ពូកែៗណាស់! និស្សិត ៨ នាក់ឈ្នះជ័យលាភី និងបានទៅហាត់ការ ២ ខែនៅប្រទេសម៉ាឡេស៊ី
- 2021-11-26 03:19:17
- ចំនួនមតិ 0 | ចំនួនចែករំលែក 0
ពូកែៗណាស់! និស្សិត ៨ នាក់ឈ្នះជ័យលាភី និងបានទៅហាត់ការ ២ ខែនៅប្រទេសម៉ាឡេស៊ី
ចន្លោះមិនឃើញ
កម្មវិធីអភិវឌ្ឍន៍និស្សិតសាកលវិទ្យាល័យ (USDP) ត្រលប់មកវិញហើយដោយមានក្រុមចំនួន ៣ ក្រុមពីវគ្គពាក់កណ្ដាលផ្ដាច់ព្រ័ត្រ ឡើងធ្វើបទបង្ហាញដំណោះស្រាយឌីជីថល ជូនថ្នាក់ដឹកនាំក្រុមហ៊ុន Heineken Cambodia ក្រុមហ៊ុន Prudential Cambodia និងក្រុមហ៊ុន Smart Axiata ។
ក្រុម Smart ដែលមាននិស្សិតថ្នាក់បរិញ្ញាបត្រចំនួន ៨ នាក់បានធ្វើបទបង្ហាញគំនិតច្នៃប្រឌិតមួយ ដើម្បីជំរុញការបញ្ចូលទឹកប្រាក់តាមបែបឌីជីថល ត្រូវបានជ្រើសរើសជាជ័យលាភីពានរង្វាន់ CEO Challenge ដោយឈ្នះទឹកប្រាក់ចំនួន ១,៨០០ ដុល្លារ។
ដំណោះស្រាយដែលត្រូវបានបង្កើតឡើងដោយចំណាយពេលត្រឹមតែ ៤៨ ម៉ោងបានធ្វើការវិនិច្ឆ័យដោយ លោក Feiruz Ikhwan នាយកប្រតិបត្តិស្តីទីក្រុមហ៊ុន Smart Axiata លោក Balaji Ravi នាយកផ្នែកហិរញ្ញវត្ថុក្រុមហ៊ុន Prudential Cambodia និង លោក Franco Zhao នាយកផ្នែកឌីជីថលនិងបច្ចេកវិទ្យាក្រុមហ៊ុន Heineken Cambodia។
រង្វាន់ផ្សេងទៀតដែលត្រូវបានប្រគល់ជូនបេក្ខជនក្នុងវគ្គផ្តាច់ព្រ័ត្រនេះរួមមាន៖ ពានរង្វាន់ក្រុមធ្វើបានល្អបំផុតទី២ ជាមួយរង្វាន់ទឹកប្រាក់ចំនួន ១,០០០ ដុល្លារ ហើយក្រុមជ័យលាភីនៃក្រុមធ្វើបានល្អបំផុតទី១ ទទួលបានរង្វាន់ទឹកប្រាក់ចំនួន ១,៤០០ ដុល្លារ។
បេក្ខជនឆ្នើមចំនួន ៨ នាក់នឹងទទួលបានការហាត់ការដែលមានប្រាក់ឧបត្ថម្ភ រយៈពេល ២ ខែនៅឯក្រុមហ៊ុនរបស់ Axiata ក្នុងប្រទេសម៉ាឡេស៊ី។
វគ្គផ្តាច់ព្រ័ត្រ ប្រព្រឹត្តទៅកាលពីថ្ងៃទី ២៤ ខែវិច្ឆិកា ក្រោមអធិបតីភាព ឯកឧត្តមបណ្ឌិតសភាចារ្យ ហង់ ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ឯកឧត្ដម Eldeen Husaini Mohd Hashim ឯកអគ្គរដ្ឋទូតម៉ាឡេស៊ីប្រចាំនៅព្រះរាជាណាចក្រកម្ពុជានិងលោក Dato' Izzaddin Idris ជាប្រធាននិងនាយកប្រតិបត្តិក្រុមនៃ Axiata Group Berhad ។
ថ្លែងក្នុងពិធីប្រគល់ពានរង្វាន់កម្មវិធី SmartEdu USDP រដូវកាលទី ៣ លោក Feiruz Ikhwan មានប្រសាសន៍ថា៖ «កម្មវិធីនេះបង្កើតឡើងក្នុងគោល បំណងផ្តល់សិទ្ធិអំណាចដល់យុវជនកម្ពុជា ជាមួយនឹងជំនាញ សមត្ថភាពច្នៃប្រឌិតផ្នែក បច្ចេកវិទ្យាទំនាក់ទំនងព័ត៌មាន នឹងជួយលើកកម្ពស់សេដ្ឋកិច្ច ឌីជីថលរបស់ប្រទេសកម្ពុជា។»
«កម្មវិធី SmartEdu USDP គឺជាឱកាសដ៏ល្អមួយ សម្រាប់យុវជនកម្ពុជាក្នុងការរៀនជំនាញដោះស្រាយបញ្ហាពិតនានា ក្នុងជីវិត ក្នុងបរិយាកាសជាមួយបច្ចេកវិទ្យាកុំព្យូទ័រ។ អ្នកចូលរួមត្រូវបានលើកទឹកចិត្តឱ្យបង្អាកភាពដដែលៗ គិតត្រិះរិះពិចារណាប្រកបដោយគំនិតច្នៃប្រឌិត និងសម្រេចថ្លឹងថ្លែងហានិភ័យ។ យើងមានមោទនភាពក្រៃលែង ដែលបានដើរតួនាទីក្នុងការជំរុញសក្ដានុពលអ្នកដឹកនាំឌីជីថលរបស់ពួកគេ ព្រមទាំងអភិវឌ្ឍអ្នកដឹកនាំឌីជីថលក្នុងប្រទេសកម្ពុជា។ កម្មវិធីអភិវឌ្ឍន៍និស្សិតសាកលវិទ្យាល័យរយៈ១៣ ថ្ងៃ អាចធ្វើទៅបានតាមរយៈមូលនិធិកសាងសមត្ថភាពស្រាវជ្រាវ និងអភិវឌ្ឍន៍របស់រាជរដ្ឋាភិបាល និងការគាំទ្រដ៏ជ្រាលជ្រៅពីក្រសួង អប់រំ យុវជន និងកីឡា និងក្រសួងប្រៃសណីយ៍ និងទូរគមនាគមន៍។»
កម្មវិធីដែលត្រូវបានដាក់ឱ្យដំណើរការក្នុងឆ្នាំ ២០១៨ ត្រលប់មកព្រះរាជាណាចក្រកម្ពុជាវិញបន្ទាប់ពីបានផ្អាកអស់រយៈពេលពេញមួយឆ្នាំក្នុងឆ្នាំ ២០២០ ដោយសារការរាតត្បាតជំងឺកូវីដ១៩។ ដោយត្រូវបានជ្រើសរើសពីសាកលវិទ្យាល័យចំនួន ១២ កន្លែងនៅទូទាំងប្រទេសកម្ពុជា និស្សិតកម្ពុជាចំនួន ៤៨ នាក់ដំបូងត្រូវបានបែងចែកទៅក្នុងក្រុមចំនួន ៨ ក្រុមចូលរួមកម្មវិធីសិក្ខាសាលាអ្នកដឹកនាំអាជីវកម្មនៅសណ្ឋាគារ Garden City ក្នុងរាជធានីភ្នំពេញ។ ពួកគេបានធ្វើការបន្ថែមលើ ដើម្បីធ្វើឲ្យប្រសើរឡើងនូវជំនាញទំនាក់ទំនង ភាពច្នៃប្រឌិត និងការត្រិះរិះពិចារណា ព្រមទាំងសមត្ថភាពគ្រប់គ្រងអារម្មណ៍ផងដែរ។ អ្នកចូលរួមទាំងអស់បានឆ្លងកាត់បញ្ហាប្រឈមជាច្រើនទាក់ទងនឹងអាជីវកម្មឌីជីថល សិក្ខាសាលា និង ការប្រកួតប្រជែង ដែលពួកគេត្រូវបានជំរុញយា៉ងមឹុងម៉ាត់ និងផ្តល់មតិកែលម្អចំៗដល់គ្នាទៅវិញទៅមក។
សមាជិកក្រុមជ័យលាភីពានរង្វាន់ CEO Challenge យឹម សាលីនដា បានចែករំលែកថា៖ «ទោះបីគេងមិនគ្រប់គ្រាន់អំឡុងពេលចូលរួមក្នុងសិក្ខាសាលា Bootcamp ក៏ដោយ ប៉ុន្ដែកម្មវិធីនេះមានប្រយោជន៍ណាស់ ព្រោះសិក្ខាសាលានេះបង្រៀនលើសពីជំនាញផ្នែកអាជីវកម្មទៅទៀត ខ្ញុំបានរៀនមេរៀនល្អៗជាច្រើន ជាពិសេសនៅពេលធ្វើការងារជាក្រុម។ ការប្រកួតប្រជែងក្នុងកម្មវិធី CEO Challenge គឺជាបទពិសោធន៍ដ៏គួរឱ្យចាប់អារម្មណ៍មែនទែន។ វាពិតជាលំបាកនៅពេលដែលធ្វើការងារ ក្រោមសម្ពាធ និងពេលវេលាកំណត់ ប៉ុន្តែខ្ញុំមិនមានការសោកស្តាយណាមួយទេ ព្រោះកម្មវិធី Bootcamp នេះបានរៀបចំយ៉ាងពេញលេញឱ្យខ្ញុំក្លាយជាអ្នកដឹកនាំនាពេលអនាគត។»
កម្មវិធី SmartEdu USDP ត្រូវបានដាក់ឲ្យដំណើការកាលពីខែតុលា ឆ្នាំ២០១៨ ជាផ្នែកមួយនៃអនុស្សារណៈយោគយល់គ្នាជាមួយនឹងក្រសួងអប់រំ យុវជន និងកីឡា ក្រសួងប្រៃសណីយ៍ និងទូរគមនាគមន៍កម្ពុជា និងក្រុមហ៊ុន Smart Axiata។ ជាផ្នែកមួយនៃអនុស្សារណៈយោគយល់គ្នា ក្រុមហ៊ុន Smart ប្តេជ្ញាវិនិយោគទឹកប្រាក់ចំនួន ១លាន ៥សែនដុល្លារ សម្រាប់រយៈពេល៣ឆ្នាំទៅក្នុងកម្មវិធីចំនួន ២ នៃ SmartEdu រួមមាន៖ កម្មវិធីអាហារូបករណ៍ SmartEdu និងកម្មវិធីអភិវឌ្ឍន៍និស្សិតសកលវិទ្យាល័យ SmartEdu (USDP)។
កម្មវិធី SmartEdu USDP រំពឹងថា នឹងអភិវឌ្ឍគំនិតអាជីវកម្មឌីជីថលល្អបំផុតរបស់ប្រទេសកម្ពុជាបន្ថែមទៀតជាមួយនឹងជំនាញ ដើម្បីជួយជំរុញដល់បច្ចេកវិទ្យាឌីជីថលក្នុងប្រទេសផងដែរ។
សម្រាប់បច្ចុប្បន្នភាពនិងព័ត៌មានបន្ថែមអំពីកម្មវិធី SmartEdu សូមតាមដានទំព័រហ្វេសប៊ុកក្រុមហ៊ុន Smart For Cambodia តាមរយៈ Facebook.com/smartforcambodia និង ww.smartedu.com.kh ៕