ស្ទើរ​តែ​មិន​ជឿ​នឹង​លទ្ធផល​អម្បាញ់មិញ​នេះ ដោយ​ក្រុម YouWillKnow អស់​ឱកាស​ការពារ​តំណែង​ជើងឯក CCC Final ក៏​ដូចជា​អស់​ឱកាស​ទៅ​ប្រកួត​បន្ត​ក្នុង​ព្រឹត្តិការណ៍​ប្រកួត​អន្តរជាតិ MATIC 2015 នៅ​ប្រទេស​ចិន​ខាង​មុខ​នេះ​ហើយ ក្រោយ​ពី​ទទួល​បរាជ័យ​ក្រោម​ថ្វីដៃ​ប្រយុទ្ធ​មិត្ត​រួម Clan ក្រុម Hurricane Shooters ក្នុង​លទ្ធផល ៥ ទល់​នឹង ១ នៅ​វគ្គ​ពាក់​កណ្ដាល​ផ្ដាច់ព្រ័ត្រ។

ជាមួយ​នឹង​លទ្ធផល​នេះ Hurricane Shooters ទទួល​បាន​ឱកាស​ប្រកួត​ដណ្ដើម​ពានរង្វាន់ ក៏​ដូចជា​ប្រាក់​រង្វាន់​ពាន់​ដុល្លារ និង​តំណែង​ជើងឯក​ប្រចាំ​រាជធានី​ភ្នំពេញ រួម​ទាំង​កៅអី​សម្រាប់​ប្រកួត​នៅ​ថ្ងៃ​ស្អែក​រួច​ជា​ស្រេច​ក្នុង​ព្រឹត្តិការណ៍​ប្រកួត CCC Final ដែល​ជា​ការ​ប្រកួត​កាត់​សេចក្ដី ស្វែងរក​ជើងខ្លាំង​មាន​សមត្ថភាព​ប្រយុទ្ធ​ពិត​ប្រាកដ​ចំនួន ២ ក្រុម​ធ្វើ​ជា​តំណាង​ជើងខ្លាំង​កីឡា E-Sport ក្នុង​ការ​ចូលរួម​ព្រឹត្តិការណ៍​ប្រកួត​ស្វែងរក​ជើងខ្លាំង​អន្តរជាតិ MATIC 2015 នៅ​ប្រទេស​ចិន។

YouWillKnow 0 - 1 HurricaneShooter YouWillKnow 0 - 2 HurricaneShooter YouWillKnow 0 - 3 HurricaneShooter YouWillKnow 0 - 4 HurricaneShooter YouWillKnow 1 - 4 HurricaneShooter YouWillKnow 1 - 5 HurricaneShooter

ទោះបីជា​អស់​ឱកាស​ការពារ​តំណែង​ជើងឯក CCC Final ប៉ុន្តែ​សមាជិក​ក្រុម YouWillKnow មិន​មាន​ការ​សោកស្ដាយ ឬ​អាក់អន់ស្រពន់ចិត្ត​អ្វី​ទេ ដោយ​បាន​បញ្ជាក់​ថា សមត្ថភាព​ប្រយុទ្ធ​របស់​ពួក​គេ​នៅ​មាន​កម្រិត ហើយ YouWillKnow បាន​ប្រឹងប្រែង​អស់​ពី​សមត្ថភាព​ហើយ។

Blue X ប្រធាន​ក្រុម YouWillKnow បាន​និយាយ​ថា "អត់​មាន​អារម្មណ៍​ស្ដាយ ឬ​អាក់អន់ស្រពន់ចិត្ត​អី​ទេ​បង ព្រោះ​ពួក​ខ្ញុំ​បាន​ប្រឹង​អស់​ពី​សមត្ថភាព​ហើយ។ ម៉្យាង​វិញ​ទៀត YouWillKnow ឬ Hurricance Shooters មួយ​ណា​ឈ្នះ​ក៏​មិន​ជា​បញ្ហា​អី​ដែរ ព្រោះ​សុទ្ធ​តែ​មក​ពី Clan The Murderer ដូចគ្នា​ហ្នឹង"។

មិន​ត្រឹម​មិន​មាន​ការ​សោកស្ដាយ​ជាមួយ​នឹងលទ្ធផល​ដ៏​គួរ​ឲ្យ​រន្ធត់​នេះ​ទេ តែ YouWillKnow ថែម​ទាំង​បាន​ជូនពរ​ដល់​ក្រុម Hurricane Shooters ឲ្យ​បាន​ឈ្នះ​សម្រាប់​វគ្គ​ប្រកួត​ផ្ដាច់ព្រ័ត្រ​ដែល​នឹង​ចាប់ផ្ដើម​ក្នុង​ពេល​បន្តិច​ទៀត​នេះ និង​បន្ត​ជាប់​ជា​ជើងខ្លាំង​តំណាង​ប្រទេស​កម្ពុជា​សម្រាប់ MATIC 2015 ផង​ដែរ។

ជា​ចុង​ក្រោយ YouWillKnow ក៏​បាន​អរគុណ​ដល់​ប្រិយមិត្ត​អ្នក​គាំទ្រ​ក្រុម YouWillKnow ផ្ទាល់ ក៏​ដូចជា​អ្នក​គាំទ្រ Clan The Murderer ទាំងអស់​ដែល​តែងតែ​គាំទ្រ​និង​ផ្ដល់​កម្លាំង​ចិត្ត​ឲ្យ​ពួកគេ​មាន​អារម្មណ៍​ថា​កក់ក្ដៅ​មែនទែន​ជា​រៀងរាល់​ការ​ប្រកួត។

ចំណែក​ឯ TongTong ប្រធាន​ក្រុម Hurricane Shooters វិញ​ហាក់​ដូចជា​មិន​សូវ​សប្បាយ​ចិត្ត​សោះ​ក្រោយ​ពី​បាន​បំបាក់​ក្រុម YouWillKnow រួច។ TongTong និយាយ​ថា "ខ្ញុំ​អារម្មណ៍​សប្បាយ លាយឡំ​ជាមួយ​នឹង​ការ​សោកស្ដាយ​ផង​ដែរ​បង ព្រោះ YouWillKnow មិន​ត្រឹម​តែ​ជា​មិត្ត​រួម Clan ទេ តែ​ពួកគេ​ថែម​ទាំង​ជា​មិត្ត​ជិតស្និទ្ធ​របស់ Hurricane Shooters ផង​ដែរ"។

ចុះ​អលណប់​វិញ​មាន​អារម្មណ៍​យ៉ាង​ណា​ដែរ​ចំពោះ​លទ្ធផល​ខាង​លើ​នេះ?

អត្ថបទ៖ ភីឆាយ