វិចិត្រសាល Sra'Art បើកការតាំងបង្ហាញសិល្បៈ ចុងសប្ដាហ៍នេះ!
- 2020-06-26 04:28:21
- ចំនួនមតិ 0 | ចំនួនចែករំលែក 0
វិចិត្រសាល Sra'Art បើកការតាំងបង្ហាញសិល្បៈ ចុងសប្ដាហ៍នេះ!
ចន្លោះមិនឃើញ
បន្ទាប់ពីបិទទ្វារមួយរយៈក្នុងអំឡុងពេលការរីករាលដាលនៃជំងឺកូវីដ-១៩ វិចិត្រសាល Sra'Art (ស្រាអាត) នឹងបើកការតាំងពិព័រណ៍លើកដំបូងរបស់ខ្លួន ក្នុងវគ្គ "ទំនាក់ទំនងមនុស្ស" ដែលគ្រោងនឹងមានការចូលរួមពីសិល្បករជាច្រើន នាថ្ងៃសៅរ៍ ទី២៧ ខែមិថុនា ចុងសប្ដាហ៍នេះ។
ការបើកការតាំងបង្ហាញសិល្បៈនេះ មានចំណងជើងថា "Make a Point!" ដែលនឹងបង្ហាញនូវរូបភាពរបស់ស្រ្ដីខ្មែរ។ ស្ទីលនៃការបង្កើតសិល្បៈរបស់វិចិត្រករ Bruno KOK អាចនឹងយកទៅប្រៀបធៀបជាមួយនឹង "Pixel Art" ប៉ុន្តែតាមពិត គាត់ទទួលបានគំនិតពីទ្រឹស្ដីចំណុចនិយម ដែលជាបច្ចេកទេសនៃការគូរគំនូរ ចាប់ផ្ដើមឡើងដោយ Georges Seurat និង Paul Signac នៅទីក្រុងប៉ារីស កាលពីពាក់កណ្ដាលទសវត្សឆ្នាំ ១៨៨០។ ពណ៌ទាំងនេះ នឹងរំលេចចេញជារូបភាពអស្ចារ្យមួយ តាមភ្នែករបស់អ្នកមើល ជាជាងរូបភាពដែលបង្កើតដោយការលាយពណ៌ចម្រុះនៅលើក្ដារលាយពណ៌។
សម្រាប់លោក KOK ចំណុចនីមួយៗ រង្វង់ ពពុះ ឬ Pixel ទាំងនេះ គឺជានិមិត្តរូបនៃអាតូមនៅក្នុងពិភពមីក្រូទស្សន៍ ក៏ដូចជា ភព និងប្រព័ន្ធរវាងផ្កាយរណបក្នុងលំហអាកាសផងដែរ។ ផ្ទាំងគំនូរទាំងនេះ ឆ្លុះបញ្ចាំងពីការផ្លាស់ប្ដូររវាងពិភពដ៏តូចៗ ទៅនឹងពិភពដ៏ធំសម្បើម ផ្ដល់នូវទិដ្ឋភាពសម្រាប់អ្នកទស្សនា ដូចជានៅក្នុងសុបិន។ លោកប្រើជក់ ដើម្បីចាប់ផ្ដើមគូសគំនូរដោយប្រើប្រាស់ពណ៌ចម្បង និងបន្ទាប់ពីការពិនិត្យទៅលើរូបភាពក្នុងកុំព្យូទ័រ។ ដូចគ្នាទៅនឹងអាតូម ដែលផ្គុំគ្នាបង្កើតបានជារាងកាយមួយ រូបភាពទាំងនេះ បណ្ដុះគំនិតការប្រៀបធៀបនៃភាពស្មុគស្មាញរបស់់មនុស្ស ទោះបីក្បាច់នៃការរចនាគំនូរ គ្រាន់តែជាភាពសាមញ្ញមួយក៏ដោយ។
លោក KOK មានបំណងចង់ឲ្យពណ៌របស់គាត់ ក្លាយជាការឆ្លុះបញ្ចាំងនៃព្រលឹង និងមិនមានការបែងចែក "ពណ៌សម្បុរ" ទេ គ្មានពណ៌ណាមួយដែលគេចាត់ទុកថា មានតម្លៃ ឬគ្មានតម្លៃទេ។ KOK ប្រើតែប្រាំបីពណ៌ប៉ុណ្ណោះក្នុងគំនូរគាត់ ហើយមិនលាយបញ្ចូលគ្នាឡើយ ប៉ុន្តែនៅពេលពណ៌ទាំងនេះនៅរួមគ្នា វានឹងបង្កើតជាទិដ្ឋភាពមួយ បង្ហាញចេញតាមការមើលដោយផ្ទាល់ មិនមែនការរលាយពណ៌ចូលគ្នា។ ការយល់ឃើញរបស់អ្នកមើល គឺអាស្រ័យទៅលើទីតាំងនៃពណ៌ដែលនៅជុំវិញ ហើយដែលជាស្រទាប់លើផ្ទាំងគំនូរ ចេញពីការប្រៀបធៀបរបស់គាត់ផ្ទាល់ អំពីទំនាក់ទំនងរបស់មនុស្ស។
ហេតុអ្វីមានតែគំនូរស្រ្ដី? លោក KOK មានអារម្មណ៍ថា យើងសព្វថ្ងៃ រស់នៅក្នុងសង្គមមួយដែលស្រ្ដីនៅតែទាមទាររកភាពស្មើគ្នា ហើយតែងទទួលការបដិសេធ។ គាត់លើកឡើងថា ឋានៈរបស់ស្រ្ដីនៅលើពិភពលោក រួមទាំងអាស៊ីអាគ្នេយ៍ផងដែរ ត្រូវបានគេចាត់ទុកដូចជាទំនិញ ឬពានរង្វាន់បុរស ដោយផ្អែកតែលើរូបភាពខាងក្រៅ។ សិល្បៈ "pixels/ចំណុច" របស់គាត់ គឺជាតំណាងនៃព្រលឹងរបស់ស្រ្ដី រួមទាំងការខកចិត្ត និងបំណងប្រាថ្នារបស់ស្រ្ដីនៅក្នុងសង្គម។
តើលោក Bruno KOK ជានរណា?
ចេញពីបទពិសោធន៍ក្នុងសិល្បៈ punk rock នៅទសវត្ស ៨០ និង ៩០ លោក KOK គឺជាតន្រ្ដីករ និងអ្នកគូររូបតុក្កតាដែលទទួលការបណ្ដុះបណ្ដាលនៅ Beaux arts de Bordeaux និង Les Arts Appliques de la Gironde។ ដោយសារតែកំណើននៃការគូសគំនូរជីវចលបែបឌីជីថល បានធ្វើឲ្យគំនូរ KOK បាត់បង់ប្រជាប្រិយភាព។ គាត់បានវិលត្រឡប់ទៅការគូសដៃវិញនៅឆ្នាំ ២០០៦ ហើយចាប់ផ្ដើមជាមួយ គំនូរជីវចលបែបកំប្លែង បន្ទាប់មកគំនូរបែបទំនើបដែលបង្ហាញពីបញ្ហា និងសិទ្ធិស្រ្ដី។ គាត់ធ្លាប់ដាក់តាំងបង្ហាញស្នាដៃនៅឯប្រទេសបារាំង និងកន្លែងមួយចំនួនទៀតទូទាំងពិភពលោក ហើយការតាំងពិព័ណ៌ថ្មីៗនេះ គឺនៅវិទ្យាស្ថានបារាំងហ្រ្វង់ស័រ នៅទីក្រុងបាងកក ប្រទេសថៃ៕