តារាប្រុសខ្មែរ៤រូប ត្រៀមអ៊ុតលទ្ធផលជាប់ឈ្មោះសម្ដែងឲ្យទូរទស្សន៍ថៃ

2018-08-29 10:12:36
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាប្រុសខ្មែរចំនួន៤ដួង ដូចជា ប៉ោហុង ចាដេត ម៉ាវីន និងYoung Boy ត្រូវបានទូរទស្សន៍ថៃល្បីឈ្មោះជ្រើសរើស ដើម្បីត្រៀមចូលរួមជាតារាកុងត្រាជាមួយតារាមកពីប្រទេសផ្សេងៗចំនួន៥ ដូចជាប្រទេសកម្ពុជា វៀតណាម មីយ៉ាន់ម៉ា ឡាវ និងថៃ។ ក្នុងដំណាក់កាលនេះ អ្នកទាំង៤រូបកំពុងរង់ចាំលទ្ធផលសម្រេចនៅចុងខែនេះ ដើម្បីច្បាស់ថា នឹងចូលរួមការងារ ក៏ដូចជាទទួលការបណ្ដុះបណ្ដាលពីទូរទស្សន៍ល្បីឈ្មោះមួយនេះ នៅប្រទេសថៃ។

បើតាមតារាសម្ដែងកំពុងមានប្រជាប្រិយភាព ហៃ ប៉ោហុង ប្រាប់ថា ខាងក្រុមហ៊ុនទូរទស្សន៍ថៃល្បីឈ្មោះ GMM Thai បានមកស្រុកខ្មែរ ដើម្បីជ្រើសរើសតារាមានសមត្ថភាពសម្ដែងល្អបំផុត ហើយបើសិនជាជាប់នៅវគ្គនេះ នោះនៅចុងខែសីហា គេនឹងអញ្ជើញឲ្យទៅសិក្ខាសាលារយៈពេលបួនថ្ងៃនៅថៃ ដើម្បីពិភាក្សាការងារបន្ថែម និងធ្វើកុងត្រា។

ចំពោះ ប៉ោហុង ប្រាប់ថា ៖ “បើលក្ខខណ្ឌកុងត្រាគេល្អ ខ្ញុំនឹងសម្រេចចិត្តចូលរួមសហការការងារនៅទីនោះ ព្រោះកន្លងមក ខ្ញុំធ្លាប់ធ្វើការជាមួយថៃ ឃើញថាល្អ ។ ម្យ៉ាងទៀតដើម្បីទទួលបានឱកាសទីផ្សារការងារ និងការបណ្ដុះបណ្ដាលឲ្យការសម្ដែងកាន់តែប៉ិនប្រសព្វ"។

ក្នុងចំណោមតារា៤នាក់ខាងលើ ខាងទូរទស្សន៍ថៃសម្រេចជ្រើសរើសយកតែ២នាក់ប៉ុណ្ណោះ ដោយការប្រកាសលទ្ធផលនៅថ្ងៃទី៣១ ខែសីហា ខាងមុខនេះ៕

អត្ថបទ៖ លឹម សុនា