ចៅអធិការវត្តកោះកែវ៖ លំបាកបន្តិចតែបំពេញបំណងពុទ្ធបរិស័ទ និងបង្កបរិយាកាសសប្បាយ

2022-09-20 11:12:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ពិធីប្រណាំងទូក ង ផ្កាចារ នៅឃុំព្រែកដំបូកកាលពីថ្ងៃសៅរ៍-អាទិត្យកន្លងទៅនេះបើទោះជាមានផលលំបាកមួយចំនួនក្ដីព្រះតេជព្រះគុណ រស់ លឹមខូយ មិនរុញរាក្នុងការបង្កើតឡើងឡើយព្រោះដើម្បីបំពេញបំណងពុទ្ធបរិស័ទផង និងបង្កភាពសប្បាយរីករាយផង។

ព្រះតេជព្រះគុណ រស់ លឹមខូយ

ចៅអធិការវត្តកោះកែវក្នុងស្រុកស្រីសន្ធរ រស់ លឹមខូយ មានសង្ឃដីកាថា មុនឈានដល់ការរៀបចំពិធីប្រណាំងទូក ង ផ្កាចារនេះឡើងគឺមានផលលំបាកច្រើនដែរ ទីមួយរឿងថវិកា ត្រូវកៀរគរពីពុទ្ធបរិស័ទដើម្បីផ្គត់ផ្គងលើការចំណាយផ្សេងៗសរុបប្រហែល៣០លានរៀល ទីពីរ ត្រូវកាយកំប្លោក សំអាត ទាញចេញឲ្យមានជាទីតាំងប្រកួតចំណាយពេលប្រហែលជាងកន្លះខែទើបរួច។ ចំណែកទីបី បារម្ភខ្លាចគ្មានអ្នកគាំទ្រ គ្មានទូកចូលរួមជាដើម។

ប៉ុន្តែដោយសារមានការសំណូមពរពីពុទ្ធបរិស័ទ និងយុវជនក្នុងឃុំព្រែកដំបូកដែលចង់ឲ្យមានពិធីប្រណាំង និងរំលឹកអនុស្សាវរីយ៍ទីតាំងទន្លេខ្ពបដែលធ្លាប់ប្រកួតកាលពី ៣០ឆ្នាំផងនោះទើបសម្រេចបង្កើតឲ្យមានកម្មវិធីនេះឡើងតែម្ដង។ មួយវិញទៀតក៏ជាការបង្កើតកម្មវិធីកម្សាន្តសប្បាយដល់ប្រជាពលរដ្ឋមួយផ្នែកដែរនាឱកាសកាន់បិណ្ឌនេះ។

ទិដ្ឋភាពប្រណាំង

ព្រះតេជព្រះគុណមានព្រះទ័យសប្បាយរីករាយជាខ្លាំងនៅពេញពុទ្ធបរិស័ទមកចូលរួមច្រើនក្នុងពិធីប្រណាំងនេះ អមជាមួយទឹកមុខសប្បាយរីករាយបែបនេះ។ បើទោះជាមានផលលំបាកបន្តិចក្ដីនៅតែសប្បាយព្រះទ័យក្នុងការរៀបចំពិធីឡើង។

ទិដ្ឋភាពប្រណាំង

រំលឹកដែរថា ពិធីប្រណាំងទូក ង ផ្កាចារ នេះធ្វើឡើងកាលពីថ្ងៃទី១៨-១៩ ខែកញ្ញា ឆ្នាំ២០២២ នៅទន្លេខ្ពប ខាងក្រោយសាលាឃុំព្រែកដំបូក។ ទូកចូលរួមទាំងអស់មាន២៤ទូក ត្រូវជា១២គូ។ ក្នុងនោះដែរក៏មានការចូលរួមជាគណៈអធិបតីពីលោកអភិបាលស្រុកស្រីសន្ធរ លោកឧកញ៉ារួមទាំងសប្បុរសជនមួយចំនួនទៀត៕