តុលាការចិនបញ្ជាឱ្យគ្រួសារអ្នកបើកតាក់ស៊ី សងជិត ១០ម៉ឺនដុល្លារក្រោយរំលោភសម្លាប់នារីអ្នកដំណើរ
- 2019-03-03 06:11:06
- ចំនួនមតិ 0 | ចំនួនចែករំលែក 0
តុលាការចិនបញ្ជាឱ្យគ្រួសារអ្នកបើកតាក់ស៊ី សងជិត ១០ម៉ឺនដុល្លារក្រោយរំលោភសម្លាប់នារីអ្នកដំណើរ
ចន្លោះមិនឃើញ
ឪពុកម្តាយរបស់អ្នកបើកបរឲ្យក្រុមហ៊ុនតាក់ស៊ី Didi ម្នាក់ដែលបានរំលោភ និង សម្លាប់អ្នកដំណើរនារី ត្រូវបានតុលាការចិនបង្គាប់ឱ្យបង់ប្រាក់សំណងដល់គ្រួសារជនរងគ្រោះចំនួន ៦២០ ០០០ យ័ន (៩២ ៧០០ ដុល្លារអាមេរិក)។ នេះបើតាម The South China Morning Post បានចុះផ្សាយកាលពីថ្ងៃសុក្រ។
លោក Liu Zhenhua អាយុ ២៧ ឆ្នាំត្រូវបានគេប្រទះឃើញស្លាប់នៅក្នុងទន្លេ ហើយត្រូវបានគេជឿថាបានផ្តាច់ជីវិតខ្លួនឯងបន្ទាប់ពីបានសម្លាប់ នាង Li Mingzhu (លី មីងហ្ស៊ូ) វ័យ២១ឆ្នាំ ជាអូតេសលើយន្តហោះ រស់នៅក្នុងខេត្តហឺណានកាលពីខែឧសភាឆ្នាំមុន។
ការស្លាប់របស់នាងមីងហ្ស៊ូ បានពញ្ញាក់ប្រជាជនចិនអំពីសុវត្ថិភាពរបស់ Didi ដែលជា App ហៅតាក់ស៊ីដ៏ធំបំផុតមួយក្នុងប្រទេសចិន។
សារព័ត៌មានក្នុងស្រុក Thepaper.cn បានរាយការណ៍ថាកាលពីសប្តាហ៍មុនថាតុលាការបានបង្គាប់ឲ្យឪពុកម្តាយជនល្មើសដែលបានសម្លាប់ខ្លួនសងសំណងទៅគ្រួសារជនរងគ្រោះបើទោះបីជាឧក្រិដ្ឋជនបានធ្វើអត្តឃាតក៏ដោយក្តី។
តុលាការបាននិយាយថាការទូទាត់ត្រូវតែធ្វើឡើងក្នុងរយៈពេល ១០ ថ្ងៃក្រោយតុលាការចេញបង្គាប់។ តុលាការក៏បានរកឃើញថាឪពុករបស់ជនល្មើសមានចេតនាលាក់បាំងទ្រព្យសម្បត្តិរបស់ខ្លួនដើម្បីសុំតុលាការបង់ប្រាក់សំណងទាបជាងនេះ។
លោកបានប្រាប់តុលាការថាផ្ទះមួយរបស់គាត់លក់ទៅឱ្យអ្នកភូមិក្នុងតម្លៃទាបបំផុត ប៉ុន្តែអ្នកភូមិបានបដិសេធមិនទិញឡើយ។ ប្រភពខាងលើបន្ត។
ប៉ុន្មានខែក្រោយក្រោយករណីរំលោភសម្លាប់លើនារីធ្វើការលើយន្តហោះ អ្នកបើកបរ Didi ម្នាក់ទៀតបានសារភាពថាបានរំលោភនិងសម្លាប់នារីអាយុ ២០ ឆ្នាំម្នាក់ទៀតនៅក្នុងខេត្តហ្សេជាំងភាគខាងកើតប្រទេសចិន។
The South China Morning Post បានរាយការណ៍កាលពីខែសីហាថាយោងតាមកំណត់ត្រារបស់តុលាការ អ្នកបើកបរ Didi ត្រូវបានកាត់ទោសចំពោះករណីរំលោភយ៉ាងហោចណាស់លើសពី១០ករណីក្នុងរយៈពេល ៤ ឆ្នាំចុងក្រោយនេះ។
ក្រោយផ្ទុះកំហឹងជាសាធារណៈអំឡុងខែសីហា Didi ដែលជាក្រុមហ៊ុន start-up មានមូលដ្ឋានក្នុងទីក្រុងប៉េកាំងបានផ្អាកសេវារបស់ខ្លួនមួយរយៈ ដើម្បីបង្កើនវិធានការសុវត្ថិភាពរួមទាំងការណែនាំឱ្យមានការស្កេនមុខជាចាំបាច់សម្រាប់អ្នកបើកបរទាំងអស់៕