត្ថុនេះតាំងអំពីមានសេន»។

សម្រាប់ពាក្យ«កាក់» វិញក្នុងវនានុក្រមពន្យល់ថា៖ « ឈ្មោះប្រាក់ដែលប្រើក្នុងប្រទេសកម្ពុជាមាន ៣ យ៉ាងគឺ ចំនួនតម្លៃ ១០ សេន ២០ សេន ៥០ សេន»។

ចំណែក «សេន ឬ Cent» ក្នុងវនានុគ្រមពន្យល់ថា «លុយតូច គឺលុយចំនួនមួយរយជាមួយរៀលក្នុងប្រទេសឥណ្ឌូចិន : ទិញម្ហូបអស់១រៀលហាសិបសេន (១៛, ៥០); ទិញនំអស់១រៀល ៥ សេន (១៛, ០៥)» ៕

អត្ថបទ៖ ទូច សុខា