មេ Xiaomi ដាក់នាមឲ្យទូរសព្ទខ្លួនឯងថា “ស្តេចនៃស្មាតហ្វូន Android”

2021-04-02 10:12:26
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Lei Jun (លី ជុន) នាយកប្រតិបត្តិក្រុមហ៊ុនបច្ចេកវិទ្យា Xiaomi បានលើកឡើងថា ស្មាតហ្វូន flagship ម៉ូឌែល Mi 11 Ultra របស់លោកគឺជា “ស្តេចនៃស្មាតហ្វូន Android”។

ការថ្លែងដោយទំនុកចិត្តខ្ពស់ខាងលើអាចនិយាយបានថា Mi 11 Ultra ដែលទើបនឹងបង្ហាញខ្លួននេះគឺជាស្មាតហ្វូនដែលនឹងត្រូវប្រកួតជាមួយក្រុមហ៊ុនដទៃទៀតដែលត្រៀមនឹងចេញលក់ក្នុងឆ្នាំ ២០២១។

លោក Lei Jun កំពុងកាន់ Mi 11 Ultra

គេសង្កេតឃើញថាមួយឃ្លាយ៉ាងខ្លីនេះមានការគាំទ្រច្រើនពីសំណាក់អ្នកវាយតម្លៃផលិត (review) ល្បីៗលើយូធូប បានពោលសរសើរដូចពាក្យ CEO លើកឡើងខាងលើពិតមែន។ មិនតែប៉ុណ្ណោះ ស្មាតហ្វូន Mi 11 Ultra បានធ្វើឲ្យរង្គើដល់បណ្ដាអ្នកតាមដានវិស័យបច្ចេកវិទ្យា ព្រោះតែសមត្ថភាពខ្លាំងរបស់វា។

Xiaomi Mi 11 Ultra ទាំងពីរពណ៌

និយាយដល់ចំណុចនេះ សូមបន្តតាមដាន Specs ដែល Xiaomi បំពាក់លើអាវុធរបស់ខ្លួនគឺថា កន្លែងណាក៏ខ្លាំងដែរមានដូចជា អេក្រង់ពីរដាក់ក្នុងទូរសព្ទតែមួយ(ផ្ទៃខាងក្រោយក៏មាននៅជាប់នឹងកាមេរ៉ា) ជារចនាបថថ្មីសន្លាងមិនធ្លាប់មានពីមុន។ នៅខាងក្នុងអេក្រង់ហ្នឹងទទួលបានពិន្ទុ A+ ពីខាង DisplayMate និងថែមទាំងមានមុខងារ HDR10+ រួមទាំង Dolby Vision មានន័យថា ច្បាស់ត្រជាក់ភ្នែកដូចទូរទស្សន៍អ៊ីចឹង។

អេក្រង់នោះប្រភេទ AMOLED ទំហំ 6.81អ៊ិញមានកម្រិត refresh rate ដល់ទៅ 120Hz បង្ហាញបាន 1440p+ resolution ស្រោបដោយកញ្ចក់ការពារ Gorilla Glass Victus។ Mi 11 Ultra មានមុខងារការពារទឹកនិងធូលី កម្រិតស្តង់ដា IP68 អាចយកទៅត្រាំក្នុងទឹកស៊ូបាន ១ម៉ែត្រកន្លះរយៈពេល ៣០ នាទីគ្មានបញ្ហា។

កាមេរ៉ាលើ Mi 11 Ultra

ដោយឡែក បន្ទះឈីបវិញខ្ពស់ផុតលេខគឺ Snapdragon 888 បំពាក់ថាមពលថ្មទំហំ 5000mAh អាចសាកថ្មលឿនខ្លាំងណាស់តាមខ្សែ និងគ្មានខ្សែកម្លាំងជញ្ជូនថាមពលដូចគ្នាគឺ 67W សាកតែ ៣៦ នាទីពេញ ១០០% ពិតជាលឿនដូចផ្លែកបន្ទរមែន។ បន្ថែមពីនេះវាក៏មាន មុខងារសាកថ្មទៅឧបកណ៍ដទៃក្នុងល្បឿន10W ផងដែរ។ វាក៏មានប្រើបច្ចេកវិទ្យា Bluetooth 5.2, Wi-Fi 6E, NFC, IR blaster និងទ្រទ្រង់សេវា 5G ចំពោះស៊ីមទាំងពីរផងដែរ។

កន្លែងខ្លឹមជាងគេនោះគឺ សេនស័រកាមេរ៉ាលំដាប់ World Premium ផលិតដោយ Samsung ដែលមានទំហំភិចស៊ែលធំជាងគេបំផុត។ ក្នុងបទបង្ហាញ 120x zoom បានបញ្ជាក់ច្បាស់ថា វាពិតជាឡេនដែលកម្រមែន។ អត្ថប្រយោជន៍នៃសែនស័រដ៏ធំនេះ ផ្ដល់ឱ្យមុខងារទប់លំនឹងរូបភាព OIS មាន Dual Pixel Pro ដែលធ្វើឲ្យការចាប់ល្បឿន autofocus បានរហ័សនិងជួយរូបថតផលិតចេញមកមានកម្រិតភាពដិតច្បាស់ល្អ លើសពីនេះក៏មាន Smart ISO Pro ដែលអាចចាប់យករូបភាព HDR បានភ្លាមៗដែរ។

មិនទាន់អស់ទេ កាមេរ៉ាក្រោយរបស់ Mi 11 Ultra បំពាក់លែន ៣ គ្រាប់។ ទី១ គឺឡេន wide ទំហំ 50 MP និង ultrawide ទំហំ 48 MP និងលែនទី៣ ជា periscope telephoto ទំហំ 48MP មាន optical zoom 5x និង hybrid zoom 10x ហើយវាក៏អាចពង្រីកដល់កម្រិត 120x ឯណោះ។ ឡេនទី ៣ periscope telephoto នោះអាចទ្រទ្រង់ការថតវីដេអូកម្រិត 8K 24fps ហើយលែនទាំង៣នេះតែម្ដងគឺមានមុខងារទ្រទ្រង់ការថតក្នុងពេលយប់បានគ្រប់ឡេន ហើយច្បាស់ដូចថ្ងៃ។

ចំណុចពិសេសបន្ថែមនៃប្រព័ន្ធកាមេរ៉ាក្រោយនេះ គឺមានអេក្រង់ខ្នាតតូចប្រភេទ AMOLED ទំហំ 1.1អ៊ិញ ប្រើសម្រាប់ឱ្យអ្នកប្រើអាចឃើញរូបខ្លួនឯងពេលថតរូប selfie។ ចំណែកឯកាមេរ៉ាមុខប្រើប្រាស់ឡេនទូលាយទំហំ 20MP Wide angle ងាយស្រួលពេលថតជុំមិត្តភក្តិ។

ស្មាតហ្វូននេះនឹងចេញលក់លើទីផ្សារសកលឆាប់ៗ។ សម្រាប់ប្រទេសចិន នឹងចេញលក់នៅថ្ងៃទី ២ ខែមេសា តម្លៃដាក់លក់ប្រមាណ ៩១៥ ដុល្លារចំពោះ RAM 8GB មេម៉ូរី 256GB និងមានតម្លៃប្រមាណ ១០៦៥ដុល្លារ ចំពោះ RAM 12GB មេម៉ូរី 512GB។ មាន ៣ ពណ៌ឱ្យជ្រើសរើសដែរគឺ ពណ៌ សនិងខ្មៅ ហើយពណ៌ពិសេសមួយទៀតគឺ Marble Ceramic ជាប្រភេទពណ៌ពិសេសសម្រាប់ special edition។

រំឮកបន្តិចថា កាលពី ៣ ថ្ងៃមុនកំពូលស្មាតហ្វូនជំនាន់ចុងក្រោយបង្អស់របស់ក្រុមហ៊ុនបានប្រកាសចេញមាន ៣ ម៉ូឌែលមានដូចជា Mi 11 Lite (កូនពៅ), 11 Pro (កូនបន្ទាប់ពៅ) និង 11 Ultra (កូនបង)៕

ទស្សនាវីដេអូខាងក្រោម៖