ពីមួយបទទៅមួយបទ បទចម្រៀងដែលច្រៀងពីសំណាក់ក្រុមបេក្ខជននិងជយលាភី Hear My Song បាន​ធ្វើ​ឲ្យ​ទស្សនិកជន​ចូលរួម​ពិព័រណ៌ ITET 2014 អន្លង់អន្លោច​និង​លាន់​មាត់​សរសើរ​ពី​ទឹកដមសំនៀង ជាមួយការ​តែង​និពន្ទ​ទំនុកភ្លេងដ៏សែនពិរោះ។

ឆ្លៀតទំនេរពីការសិក្សា វិរៈបាននាំមិត្តភ័ក្រ្តិមកចួលរួមទស្សនាពិព័រណ៌ ITET 2014 កាលពីរសៀលម្សិលមិញនេះ។ វិរៈ​បាន​បង្ហាញ​ការ​ចំណាប់​អារម្មណ៍នៅពេលកំពុងស្តាប់បទចម្រៀងដែលច្រៀងដោយក្រុម Hear My Song ថា៖ "អស់ពីមួយបទទៅមួយបទ មិន​មាន​បទ​ណា​ ដែល​មិន​ធ្វើ​ឲ្យ​ខ្ញុំ​មិនបណ្តែតអារម្មណ៍តាមនោះទេ"។

យុវជនរូបនេះបន្តថា បទចម្រៀងដែលនិពន្ធដោយកូនខ្មែរ ពិតជាពិរោះមិននឹកស្មានដល់ទេ។ វិរៈសំណូមពរ ឲ្យ​កូនខ្មែរ​ដែល​ស្រលាញ់​វិស័យ​សិល្បៈ​ចម្រៀង ខិតខំតែងនិពន្ធបទថ្មីៗឲ្យបានច្រើនបន្ថែមទៀត ដើម្បីលើកតម្កើងមុខមាត់ជាតិ ក៏​ដូចជា​រួមចំណែក​អភិវឌ្ឍ​បទចម្រៀង​ដែល​បង្ហាញ​អត្តសញ្ញាណខ្មែរដល់ពិភពលោក​ខាងក្រៅ។

កំពុង​បណ្តែត​អារម្មណ៍​បទចម្រៀង ដែលបង្ហើរសំនៀងពីក្រុមតារាចម្រៀងវ័យក្មេង Hear My Song ដែរ វិចិត្រ​ដែល​កំពុង​ឈរ​ទស្សនា​ក្បែរឆាក​ក៏​បាន​បង្ហាញការយល់ឃើញ​ដែរ​ថា ទោះបីមានការខ្វះខាតមួយចំនួន ប៉ុន្តែ​ជាការ​ប្រសើរ​ដែល​កូនខ្មែរ​ពេលនេះ​អាច​លើក​យក​បទចម្រៀង ដែល​និពន្ធ​​ដោយ​ខ្លួនឯង​ផ្ទាល់​បង្ហាញ​ដល់អ្នកទស្សនា។

“ពីមុនបទចម្រៀងស្ទើរតែទាំងអស់លួចចម្លងពីបរទេស។ តែ​ពេលនេះវិស័យបទចម្រៀងរបស់ខ្មែរកំពុងរស់រានឡើងវិញ ដោយសារ​កូន​ខ្មែរ​ជំនាន់​ក្រោយ​កំពុង​ដុតដៃដុតជើង​តែង​បទ​ចម្រៀង​និពន្ធ​ថ្មី ដើម្បី​បង្ហាញពី​ភាព​​ផ្លាសប្តូរដ៏ប្រសើរមួយ​សម្រាប់ការ​​ទទួល​បាន​ភាព​ថ្កុំថ្កើង​ឡើង​វិញ​​នៃវិស័យបទចម្រៀងរបស់ខ្មែរ។

ក្នុងពិព័ណ៍បច្ចេកវិទ្យា ITET 2014 ក្រុមតារាចម្រៀង Hear My Song បាន​​បង្ហើរ​បទចម្រៀង​ដែល​ជា​ការ​តែងនិពន្ធ​ថ្មី​មិន​ចម្លង​ពី​បរទេស។ ក្នុង​ពេល​ដែល​ប្រិយមិត្ត​ជា​ច្រើន​បាន​ឈរ​ទស្សនា ពួកគេ​បាន​សំណូមពរ​ឲ្យពលរដ្ឋខ្មែរ​ជួយគាំទ្រ សម្រាប់​ការ​តែង​បទ​ចម្រៀង​ថ្មី​របស់​ពួកគេ ដើម្បី​ជា​ការ​លើកទឹកចិត្ត​ដល់ការ​ខិតខំ​ការប្រឹងប្រែង​ក្នុងការ​បន្តសាងស្នាដៃជាបន្តបន្ទាប់ ជាពិសេស ដើម្បី​ភាព​រស់រាន​យូរអង្វែង​នៃ​វិស័យ​តន្រ្តី​របស់ប្រទេសកម្ពុជា។

អត្ថបទ៖ ប៊ុណ្ណារ៉ា