ឡានស៊េរីកប់រឹបអូសពីកូនប្រធានាធិបតីម្នាក់ ត្រូវបានគេយកដាក់ដេញថ្លៃ

2019-10-02 03:25:03
ចំនួនមតិ 0 | ចំនួនចែករំលែក 0

ចន្លោះមិនឃើញ

បណ្ដុំរថយន្តស៊េរីទំនើបៗដែលរឹបអូសពីកូនប្រុសប្រធានាធិបតីនៃប្រទេស Equatorial Guinea ត្រូវបានគេយកដាក់លក់ដេញថ្លៃនៅក្នុងប្រទេសស្វីស។ រថយន្តគឺត្រូវបានរឹបអូសដោយសមត្ថកិច្ចប្រទេសស្វីស ជាផ្នែកមួយនៃការស៊ើបអង្កេតស៊ីជម្រៅដល់ Teodorin Nguema Obiang ផ្ទាល់។

Teodorin Nguema Obiang គឺជាអនុប្រធានាធិបតីនៃឪពុករបស់ខ្លួន គឺលោក Teodoro Obiang Nguema ដែលបានដឹកនាំប្រទេស Equatorial Guinea អស់រយៈពេល ៤០ ឆ្នាំមកហើយ។ រថយន្តចំនួន ២៥ គ្រឿងនៃរថយន្តទាំងអស់របស់លោក Teodorin ត្រូវបានគេយកដេញថ្លៃនៅក្លឹបវាយកូនហ្គោលមួយក្បែរទីក្រុង Geneva កាលពីថ្ងៃអាទិត្យ។

ក្នុងចំណោមនោះមានរថយន្ត Lamborghini, Ferrari, Bentley និង Rolls-Royce ដែលលក់បានសរុបប្រមាណ ២៧ លានដុល្លារ។ ទឹកប្រាក់ចំនួន ២៣ លានដុល្លារ នឹងត្រូវបញ្ចូលក្នុងគម្រោងកិច្ចការសង្គមនៅក្នុងប្រទេស Equatorial Guinea។

រថយន្តដែលកម្រជាងគេក្នុងចំណោមរថយន្តដែលដេញថ្លៃ គឺជា Lamborghini Veneno Roadster ដែលត្រូវបានលក់ចេញក្នុងតម្លៃ ៨,៣ លានដុល្លារ ទៅឲ្យអតិថិជនម្នាក់។ វាជាកំណត់ត្រាតម្លៃថ្មីមួយសម្រាប់រថយន្ត Lamborghini។

និយាយអំពីលោក Teodorin វ័យ ៥១ ឆ្នាំឯណោះវិញ ត្រូវបានស្ថិតក្រោមការស៊ើបអង្កេតរបស់ព្រះរាជអាជ្ញាស្វីស ចំពោះការលាងលុយខ្មៅ និងប្រើមូលនិធិសាធារណៈដោយមិនត្រឹមត្រូវ ប៉ុន្តែរឿងក្ដីនេះត្រូវបានរំសាយចោលកាលពីខែកុម្ភៈ។ ព្រះរាជអាជ្ញានិយាយថាការបិទការស៊ើបអង្កេតនេះ ជាផ្នែកមួយនៃការយល់ព្រមរបស់ Teodorin ក្នុងការលក់រថយន្តរបស់ខ្លួនដើម្បីដល់កម្មវិធីសង្គមក្នុងប្រទេសខ្លួន៕

ចុចអាន ៖ រថយន្តមួយផលិតដោយចិន មិនចាញ់ Rolls-Royce សូម្បីមេដឹកនាំចិនក៏ជិះ

ប្រភព៖ BBC ប្រែសម្រួល៖ សុខហេង