ដល់វេលាហើយៗ! មើលតែកម្មវិធី "បុណ្យភូមិ" សប្ដាហ៍ទី២ សប្បាយមុនបាត់ទៅហើយ!

2022-04-08 02:02:42
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីជោគជ័យក្នុងដំណើរការនៅសប្ដាហ៍ទី១ ថ្ងៃនេះ មកដល់កម្មវិធី "បុណ្យភូមិ" យើងទៀតហើយ ដោយកម្មវិធីនឹងចាប់ផ្ដើមបើកពីម៉ោង ១០ព្រឹកថ្ងៃនេះតទៅហើយជាមួយនឹងកាលវិភាគសម្ដែងជាច្រើន គ្រាន់តែឃើញដឹងតែសប្បាយមុនបាត់ទៅហើយ។

ក្រុមភ្លើងគប់ ដែលជាម្ចាស់រៀបចំកម្មវិធី "បុណ្យភូមិ" បានបញ្ចេញកាលវិភាគ ប្រយោជន៍ដើម្បីឲ្យប្រិយមិត្តដឹងពីវេលាសមគួរ ដែលពួកគេអាចត្រៀមខ្លួនបាន និងទៅតាមអ្វីដែលពួកគេពេញចិត្ត។ តាមកាលវិភាគនោះបានឲ្យដឹងថា៖

ផ្សារបុណ្យភូមិ នឹងបើកដំណើរមុនគេនៅម៉ោង ១០ព្រឹកថ្ងៃទី ៨ មេសា នេះ។ បន្តមកម៉ោង ១រសៀល គឺជាកម្មវិធីរាំលេងកម្សាន្ត និងលេងល្បែងប្រជាប្រិយខ្មែរ។ នៅម៉ោង ៣រសៀល និងម៉ោង ៥ មានរបាំត្រុដិ និងរបាំគោះអង្រែ។ កម្មវិធីចុងក្រោយសម្រាប់បុណ្យភូមិថ្ងៃទី ១ គឺកម្មវិធីទស្សនាល្ខោនយីកេ។

មកដល់ថ្ងៃទី២ និងទី៣ នៃ "បុណ្យភូមិ" ក៏មានកម្មវិធីកម្សាន្តជាច្រើនទៀត។ យ៉ាងណាក៏ដោយនៅក្នុងនោះ មានកម្មវិធីបន្ថែមថ្មីមួយទៀត ដែលមិនមានក្នុងកាលវិភាគរបស់ "បុណ្យភូមិ" ពីដំបូងនោះ គឺការប្រគំតន្ត្រីរបស់ Smart ។ កម្មវិធីនេះ ត្រូវបានដាក់ឈ្មោះថា "តន្ត្រីភូមិ Smart" ដោយប្រមូលផ្ដុំសិល្បករល្បីៗវ័យក្មេងរបស់ Pleng មានដូចជា មាស សុខសោភា អ៊ុក សុវណ្ណារី កែវ ទិត្យផល្លី កាតុ និងយាយយ៉យ។

កម្មវិធីតន្ត្រីនេះ នឹងប្រគំជូនអ្នកភូមិ "បុណ្យភូមិ" ចំនួន ៣ថ្ងៃដូចគ្នា ដោយក្នុងនោះ ថ្ងៃទី១ មានការចូលរួមដោយតារាចម្រៀងវ័យក្មេងសំឡេងស្រួយស្រែសដូចសារិកា កែវ ទិត្យផល្លី និងតារាចម្រៀងស្រីមុខគួរឲ្យស្រលាញ់ អ៊ុក សុវណ្ណារី។ សម្រាប់ថ្ងៃទី២ គឺមានវត្តមានរបស់តារាស្រីសម្លេងស្រទន់មានមន្តស្នេហ៍ មាស សុខសោភា និងសម្រាប់ថ្ងៃទី៣ មានតារាកំប្លែងស្រីសម្តីចាក់ទឹកមិនលេច អ្នកនាង កាតុ និង អ្នកចម្រៀងអាយៃស្រី យាយ យ៉យ៕

អត្ថបទ៖ ទារិកា