តារាចិន ៨នាក់ខំសាងឈ្មោះរាប់ឆ្នាំ តែត្រូវរលាយត្រឹមមួយដង្ហើម ព្រោះរឿងអាស្រូវផ្សេងៗ

2022-07-11 03:53:09
ចំនួនមតិ 0 | ចំនួនចែករំលែក 0

ចន្លោះមិនឃើញ

មានរឿងកើតឡើងច្រើនណាស់ ដែលបានផ្ទុះក្នុងពិភពសិល្បៈចិន ពិសេសទាក់ទងនឹងអាស្រូវរបស់តារាល្បីៗ។ ក្រោយមានរឿងទាំងនោះភ្លាម អ្នកដែលធ្លាប់ត្រូវបានមហាជនលើកតម្កើងទាំងនោះ ក៏ត្រូវប្រឈមនឹងការហាមប្រាម ចំពោះអ្វីដែលពួកគេបានសាង គឺត្រូវដកខ្លួនចេញពីសិល្បៈសិន ដើម្បីមើលពីកំហុសរបស់ខ្លួន។ ទោះជាយ៉ាងណា ក៏មានតារាខ្លះ សម្រេចលាក់មុខ លាក់មាត់ពីអ៊ីនធើណិត ទាំងគ្មានអ្នកដឹងថាមានរឿងអ្វីដែរ។

ខាងក្រោមនេះជាការបង្ហាញវត្តមានអ្នកដែលត្រូវបានហាមប្រាម ឬដកខ្លួនចេញពីសិល្បៈ។ តើពួកគេជាប់កំហុសដោយសាររឿងអ្វីខ្លះ?

១. Lucas (NCT)

សមាជិកដ៏មានប្រជាប្រិយភាពរបស់ NCT រូបនេះត្រូវមហាជនរិះគន់យ៉ាងចាស់ដៃ ពេលមានព័ត៌មានផ្ទុះឡើងថា លោកទាញប្រយោជន៍ពីអ្នកគាំទ្រ បែបញ៉ែលេងៗ ថែមទាំងបោកលុយទៀត។ មហាជនចិនមិនតិចទេ បានសម្ដែងការខកចិត្ត ព្រមទាំងទាមទារឲ្យលោកសុំទោសជាសាធារណៈលើ Weibo ទៀត។ យ៉ាងណាក្ដី Lucas ក៏បានសុំទោសដែរ នៅលើ Instagram ចំពោះអ្វីដែលបានកើតឡើង ប៉ុន្តែលោកមិនបានបញ្ជាក់ថាអ្វីគ្រប់យ៉ាងជាការពិត ឬយ៉ាងណាទេ។ ជាមួយគ្នានោះ Lucas ក៏ផ្អាកចេញមុខទាំងស្រុងក្នុងពិភពសិល្បៈដែរ។

២. Zhao Wei

តារាស្រីជើងចាស់រូបនេះ មានសម្បត្តិច្រើនប្រៀបដូចសេដ្ឋីនីទៅហើយ ហើយក៏មានការងារជាផលិតករភាពយន្តដែរ ផ្អែកលើសមត្ថភាព និងបទពិសោធ ចំណេះដឹងជ្រៅទាក់ទងនឹងវិស័យនេះ។ ប៉ុន្តែមិនបានដឹងថាមកពីមូលហេតុអ្វីនោះទេ សុខៗមហាជនស្រាប់តែចាប់អារម្មណ៍ថា នាងលុបគ្រប់យ៉ាងចេញពីបណ្ដាញសង្គម។ ស្របពេលទីក្រុងប៉េកាំង ក៏មិនបានផ្ដល់ការបំភ្លឺអ្វីដែរ ចំពោះមូលហេតុដែលនាងស្រាប់តែដកខ្លួនចេញពីអ៊ីនធើណិតបែបនេះ។ (ករណីនេះស្រដៀងគ្នាទៅនឹងអ្វីដែលធ្លាប់បានកើតឡើងចំពោះមហាសេដ្ឋីចិន Jack Ma ដែរ)។ ៣. Zheng Shuang

អ្នកដែលកំពុងមានភាពល្បីល្បាញនឹងស្នាដៃសម្ដែងរឿង ពិសេសរឿង "Love O2O” ប៉ុន្តែស្រាប់តែផ្ទុះព័ត៌មាននៅពេលដែលអតីតគូស្នេហ៍របស់នាងគឺ Zhang Heng បកអាក្រាតការពិតថា នាងធ្វើអំពើហួសចិត្ត ដោយឲ្យគេពពោះជំនួស។ ជាលទ្ធផល តារាស្រីរូបនេះក៏ត្រូវចិន ដាក់ចូលក្នុងបញ្ជីខ្មៅ។ ភាពយន្តដែលមាននាងសម្ដែងទាំងអស់ ត្រូវបានដកចេញពី Platform ហើយនាមជាតារាតំណាងរបស់ Prada ក៏ត្រូវបញ្ចប់ដោយគ្មានលើកលែងដែរ។

៤. Zhang Zhehan

ដោយសារតែរូបភាពប៉ុន្មានសន្លឹក លោកត្រូវបានគេដកការងារ និងកម្ចាត់ឆ្នាំងបាយសិល្បៈចោលទាំងស្រុង។ រម្លឹកទៅកាលពីប៉ុន្មានឆ្នាំមុន Zhehan បានថតរូបបង្ហោះ ពេលទៅទីសក្ការៈបូជា Yasakuni ទីក្រុងតូក្យូ ដែលទាក់ទងនឹងនិមិត្តសញ្ញាសង្គ្រាមដ៏ចម្រូងចម្រាសរបស់ជប៉ុន។ ប្រការនេះបានធ្វើឲ្យប្រជាជនចិនខឹងសម្បារជាខ្លាំង រហូតបណ្ដេញលោកចេញពីសិល្បៈ។ បើទោះជាលោកក៏បានចេញលិខិតសុំទោស ចំពោះភាពល្ងង់ខ្លៅរបស់ខ្លួនកាលពីក្មេងក៏ដោយ ក៏អាជ្ញាធរចិននៅតែមិនចង់ឲ្យលោកចូលវិស័យសិល្បៈវិញដែរ។

៥. Kris Wu

តារារ៉េបរាងខ្ពស់ស្រឡះរូបនេះត្រូវគេចាប់បាន នៅពេលនារីម្នាក់ដែលអះអាងថាជាសង្សាររបស់លោក មានឈ្មោះថា Du Meizhu ចោទថា លោកលេងល្បិច និងល្បួងក្មេងស្រីមិនទាន់គ្រប់អាយុជាច្រើននាក់ ទៅធ្វើអាជីវកម្មផ្លូវភេទ។ សាធារណជនក៏ស្នើឲ្យលោកប្រឈមនឹងច្បាប់ ហើយចេញពីសិល្បៈ។ ជាមួយគ្នានោះបណ្ដាក្រុមហ៊ុនជាច្រើនក៏បានផ្ដាច់កុងត្រាពី Kris អស់ដែរ ហើយសូម្បីរឿងដែល លោកបានសម្ដែងជាមួយនឹង Yang Zi ក៏ត្រូវប្ដូរតួប្រុសនិងថតឡើងវិញដែរ។

៦. Fan Bingbing, Deng Lun និង Yuan Bingyan

អ្នកទាំង ៣ សុទ្ធតែជួបបញ្ហាដូចគ្នា ទាក់ទងនឹងករណីគេចពន្ធ។ ផ្អែកលើរឿងនេះ ពួកគេត្រូវដកខ្លួនចេញពីសិល្បៈសិន ដរាបណារឿងស្ងាត់ និងទទួលនូវកំហុស និងការដាក់ពិន័យជាច្រើន តបទៅនឹងទង្វើរបស់ពួកគេ។