ប្លែកភ្នែកឡាន Rolls-Royce បើកពេញទីក្រុងភ្នំពេញ

2018-07-05 04:49:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ឡានសម្រាប់ត្រកូលអភិជន Rolls-Royce កាន់តែសំបូរហូរហៀរ។ ក្រុងភ្នំពេញមិនថាតាមដងផ្លូវតូចធំ ឧស្សាហ៍ឃើញឡានប្រណិតតម្លៃកប់នេះ បើកកាត់តាមទីប្រជុំជននិងលំនៅដ្ឋានពលរដ្ឋគ្រប់ច្រកល្ហក។

ខុសពីប៉ុន្មានឆ្នាំមុន ឡានកំណើតផលិតនៅចក្រភពអង់គ្លេសដែលកម្រឃើញឬមានមួយៗ ទើបតែមួយរយៈចុងក្រោយចាប់ផ្តើមលេចមុខកាន់តែច្រើន ទាំងក្រុមហ៊ុននិងការ៉ាស់ឯកជនមួយចំនួន សម្រុកនាំចូលបម្រើទីផ្សារអ្នកមានក្នុងស្រុក។

តាមប្រភពហាងមួយប្រាប់ថា ឡានសេដ្ឋីនេះបច្ចុប្បន្នមានជាង ២០០ គ្រឿងកំពុងតែប្រើប្រាស់។ ដោយឡែកក្រុមហ៊ុននាំចូលផ្លូវការមិនបញ្ចេញតួលេខច្បាស់លាស់ទេ ទោះបីទទួលស្គាល់ពីកំណើនតម្រូវការពីអ្នកមានៗនៅក្នុងស្រុក។

ឡានផលិតផ្តាច់មុខសម្រាប់ត្រកូលអភិជន តម្លៃមួយគ្រឿងចាប់ពី ៤០ ម៉ឺនដុល្លារ រហូតដល់ខ្ទង់លានដុល្លារ អាស្រ័យតាមការកុម្ម៉ង់របស់អតិថិជន៕