ទម្លាយតម្លៃប្រភេទឡាន Jeep ដែលអ្នកស្រី ទី្រ ដាណា ទិញឱ្យកូន
- 2022-01-24 07:25:23
- ចំនួនមតិ 0 | ចំនួនចែករំលែក 0
ទម្លាយតម្លៃប្រភេទឡាន Jeep ដែលអ្នកស្រី ទី្រ ដាណា ទិញឱ្យកូន
ចន្លោះមិនឃើញ
នៅថ្ងៃនេះ ក្នុងបណ្តាញសង្គមកម្ពុជា មានការភ្ញាក់ផ្អើល និងចាប់អារម្មណ៍ខ្លាំងចំពោះការបង្ហោះនៅលើផេករបស់អ្នកស្រី ទ្រី ដាណា ដែលបានទិញរថយន្ត Jeep មួយគ្រឿងជាកាដូសម្រាប់កូនប្រុស។ រថយន្ត Jeep នោះគឺជាម៉ូដែល Wrangler Rubicon ពណ៌ស។
រថយន្ត Jeep Wrangler នេះ បើលក់នៅសហរដ្ឋអាមេរិក គឺមានតម្លៃចាប់ពី ៣ម៉ឺនដុល្លារឡើងទៅ ដោយខុសគ្នាទៅតាម option នីមួយៗ។ ដោយឡែកនៅកម្ពុជា គឺមានតម្លៃខ្ទង់ជាង ៩ម៉ឺនដុល្លារ ដោយសារត្រូវបង់ពន្ធនាំចូល ថ្លៃដឹកជញ្ជូន និងការចំណាយផ្សេងៗ។
រថយន្ត SUV បែប Off-road នេះ បានផលិតឡើងជាមួយសមត្ថភាពពិសេស ខ្លាំងក្លា មាំធន់ជាមួយស្ថានភាពផ្លូវលំបាក ថ្មធំៗ ចុះទឹក ឡើងភ្នំ ចូលព្រៃ កាត់វាល និងការបើកបរក្នុងទីក្រុងក៏មានភាពងាយស្រួល រលូនមិនរលាក់។
រថយន្តនេះ ប្រើម៉ាស៊ីនទាក់បូចំណុះ ២,០លីត្រ ផលិតបានកម្លាំង ២៧០សេះ និងកម្លាំងរមួល ៣៩៩ញ៉ូតុនម៉ែត្រ ជាមួយនឹងប្រអប់លេខអូតូ ៨វគ្គ។ ចំពោះការប្រើប្រាស់សាំង គឺ១០០គីឡូម៉ែត្រស៊ី ១១,២លីត្រ (ក្នុងក្រុង) និង ៩,៨លីត្រ (ក្រៅក្រុង)។
ផ្នែកខាងក្នុងនៃរថយន្ត គឺមានលក្ខណៈសាមញ្ញដៃចង្កូតមានប៊ូតុងចុចបញ្ជា មានកាពីតាស់ ប្រព័ន្ធកម្សាន្ត Touchscreen ងាយស្រួលប្រើប្រាស់ ដែលអាចភ្ជាប់ជាមួយ Apple Car Play និង Android Auto ជាពិសេសបំពាក់ប្រព័ន្ធសំឡេង Alpine ៩គ្រាប់។
ជាមួយគ្នានេះ Jeep Wrangler ក៏បំពាក់ជាមួយប្រព័ន្ធសុវត្ថិភាព ដូចរថយន្តទំនើបមួយចំនួនដែលផលិតក្នុងពេលបច្ចុប្បន្ននេះដែរ ដូចជា ប្រព័ន្ធឱ្យសញ្ញាពេលមានរថយន្តចង់វ៉ាជែង ប្រព័ន្ធព្រមានមុនពេលប៉ះទង្គិចគ្នា ប្រព័ន្ធគ្រប់គ្រងល្បឿន ប្រព័ន្ធជំនួយចូលចត និងប្រព័ន្ធភ្លើងបំភ្លឺបានឆ្ងាយជាដើម៕