បន្ទាន់ ! ឯកឧត្ដម ស៊ុន ចាន់ថុល ចុះទៅពិនិត្យស្ពានព្រែកតាមាក់ទាំងយប់ និងអាចប្ដឹងក្រុមហ៊ុនសាឡាងដឹកខ្សាច់បុកសសរស្ពាន

2019-09-09 14:03:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្ដម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនកំពុងពិនិត្យស្ថានភាពស្ពានព្រែកតាមាក់ទាំងយប់ បន្ទាប់ពីសាឡាងដឹកខ្សាច់មួយគ្រឿងបានបើកបុកសសរស្ពានកាលពីម្សិលមិញមក។ នេះបើតាមប្រសាសន៍ឯកឧត្ដម គង់ វិមាន អនុរដ្ឋលេខាធិការ និងជានាយខុទ្ទកាល័យក្រសួងសាធារណការ និងដឹកជញ្ជូនបានថ្លែងប្រាប់ sabay មុននេះ។

ឯកឧត្ដម បានបន្ថែមថា ឯកឧត្ដមរដ្ឋមន្ត្រី អមដោយអ្នកជំនាញបច្ចេកទេសនៅព្រលប់ថ្ងៃទី ៩ ខែកញ្ញានេះកំពុងនៅកន្លែងកើតហេតុ ធ្វើការសិក្សា និងវាយតម្លៃពីផលប៉ះពាល់លើសសរស្ពាន ខណៈតួសាឡាងអាចត្រូវកាត់បង្ហូរខ្សាច់ចេញ ដើម្បីជៀសវាង ផលប៉ះពាល់ដល់ស្ពាន។ សាឡាង និងខ្សាច់ មានទម្ងន់ជាង ១ ពាន់តោន។ បច្ចុប្បន្នសាឡាង កំពុងជាប់គាំងទៅនឹងសសរស្ពាន និងមិនទាន់អាចវាយតម្លៃពីផលប៉ះពាល់បាននៅឡើយទេ។

“សាឡង់កំពុងជាប់គឿងនឹងសសរកណ្ដាលស្ពានតែម្តង។ អញ្ចឹងយើងនៅមិនទាន់អាចវាយតម្លៃពីផលប៉ះពាល់បាននៅឡើយទេ។ ដូច្នេះសាឡង់ហ្នឹងបើអូសមិនបានទេ មានតែកាត់ ហើយបើកាត់គឺអាចលិចទៅបាតទន្លេហើយ”។

ឯកឧត្ដម គង់ វិមាន បានឱ្យដឹងទៀតថា ហេតុការណ៍នេះក្រុមហ៊ុនសាឡាងដឹងខ្សាច់នឹងត្រូវរងបណ្ដឹងពីក្រសួងសាធារណការ និងដឹកជញ្ជូនជាក់ជាមិនខាន។ ប៉ុន្តែត្រូវរង់ចាំការពិនិត្យជាក់ស្ដែងទៅលើទំហំនៃការខូចខាតសិន។ ឯកឧត្ដមបានបដិសេធលើពាក្យចចាមអារ៉ាម ដែលថា ក្រសួងនឹងប្ដឹងក្រុមហ៊ុនសាឡាង ហើយទារសំណងចំនួន ១លានដុល្លារ មិនពិតនោះទេ ព្រោះថា ក្រសួងមិនទាន់បានវាយតម្លៃពីផលខូចខាតនៅឡើយ។

កាលពីរសៀលថ្ងៃទី ៨ ខែកញ្ញា ម្សិលមិញមានសាឡាងមួយគ្រឿងផ្ទុក ដោយខ្សាច់ពេញបាន បើកបរពីទិសខាងជើងទៅត្បូងបានបើកបុក និងបណ្ដាលឱ្យកៀបជាប់នឹងសសរស្ពានតែម្ដង។ ស្ពាន ព្រែកតាមាក់មានប្រវែង សរុប១០៦០ម៉ែត្រ និងទទឹងប្រវែង ១៣.៥ ម៉ែត្រ ។ ស្ពាននេះ បានចំណាយថវិកាប្រមាណ ៤៣.៥ លានដុល្លារ ក្រោមជំនួយប្រាក់កម្ចីរបស់ប្រទេសចិន និងបានដាក់ឲ្យប្រើប្រាស់នៅឆ្នាំ២០១០កន្លងទៅ៕

អត្ថបទ៖ សុផល