អតីតតារាចម្រៀងឡើងងារជំទាវ ផាន់ ម៉ូនីកា ជួយជំទាវ ម៉ែន ភក្ដី ធ្វើបុណ្យធំបួងសួងឲ្យប្រជាពលរដ្ឋខ្មែរគេចផុតពី Coronavirus

2020-01-30 07:01:38
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅព្រឹកមិញនេះអតីតតារាចម្រៀងផលិតកម្មសាន់ដេ ដែលបច្ចុប្បន្នជា ជំទាវ ផាន់ ម៉ូនីកា បានធ្វើពិធីបុណ្យធំរាប់បាត្រព្រះសង្ឃចំនួន ៩៩៩អង្គ សុំសេចក្ដីសុខចម្រើនឲ្យខ្លួនឯង និងប្រជាពលរដ្ឋខ្មែរទាំងអស់ គេចផុតពីជំងឺកាចសាហាវ Coronavirus។

ពិធីនេះ ប្រារព្ធធ្វើនៅនឹងហាង "កាកាសុគីស៊ុប" របស់លោកជំទាវតែម្ដង។ ជំទាវ ផាន់ ម៉ូនីកា ប្រាប់ថា ពិធីនេះធ្វើក្រោមការផ្ដួចផ្ដើមគំនិតរបស់លោកជំទាវ ម៉ែន ភក្ដី ហុក ឡងឌី ហើយលោកជំទាវ បានចូលរួមធ្វើអមជាមួយដោយក្នុងនោះបាននិមន្តព្រះសង្ឃមកពីច្រើនវត្តសរុបចំនួន ៩៩៩អង្គ មកធ្វើពិធីសាសនា និងថ្វាយចង្ហាន់ដល់ព្រះសង្ឃ។

នេះមិនមែនជាលើកទី១ទេ ប៉ុន្តែតាមអតីតតារាចម្រៀងរបស់សាន់ដេរូបនេះ បញ្ជាក់ថា លោកជំទាវផ្ទាល់ និងជំទាវ ហុក ឡងឌី បានធ្វើជារឿយ ជាក់ស្ដែងថ្មីៗនេះ ក៏ទើបតែនឹងធ្វើពិធីហៅលោកអ៊ុំ ពូៗ តាៗដែលប្រកបរបរធាក់ស៊ីក្លូមកពិសាបាយជុំគ្នា និងចែកទានផង។ ដោយឡែកថ្ងៃនេះ ពិសេសជាងពេលមុន ដែលធ្លាប់តែក្នុងទ្រង់ទ្រាយតូចមានព្រះសង្ឃត្រឹម ៣០០-៤០០អង្គ ប៉ុន្តែលើកនេះ គឺមានព្រះសង្ឃជិត ១០០០អង្គ មកពីស្ទើរគ្រប់វត្តក្នុង និងក្បែរខាងរាជធានី។

“នេះជាកម្មវិធីធំរបស់លោកជំទាវ ម៉ែន ភក្ដី ហុក ឡងឌី ហើយនាងខ្ញុំគ្រាន់តែចូលរួមក្នុងចំណែកតូចមួយ...ហើយកម្មវិធីនេះ គឺឧទ្ទិសកុសលដល់បុព្វការីជនដែលចែកឋាន និងសុំសេចក្ដីសុខសប្បាយ រកស៊ីមានបាន ហើយមួយវិញទៀត ឥឡូវនេះប្រទេសជាច្រើន ក៏យើងមានកម្ពុជាយើងដែរ កំពុងប្រឈមនឹងជំងឺកាចសាហាវ Coronavirus អីចឹងហើយ ជួសមុខឲ្យលោកជំទាវ នាងខ្ញុំសូមបួងសួងឲ្យបងប្អូនប្រជាពលរដ្ឋខ្មែរយើងទាំងអស់បានសុខសប្បាយ និងគេចផុតពីជំងឺ Corona នេះទាំងអស់គ្នា!”។ ផាន់ ម៉ូនីកា ថ្លែង។

ជំទាវ ផាន់ ម៉ូនីកា គឺជាតារាចម្រៀងផលិតកម្មសាន់ដេ ដែលក្រោយពីប្រឡូកសិល្បៈជាច្រើនឆ្នាំ ក៏បានងាកមកប្រឡូកក្នុងវិស័យជំនួញវិញ។ នៅឆ្នាំ ២០១២ ជំទាវបានបើកហាង "កាកាសូគីស៊ុប" នៅកោះពេជ្រ ហើយមកទល់បច្ចុប្បន្នបានពង្រីកសាខាបានមួយកន្លែងនៅម្ដុំផ្សារដើមគរ។ មមាញឹកនឹងការងារជំនួញ កាន់តែច្រើន បន្តិចម្ដងៗ ផាន់ ម៉ូនីកា ក៏កាន់តែឃ្លាតឆ្ងាយពីការងារសិល្បៈ។

លុះមួយឆ្នាំក្រោយមក បន្ទាប់ពីរៀបមង្គលការជាមួយឯកឧត្ដម គង់ សុខម៉េង មានតួនាទីជាជំនួយការផ្ទាល់របស់សម្ដេចក្រឡាហោម ស ខេង មកលោក ជំទាវ ក៏បានដាច់ឈឹងជាមួយសិល្បៈតែម្ដង ដោយសារតែមានការមមាញឹកច្រើនក្នុងមុខរបររកស៊ី។ បន្ទាប់ពីបើកដំណើរបានជិត១០ឆ្នាំ អតីតតារាចម្រៀងបាន បង្ហើបថា គ្រោងនឹងពង្រីកសាខាហាងរបស់នាងថែមទៀតនាពេលខាងមុខ ដោយបច្ចុប្បន្ន កំពុងសិក្សាទីផ្សារ។

ទីតាំងអាទិភាពសម្រាប់ការពង្រីកបន្ថែមសាខាហាងស៊ូគីរបស់លោកជំទាវ គឺផ្ដោតទៅលើផ្សារទំនើប ដូច្នេះហើយ បើទោះជាកន្លងមកធ្លាប់បង្ហើបថាចង់ងាកទៅការងារសិល្បៈវិញខ្លះ ប៉ុន្តែមកដល់ពេលនេះ ផែនការនោះប្រហែលទៅមិនរួចឡើយ។ យ៉ាងលោក ជំទាវ បញ្ជាក់ថា នៅតែរក្សាទំនាក់ទំនងជាមួយមិត្តក្នុងសិល្បៈ និងចេញមកតាមកម្មវិធីនានាជារឿយៗដដែល៕