កន្លែងមនុស្សច្រើនកន្លែងស្ងាត់ តិចគ្រោះថ្នាក់នឹង៣រឿងនេះ

2014-11-18 22:18:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើរទៅណាទៅណី ទៅផ្សារ ទៅកន្លែងបុណ្យទានមនុស្សប្រជ្រៀតច្រើនអីហ្នឹង កុំឲ្យធ្លោយសប្បាយក្លាយជាទុក្ខពេលពី Sabay Magazine សូមដាស់តឿននូវល្បិច៣យ៉ាងដែលជនខិលខូចនិយមប្រើ ជៀសវាងកុំឲ្យខាតបង់៖

លូកនិងវះហោប៉ៅ

ករណីនេះសឹងថាស្ទើរចាស់គំរឹលទៅហើយក្នុងសង្គមខ្មែរ តែប្រជាជនមួយចំនួននៅតែធ្លោយអស់គូថខោជារឿយៗ។ ជនឆ្លៀតឱកាសចំណាំធ្វើសកម្មភាពពេលមនុស្សច្រើន។ អីចឹងហើយ កាបូបលុយ ទូរសព្ទអីហ្នឹង តែហ៊ានប្រហែស មិនយកដៃក្ដោប មិនចាប់អារម្មណ៍ ហេងស៊យបាត់ទទេៗ ទាំងមិនដឹងខ្លួន។ កញ្ញា ដាវី ជាជនរងគ្រោះធ្លាប់បាត់ទូរសព្ទទំនើបពីហោប៉ៅទាំងមិនដឹងខ្លួនសោះ ពេលកំពុងប្រជ្រៀតគ្នាទិញឥវ៉ាន់នៅផ្សារអូឫស្សី កាលឆ្នាំទៅមិញ។ ដាវី រំលឹកពីទិដ្ឋភាពបាត់ទូរសព្ទសំណព្វចិត្ត៖ "ខ្ញុំឈរចាំគេច្រកបន្លែឲ្យ នៅកន្លែងហ្នឹងវាចង្អៀតបន្តិច។ ដល់តែមកក្រៅផ្សាររាវទូរសព្ទតេហៅប្អូនមកឌុប ក៏ប្រហោងពោះរលីង។ ខ្ញុំកោតតែចោរពូកែម្ល៉េះ? យកកើត បើហោប៉ៅខោប៊យតឹងសឹងអី។ យកបាត់កុំឲ្យដឹងអីបន្តិច"។

តិចលោយកមាសទៅដូរយកសំណ 

ក្បាច់នេះមានប្រើយូរយារណាស់ហើយ តែក៏នៅតែមានអ្នករងគ្រោះ មិនថាតែទីក្រុងឬជនបទទេ។ អ្នកមានបទពិសោធន៍ ថាជនបោកប្រាស់ តែងឲ្យគ្នីគ្នាខ្លួនធ្វើជាជ្រុះកាបូបឬ គ្រឿងអលង្ការមានតម្លៃ។ ឲ្យតែនរណារើស ពេលនោះគ្នាជនខិលខូចម្នាក់ទៀតក៏ធ្វើជាតាមទាន់ដែរ ហើយស្នើឲ្យចែកគ្នា។ មិនអីចឹងគេស្រែកឬប្រាប់ឲ្យអ្នកផ្សេងដឹង។ គ្រឿងអលង្ការនោះពិបាកចែកគ្នាណាស់។ ជនឆបោកនោះ បន្ទាប់មកតែងស្នើសុំរបស់របរមានតម្លៃដែលអ្នករើសបាន ជាថ្នូរនឹងគ្រឿងអលង្ការសន្ធឹកសន្ធាប់ដែលគេទម្លាក់ចោលនោះ។ អីចឹងទេ បើអ្នករើសបានហ៊ានតែដោះចិញ្ចៀន ក្រវិល ខ្សែករ ជាថ្នូរនឹងរបស់រើសបាននឹងស៊យមិនខាន ព្រោះនោះសុទ្ធជាក្រឡៃ។ យ៉ាងណាគេថាល្បិចនេះស៊ីលុយ ច្រើនតែជាមួយមនុស្សលោភលន់។ ឲ្យតែស្រដៀងៗ ឲ្យឆ្លាតបន្តិច ហើយកុំលោភលន់អី ក្រែងខាតបង់។

ប្រយ័ត្នធ្វើបុណ្យបានទោស 

វាទើបលេចឮប៉ុន្មានឆ្នាំចុងក្រោយនេះឯង។ គេឲ្យក្មេងតូចណាម្នាក់ធ្វើជាវង្វេងផ្លូវ យំ។ បើនរណាចិត្តធម៌ឃើញហើយ ចូលសួរនាំ គឺក្មេងនោះនឹងសុំឲ្យជួយជូនទៅផ្ទះ ឬទៅទីណាដែលជាកន្លែងឪពុកម្ដាយគេនៅ។ ក្មេងនោះនឹងកុហកអ្នកឲ្យជូននៅទៅកន្លែងស្ងាត់។ អ្នកជូនទៅ អាចនឹងត្រូវជនខិលខូចដែលប្រើល្បិចនេះ ប្លន់ ហើយបើជាស្ត្រីវិញអាចគេចាប់រំលោភ ជំរិត ឬធ្វើអំពើផ្សេងៗជាដើម។ អ្នកដឹងពីរូបភាពមានក្មេងបែបនេះ យកល្អគួរជួនគេទៅរកសមត្ថកិច្ច ឬកន្លែងដែលអាចប្រកាសរកឪពុកម្ដាយ ជាជាងប្រថុយជូនគេទៅណាមកណាតាមការស្នើ។

អត្ថបទ៖ ខ្វាន់ 