ក្មេងស្រីកម្សត់! ខ្ចីកង់ក្លឹបជិះក្បែរ១០គីឡូរាល់ថ្ងៃ ទៅហាត់បាល់

2021-02-23 06:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ម៉ាក់ ស្រីរ័ត្ន ជាអ្នកចាំទីរបស់ក្លឹបក្រុមបាល់ទាត់នារីភ្នំពេញក្រោន បច្ចុប្បន្នមានប្រវត្តិកម្សត់គួរឲ្យអាណិត ធ្លាប់ខ្ចីកង់ក្លឹបជិះ ពីផ្ទះជួលម្ដុំផ្លូវ ២០០២ ទៅកាន់ទីលាន RSN ដែលមានចម្ងាយក្បែរ១០គីឡូម៉ែត្រ។

អ្នកចាំទីជម្រើសជាតិកម្ពុជារូបនេះកើតថ្ងៃទី០២ ខែកុម្ភៈ ឆ្នាំ២០០២ មានស្រុកកំណើតនៅខេត្តកំពង់ចាម។ យុវតីគួរឲ្យអាណិតរូបនេះមានឪពុកឈ្មោះ ម៉ិល សុផេន និងម្ដាយឈ្មោះ សូ ធីតា មុខរបរអ្នកទាំងលក់បន្លែមុខរោងចក្រនៅម្ដុំផ្លូវ២០០២ ។ ពីមុនឪពុករបស់យុវតីរូបនេះជាអ្នករត់កង់បីឥណ្ឌា (ជួលគេ)។

ចូលលេងឲ្យភ្នំពេញក្រោនជាមួយក្រុមបាល់ទាត់នារី នៅដើមឆ្នាំ២០១៨ បានក្លាយខ្លួនជាអ្នកចាំទីដៃទី១រហូតមក។ ប៉ុន្តែសួរថា មានអ្វីជិះទៅហាត់កាលអំឡុងនោះ ? គឺគ្មានទេ! ដោយសុំមិត្តភ័ក្ដិជិះ(ម៉ូតូ) ទៅជាមួយ ក្រោយមកពេលមិត្តម្នាក់នោះឈប់ហាត់បាល់ ស្រីរ័ត្ន មិនបានបោះបង់ ចង់ក្លាយជាកីឡាការិនីជម្រើសជាតិចោលឡើយ ពោលគឺតស៊ូខ្ចីកង់ក្លឹប ដើម្បីជាមធ្យោបាយធ្វើដំណើរបានទៅហាត់បាល់ទាត់នៅទីលាន RSN ជិះពីផ្ទះជួលម្ដុំផ្លូវ២០០២ ទៅមករាល់ថ្ងៃ។ ថ្ងៃខ្លះហាត់ដល់យប់ ហើយជិះកង់តែម្នាក់ឯងមកផ្ទះវិញ ដែលស្រមៃមើលទៅពិតជាបញ្ជាក់ពីការតស៊ូ ដោយសារតែទឹកចិត្តស្រលាញ់។

ក្មេងស្រីវ័យ១៨ឆ្នាំដ៏កម្សត់រូបនេះ បច្ចុប្បន្នបានជាប់ជម្រើសជាតិបាល់ទាត់នារីដូចក្ដីស្រមៃរួចហើយ។ ប៉ុន្តែឪពុកម្ដាយរបស់គេ កំពុងចង់ឲ្យគេផ្ដោតទៅលើការសិក្សាជាជាងលេងបាល់ទាត់។ ងាកមកកាន់ការធ្វើដំណើរបច្ចុប្បន្ន ស្រីរ័ត្ន មានម៉ូតូមួយគ្រឿង សម្រាប់ទៅហាត់បាល់ហើយ ប៉ុន្តែម៉ូតូនោះគឺជារបស់អ៊ី ដែលឲ្យខ្ចីទេ ដោយសារតែឃើញក្មេងស្រីនេះគួរឲ្យអាណិតពេក។