ស្ថានទូតចិនពន្យល់ពីប្រពៃណីបុណ្យឆេងម៉េង

2019-04-04 04:44:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិធីបុណ្យឆេងម៉េង ឬជាភាសាអង់គ្លេសហៅថា Tomb-Sweeping Festival តែងតែប្រព្រឹត្តទៅនៅមុន និងក្រោយថ្ងៃទី៥ ខែមេសា ហើយឆ្នាំនេះគឺចំថ្ងៃទី៥ ខែមេសា តែម្ដង។ នេះបើតាមសំណេរនៅលើទំព័រហ្វេសប៊ុករបស់ស្ថានទូតចិនប្រចាំកម្ពុជានាព្រឹកនេះ។

ស្ថានទូសរសេរទៀតថាពិធីបុណ្យនេះជាពិធីបុណ្យមួយក្នុងចំណោមពិធីបុណ្យប្រពៃណីសំខាន់ទាំង៤របស់ចិន ទន្ទឹមនឹងនេះថែមទាំងជាថ្ងៃកូនរដូវទី៥ នៃកូនរដូវទាំង២៤របស់ចិនទៀតផង។ ពិធីបុណ្យនេះ ត្រូវបានដាក់បញ្ចូលជាសម្បត្តិបេតិកភណ្ឌវប្បធម៌អរូបិយជាតិនៅឆ្នាំ២០០៦។

ប្រភពដដែលសរសេរទៀតថាពិធីបុណ្យឆេងម៉េង មិនត្រឹមជាពេលវេលាស្ងប់ស្ងាត់សម្រាប់ធ្វើការបោសសម្អាតផ្នូរ និងនឹករលឹកដល់ជីដូនជីតាដែលបានចែកឋានហើយនោះទេ ថែមទាំងជាពេលវេលាសប្បាយក្នុងការធ្វើដំណើរកំសាន្តក្នុងរដូវផ្ការីក ដើម្បីកៀកជិតជីវិតធម្មជាតិទៀតផង។

ក្រៅពីនេះក៏ជាពេលដែលប្រជាជនចិនបុរាណលេងល្បែងប្រជល់មាន់ បង្ហោះខ្លែង និងដាំដើមឈើជាដើមផងដែរ៕

សូមទស្សនាវីដេអូពិធីបុណ្យឆេងម៉េង

អត្ថបទ៖ ទូច សុខា